ഇതര സംസ്ഥാന തൊഴിലാളികൾ കേരളത്തിൽ ധാരാളമായി വരികയും ഇവിടെ നമുക്കു ചെയ്യാൻ മനസ്സില്ലാത്ത ജോലികൾ സന്തോഷമായി ചെയ്തു ജീവിതമാർഗ്ഗം കണ്ടെത്തുന്നു എന്നതു ഒരു വസ്തുത ആണു . അവർക്കു തൽക്കാലം വോട്ടവകാശം ഇല്ലാത്തതിനാൽ അവർക്കു വേണ്ടി സംസാരിക്കാനോ അവരുടെ പ്രശ്നങ്ങൾ മനസ്സിലാക്കാനോ നമ്മുടെ രാഷ്ട്രീയ പാർട്ടികൾക്കു സമയമോ താൽപ്പര്യമോ ഇല്ല എന്നതു സത്യമാണു .

ആരെയും വ്യക്തിഹത്യ നടത്താതെ ഒരു വിഷയത്തിലെ സങ്കീർണ്ണതകളേയും സത്യങ്ങളേയും അവലോകനം ചെയ്യാൻ നമ്മൾ ശീലിക്കുക തന്നെ വേണം . ഒരു വിഷയത്തിൽ ഉള്ള വിയോജിപ്പു പ്രകടിപ്പിക്കുന്നതു അതു പറഞ്ഞ ആളേ പരിധി വിട്ടു അധിക്ഷേപിച്ചു കൊണ്ടാവരുതു . അതു വില കുറഞ്ഞ ഒരു സമീപനം ആണു . വാർത്തകൾ സാധിക്കുമെങ്കിൽ സത്യമാണോ എന്നു ആദ്യം ഒന്നു അന്വേഷിക്കുകയും വേണം .

എന്തെങ്കിലും ഒരു വാർത്ത കേട്ടാലുടൻ അതിൽ ഉൾപ്പെട്ട വ്യക്തികളേ അധിക്ഷേപിക്കാനും വ്യക്തിഹത്യ നടത്താനും ഉള്ള ഒരു പ്രവണത ഇന്നു ഫെസ് ബുക്കിൽ വളരെ വ്യാപകം ആണു . ശ്രീമതി സുഗതകുമാരി പറഞ്ഞു എന്നു ഉത്തമ വിശ്വാസത്തിൽ അവരുടെ അഭിപ്രായത്തോടു വിയോജിക്കാം . എതിർക്കാം . അത്തരം വിമർശനങ്ങൾ നടത്തുമ്പോൾ അതിനു ആധാരമായി വന്ന വാർത്ത സത്യം ആണു എന്നു ഉറപ്പു വരുത്തണം എന്നു മാത്രം .

കുറെക്കാലം മുൻപു ഗായകൻ യേശുദാസ് ഒരു ചടങ്ങിൽ കുട്ടികൾ അഭ്യർഥിച്ചിട്ടും കാറിൽ നിന്നും ചാറ്റമഴ കാരണം പുറത്തിറങ്ങാൻ വിസമ്മതിച്ചു സ്ഥലം വിട്ടു എന്നു പറഞ്ഞു വ്യാപകമായി അദ്ദേഹത്തിനെതിരെ വിമർശനങ്ങൾ അഴിച്ചു വിട്ടു . എല്ലാം കെട്ടടങ്ങിയപ്പോൾ ആണു ആ വാർത്ത അസത്യം ആണു മനസ്സിലായതു . എറിഞ്ഞ ചെളി തിരിച്ചെടുക്കാൻ പറ്റില്ലല്ലൊ .

എതോ ഒരു സ്വാമി വേദിയിൽ തന്റെ ഒപ്പം സ്ത്രീകളേ ഇരുത്താൻ പാടില്ല എന്നു പറഞ്ഞു അഴിച്ചു വിട്ട കോലാഹലവും സ്വാമി വരാത്ത ഒരു യോഗം അലങ്കോലം ആക്കിയതും മറന്നിട്ടില്ല .സത്യം എന്തായിരുന്നു എന്നു ആർക്കറിയാം .

എതു വിഷയത്തിലും അതിവൈകാരികതയോടെ കേട്ട പാതി കേൾക്കാത്ത പാതി പ്രതികരിക്കുന്ന ഒരു ശീലം പലപ്പോഴും അപകടകരം ആകാം .

കേരളത്തിൽ ഇന്നുള്ള 25 ഒ 30 ഒ ലക്ഷം ഇതര സംസ്ഥാന തൊഴിലാളികൾ ഇന്നു കേരളത്തിന്റെ അവിഭാജ്യ ഘടകം തന്നെയാണു . നമ്മുടെ വൈവിധ്യമാർന്ന ഭാരതീയ സംസ്കാരത്തിന്റെ അടയാളം ആണു .

അതേ സമയം ആ സമൂഹം നേരിടുന്ന വെല്ലുവിളികളും പ്രശ്നങ്ങളും നിരവധി ആണു . അതാതു സംസ്ഥാനങ്ങളിലെ സ്ഥിതി ശോചനീയം ആയതിനാൽ ആണു മെച്ചപ്പെട്ട തൊഴിൽ അവസരങ്ങളും ജീവിത സൗകര്യങ്ങളും തേടി അവർ കേരളത്തിൽ എത്തുന്നതു .

താൻ പറഞ്ഞതും അതു റിപ്പോർട്ട് ചെയ്തതും തന്റെ ഭാഷ അല്ല എന്നു ഇന്നു ശ്രീമതി സുഗതകുമാരി ഒരു വിയോജനക്കുറിപ്പിൽ വിശദീകരിച്ചു എന്നു ഞാൻ മനസ്സിലാക്കുന്നു .

ശ്രീമതി സുഗതകുമാരി ആവട്ടെ , ശ്രീമതി വൽസല ആവട്ടെ അവർക്കു ശരി എന്നോ ന്യായം എന്നോ തോന്നുന്ന ഒരഭിപ്രായം പറഞ്ഞെന്നു വരാം . അതു മാദ്ധ്യമങ്ങൾ അവർക്കു തോന്നുന്ന രീതിയിൽ എരിവും പുളിയും ചേർത്തു റിപ്പോർട്ട് ചെയ്തു എന്നു വരാം . അതു കെട്ടാലുടൻ ചെളിവെള്ളം നിറച്ച ബക്കറ്റുമായി പായുന്നതു സ്വന്തമായും സ്വതന്ത്രമായും ചിന്തിക്കാൻ ഇഷ്ടപ്പെടുന്ന ഒരു ശരാശരി മലയാളിക്കു ഒട്ടും യോജിക്കുന്ന രീതി അല്ല .

എതിർക്കാം ...വിയോജിക്കാം ..ആരെയും ആരോടും ..
പക്ഷേ സംയമനവും കുറച്ചു ബഹുമാനവും പാലിച്ചു വേണം .

ശുഭദിനം .