യു.ഡി.എഫ്‌ വിട്ട്‌ ഇടതു മുന്നണിയുടെ ഭാഗമാകാനുള്ള എംപി വീരേന്ദ്രകുമാറിന്റെ നീക്കത്തിനെതിരെ ആഞ്ഞടിച്ച്‌ കോണ്‍ഗ്രസ്‌ മുഖപത്രമായ വീക്ഷണത്തിന്റെ മുഖപ്രസംഗം. വീരേന്ദ്രകുമാറിനേയും, ശ്രേയാംസ്‌ കുമാറിനേയും `അട്ടകള്‍' എന്ന്‌ വിശേഷിപ്പിക്കുന്ന മുഖപ്രസംഗംഅച്ഛന്‌ രാജ്യസഭാസീറ്റും മകന്‌ ഭാവിയില്‍ മന്ത്രിസ്ഥാനവും ലക്ഷ്യമിട്ടാണ്‌ മുന്നണി മാറുന്നതെന്നും ആക്ഷേപിക്കുന്നു.

എട്ടു വര്‍ഷം മുമ്പ്‌ സിപിഎമ്മിന്റെ ചവിട്ടേറ്റ്‌ എല്‍ഡിഎഫില്‍ നിന്ന്‌ പുറത്തായ എംപി വീരേന്ദ്രകുമാറിനും കൂട്ടര്‍ക്കും തലചായ്‌ക്കാന്‍ കൂരയും നാണം മറയ്‌ക്കാന്‍ തുണിയും കൊടുത്തത്‌ യു.ഡി.എഫ്‌ ആയിരുന്നു. സിപിഎമ്മിന്റെ രാഷ്ട്രീയ മര്യാദയില്ലാത്ത പ്രഹരമേറ്റ്‌ തെരുവില്‍ കിടന്ന്‌ മോങ്ങുകയായിരുന്ന ജനതാദളിനെ രാഷ്ട്രീയ സദാചാരത്തിന്റെ പേരിലായിരുന്നു യു.ഡി.എഫ്‌ സംരക്ഷിച്ചതെന്നും മുഖപ്രസംഗം സൂചിപ്പിക്കുന്നു.

മുന്നണിമാറ്റത്തിന്‌ ജനതാദള്‍ (യു) സംസ്ഥാന സെക്രട്ടറിയേറ്റിന്റെ തീരുമാനത്തിന്‌ തൊട്ടു പിന്നാലെയാണ്‌ വീരേന്ദ്രകുമാറിന്‌ കോണ്‍ഗ്രസിന്റെ പ്രഹരം. ആശയങ്ങളിലല്ല രണ്ടുപേര്‍ക്കും അധികാരത്തില്‍ മാത്രമാണ്‌ നോട്ടമെന്നും പാലക്കാട്ടെ തോല്‍വിയുടെ പേരുപറഞ്ഞ്‌ അനര്‍ഹമായ പലതും യുഡിഎഫില്‍ നിന്ന്‌ വീരേന്ദ്രകുമാറും മകനും നേടിയിട്ടുണ്ടെന്നും മുഖപ്രസംഗത്തില്‍ കുറ്റപ്പെടുത്തുന്നു.