കാര്മുകിലേ പെയ്തൊഴിയൂ നീ
മിന്നലാകും വജ്രായുധവും പേറി
മാനത്താകെ അലറിപ്പാഞ്ഞു
നടക്കുന്നതെന്തിനു നീ മുകിലേ
ഇടിമുഴക്കമായി കേള്ക്കുന്നു നിന്
ചുടുനിശ്വാസങ്ങള്
ശ്യാമളേ നീ ശാന്തയാകൂ
പെയ്തൊഴിയൂ നിന് കദനഭാരം
വൃക്ഷലതാദികളോഷധികള്
പശു, പക്ഷി മൃഗാദികളേവം
സമസ്ത ഭുവനവാസികള്ക്കും
അമൃതായി ഭവിക്കുന്നു ദേവീ
നീ പെയ്തൊഴിയ്ക്കും മുത്തുമണികള്
ധന്യേ, പെയ്തൊഴിയൂ നീ
നിന് ഉത്തമതീര്ത്ഥത്താല്
കഴുകിയകറ്റൂ ധരയുടെ ദേഹമാലിന്യം
ഭദ്രേ നിന്നമൃതധാരയാല്
പുഷ്ഠിയേകൂ ഭൂമീദേവിതന്
സര്വ്വാംഗങ്ങള്ക്കും നീ.
നിന് കാരുണ്യത്താല് നവോഢയെപ്പോല്
തെളിഞ്ഞിടും ഭൂമുഖം
മുകിലേ, നിന് മുന്നില് നിഷ്പ്രഭം ഹിരണ്യരേതാ
നിന് നിഴല് കണ്ടാലോടിയൊളിക്കും
ദിവാകരബിംബവും പൂര്ണ്ണേന്ദുവും
നീ ശക്തിസ്വരൂപിണി
ശൃാമ മേഘമേ സമസ്തവും നിന് കൃപാബലം
സര്വ്വപ്രാണിരക്ഷാര്ത്ഥം
പവിത്രഗംഗയായി പെയ്തൊഴിയൂ നീ കാര്മുകിലേ.