തെന്നിന്ത്യയിലെ ഏറ്റവും ശ്രദ്ധേയരായ താരദമ്പതികള്‍ സൂര്യയും ജ്യോതികയും ദോശാ ചലഞ്ച് എന്ന പുതിയ വെല്ലുവിളിയുമായി എത്തിയിരിക്കുകയാണ് . പുരുഷന്മാര്‍ വീട്ടിലെ സ്ത്രീകളില്‍ ആര്‍ക്കെങ്കിലും ദോശ ചുട്ടുകൊടുക്കണം. എന്നിട്ട് അയാള്‍ക്ക് മറ്റൊരാളെ ഇതിനായി വെല്ലുവിളിക്കാം. ഇതാണ് ദോശ ചലഞ്ച്. ജ്യോതിക നായികയാകുന്ന മഗളിര്‍ മട്ടും എന്ന ചിത്രത്തിന്റെ ടീസര്‍ കണ്ടതോടെയാണ് സൂര്യയ്ക്ക് ഈ ആശയം തോന്നിയത്.

ചിത്രം നിര്‍മ്മിക്കുന്ന സൂര്യയുടെ 2 ഡി എന്റര്‍ടൈന്‍മെന്റ്‌സാണ് ചലഞ്ചിന് പിന്നില്‍. ടീസറില്‍ നാല് സ്ത്രീകള്‍ യാത്രയ്ക്കിടയില്‍ ഇതുവരെ ഉണ്ടാക്കിയ ദോശയുടെ കണക്കു പറഞ്ഞ് വിഷമിക്കുന്നുണ്ട്. ഇത് കേട്ട ജ്യോതിക മറ്റുള്ളവര്‍ക്കു വേണ്ടി ഒരുപാട് ദോശ ഉണ്ടാക്കി നല്‍കിയിട്ടും നിങ്ങള്‍ക്ക് വേണ്ടി ആരും ഉണ്ടാക്കിത്തന്നില്ലല്ലോ എന്ന് ചോദിക്കുന്നു. ടീസര്‍ കണ്ട സൂര്യ ഭാര്യയ്ക്ക് ദോശ ഉണ്ടാക്കി കൊടുത്തു. അതിന്റെ ചിത്രം ട്വിറ്ററിലൂടെ പങ്കുവച്ചു. ഒപ്പം സുഹൃത്തുക്കളായ നടന്‍ മാധവന്‍, വെങ്കട് പ്രഭു, ഹാരിസ് ജയരാജ്, ദേവി ശ്രീ പ്രസാദ് എന്നിവരെ ചലഞ്ചും ചെയ്തു. ഇതോടെ ദോശ ചലഞ്ച് സോഷ്യല്‍ മീഡിയയില്‍ തരംഗമായി.