'ആരോ ഒരാള്‍' (കവിത) ബിന്ദു ടിജി
ബിന്ദു ടിജി Published on 29 October, 2015
ആരോ പറന്നെന്നരികിലെത്തുന്നു
ചിറകിന്റെ തുമ്പത്ത് ശലഭങ്ങളേന്തി
പുതു സ്വപ്നമായി പുലരിയിലൊരു
കവിത വിരിയുമെന്നോതി
വിടരാന്‍ മടിയ്ക്കും സുമങ്ങള്‍
ക്കല്പ ചന്ദനസുഗന്ധവുമേകി
ആരോ പറന്നെന്നരികിലെത്തുന്നു
ഒരു കുഞ്ഞു കിളി പോലെയാരോ
ജാലകച്ചില്ലില്‍ ചുണ്ടുകള്‍ തട്ടിയുരുമ്മി
ഒച്ചയനക്കമുണ്ടാക്കുമെന്നും
പതിയെ തുറക്കുമോയെന്ന മട്ടില്‍
തുമ്പത്ത് ചെമ്പനീര്‍ പൂ ചൂടുമൊരു
ചില്ല തന്‍ മുള്ളാലെ കോറിയെന്‍
ഹൃദയനഭസ്സിലേക്കുറ്റു നോക്കുമെന്നും
ഇത്തിരിയിടം നല്‍കുമോയെന്ന മട്ടില്‍
ഇല്ലയെന്നോതി പതിയെ
ഞാന്‍ മിഴി പൂട്ടി മയങ്ങവേ
ഏതോ സുഖ സ്വപ്ന ശീതള പട്ടു
വിരിച്ച രാജവീഥിയിലൂടവന്‍
കൈ പിടിച്ചെന്നെ നടത്തീടുന്നു
ഇരുളില്‍ വെളിച്ചത്തില്‍
മൗനത്തിലെന്‍ നിസ്വനത്തിലും
അരികില്‍ ചിരി തൂകി ചേര്‍ന്നിരിക്കും
തീരെ തിരക്ക് കാട്ടാതെ വരിക വരിക
യെന്നോതി കൈകോര്‍ത്തു
പുഴയരികില്‍, പുളിനത്തില്‍
ചന്ദനച്ചാറില്‍ കുളിച്ചു ചന്ദ്രിക
യലസം വിലസും വിണ്ണാറിലും
അലിവാര്‍ന്നു മന്ദം യാത്രയാക്കും
മൃദു പാണിയാല്‍ ഹൃദയക്ഷതങ്ങളെ
തഴുകിയെന്നില്‍ വിമലാനന്ദ മായവന്‍
വളരുന്നു, പുല്‍കുന്നു
ആരു നീ അറിവീലയെങ്കിലുമെന്‍
മനം കൊതിച്ചുകാക്കും നിന്‍രൂപ
മൊന്നൊളിച്ചു കാണുവാന്‍
മൂഢ സ്വപ്നമെങ്കിലും നീ വരും വരും
എന്ന് മോഹിക്കയത്രേ യെന്നേകാന്ത
ചിത്തത്തിന്നേറെ പ്രിയതരം
ഒരു നേര്‍ത്ത ചുംബന നോവേറ്റു
ഞെട്ടിയുണരവേ പൊടിയുന്നു
കവിളില്‍ ചുടു രക്ത മുത്തുകള്‍
ചെറുചിരി ചൂടി ഞാനാ നോവില്‍
തലോടവേ ...മിന്നി മായുന്നു
മുള്‍മുടി ചൂടിയാ ദിവ്യ രൂപം!
ബിന്ദു ടിജി
Facebook Comments
Leave A Reply
മലയാളത്തില്‍ ടൈപ്പ് ചെയ്യാന്‍ ഇവിടെ ക്ലിക്ക് ചെയ്യുക
അസഭ്യവും നിയമവിരുദ്ധവും അപകീര്‍ത്തികരവുമായ പരാമര്‍ശങ്ങള്‍ പാടില്ല. വ്യക്തിപരമായ അധിക്ഷേപങ്ങളും
ഉണ്ടാവരുത്. അവ സൈബര്‍ നിയമപ്രകാരം കുറ്റകരമാണ്. അഭിപ്രായങ്ങള്‍ എഴുതുന്നയാളുടേത് മാത്രമാണ്. ഇ-മലയാളിയുടേതല്ല
EMalayalee Available in MediaAppUSA
Copyright © 2024 emalayalee.com - All Rights Reserved.
Webmastered by MIPL, Web Hosting Calicut Kerala