യുവചിന്തകനായ തലശേരി സഹായ മെത്രാൻ ബിഷപ്പ് പാംപ്ലാനിയുടെ ഈ ലേഖനം വളരെ ഹൃദ്യവും വസ്തുതാപരമായി എഴുതിയതുമാണ്. അന്തരിച്ച ശ്രീ പുലിക്കുന്നേൽ സാറിനെ ഒരു സഭാ പണ്ഡിതനായി വിശേഷിപ്പിച്ച ബിഷപ്പ് പാംപ്ലാനിയുടെ അഭിപ്രായങ്ങളിൽ അഭിനന്ദിക്കുകയും ചെയ്യുന്നു. കാലഹരണപ്പെട്ടുപോയ സഭയിൽ ബിഷപ്പ് പാംപ്ലാനിയുടെ ചിന്തകൾ മറ്റു മെത്രാന്മാർക്കും അധികാര മത്തു പിടിച്ച പുരോഹിതർക്കും ലഭിച്ചിരുന്നെങ്കിൽ സഭയിൽ ഒരു ഉടച്ചുവാർക്കലിൽക്കൂടി  നവോത്ഥനം പ്രതീക്ഷിക്കാമായിരുന്നു.  

 

മദ്ധ്യകാലങ്ങളിൽ ഇറാക്കിലെ കള്ളന്മാരെയും കൊള്ളക്കാരെയും കൊലപാതകികളെയും തൂക്കിക്കൊല്ലാനായി ഉപയോഗിച്ചിരുന്ന 'മാനിക്കേയൻ' കുരിശാണ് സീറോ മലബാർ സഭയുടെ ഔദ്യോഗിക ചിഹ്നം. മാനിക്കേയൻ തന്നെ സഭയുടെ തെറ്റായ വിശ്വാസം പ്രചരിപ്പിച്ചുകൊണ്ടിരുന്ന ഒരു പാഷണ്ഡിയായിരുന്നു. പവ്വത്ത് ബിഷപ്പിന്റെ കടുംപിടുത്തം കാരണമാണ് നിന്ദ്യമായ ഒരു കുരിശിനെ സീറോ മലബാർ സഭയിൽ പ്രതിഷ്ഠിക്കാൻ കാരണമായതും അതിന്റെ പേരിൽ സമുദായ അംഗങ്ങൾ തമ്മിൽ പരസ്പ്പരം തല്ലു കൂടേണ്ടി വന്നതും. വൈകൃതമായ ആ കുരിശ് തോമ്മാശ്ലീഹായുടേതല്ലെന്ന് ബിഷപ്പ് പാംപ്ലാനി തന്റെ ലേഖനത്തിൽ വ്യക്തമാക്കിയിട്ടുണ്ട്. 

ചർച്ച് ആക്റ്റിനെപ്പറ്റി ലേഖനത്തിൽ സൂചിപ്പിക്കുന്നില്ലെങ്കിലും സഭയിൽ അല്മെനിയുടെ പങ്കാളിത്വത്തെ ബിഷപ്പ് ഊന്നി പറയുന്നുണ്ട്. അതുപോലെ സെമിനാരിയിൽ പുരോഹിതരെ അധികാരഭ്രമികളായി പുറത്തു വരാനാണ് പരിശീലിപ്പിക്കുന്നതെന്ന അദ്ദേഹത്തിൻറെ അഭിപ്രായവും ശരി വെക്കുന്നു. അഹങ്കാരവും അധികാരമോഹവും കേരളത്തിലെ മിക്ക ബിഷപ്പുമാർക്കുമുള്ള ദുർഗുണങ്ങളാണ്.  പാരമ്പര്യ വാദവും മാർത്തോമ്മായുടെ അസ്തിത്വവും പൊള്ളയാണെന്നുള്ള ഒരു മെത്രാന്റെ അഭിപ്രായവും സഭ മനസിലാക്കേണ്ടതുണ്ട്. 

സീറോ മലബാർ പള്ളിയിലെ ആരാധന ക്രമങ്ങളെ സംബന്ധിച്ചും ബിഷപ്പ് വിവരിക്കുന്നുണ്ട്. ഒരു  തരം യോഗാ പോലുള്ള വ്യായാമമാണ് കുർബാനയിൽ സംബന്ധിക്കുന്നവർക്ക് ലഭിക്കുന്നത്. വൃദ്ധന്മാരും യുവാക്കളും കുഞ്ഞുങ്ങളും ഒരു പോലെ കുർബാനയ്ക്കിടയിൽ അമ്പതു പ്രാവശ്യമെങ്കിലും മിലിട്ടറി മോഡലിൽ എഴുന്നേൽക്കുകയും ഇരിക്കുകയും മുട്ടുകുത്തുകയുമായി വ്യായാമങ്ങൾ ചെയ്യണം.  അച്ചന്മാരുടെ നീണ്ട ബോറടിച്ച പ്രസംഗങ്ങൾ പള്ളിയോടു തന്നെ വെറുപ്പുണ്ടാക്കുന്നു. പിന്നീട് പള്ളിക്ക് സംഭാവന, പള്ളിപ്പണി മുതലായ സ്ഥിരം അഭ്യർത്ഥനകൾ വേറെയും. ചത്തു കഴിഞ്ഞാലും സെമിത്തേരിയിൽ മറവു ചെയ്യാൻ കൊള്ളപ്പണവും ചോദിക്കും. 

ഇന്ന് ഭൂരിഭാഗം കത്തോലിക്കരും പള്ളിയോട് അകന്നു പോയ വസ്തുതയും ബിഷപ്പ് പാംപ്ലാനി  അംഗീകരിക്കുന്നുണ്ട്. കാലഹരണപ്പെട്ട ചിന്താഗതികളുമായി നടക്കുന്ന ഇന്നത്തെ സഭാ നേതൃത്വം മാറ്റങ്ങൾ ആഗ്രഹിക്കുന്നുമില്ല. അല്മെനികൾക്കും പങ്കുള്ള ഒരു സഭയെയാണ് ബിഷപ്പ് പാംപ്ലാനി ആഗ്രഹിക്കുന്നത്. അതിന് സഭാസ്വത്തുക്കളിൽ അല്മെനികൾക്കും പങ്കുള്ള ചർച്ച് ആക്റ്റ് പാസാക്കേണ്ടതുമുണ്ട്.

മെത്രാന്മാരെക്കാളും വൈദികരേക്കാളും വിശുദ്ധ ജീവിതം നയിക്കുന്നത് അല്മെനികളെന്നത് ഒരു മെത്രാൻ പറയുന്നതും വിസ്മയകരം തന്നെ. ഈ ചിന്തകൾ മറ്റു പുരോഹിതർക്കുണ്ടായിരുന്നെങ്കിൽ  പൗരാഹിത്യം ഇത്രമാത്രം അധഃപതിക്കില്ലായിരുന്നു. ഇന്നുള്ള പൗരാഹിത്യം മദ്ധ്യകാല ഘട്ടത്തിലെ അധികാര മോഹികളായ ബൂർഷാ ചിന്തകർക്ക് തുല്യമാണ്. കൂദാശകളും ശുദ്ധീകരണ സ്ഥലവും വിറ്റാണ് വത്തിക്കാൻ കൊട്ടാരം പണി കഴിപ്പിച്ചത്. സഭയുടെ ദുഷിച്ച ഫ്യുഡൽ ചിന്താഗതികൾ നിറഞ്ഞ പുരോഹിതർ കാരണമാണ് പ്രൊട്ടസ്റ്റന്റ് സഭകളുണ്ടായതും.

ബിഷപ്പ് പാംപ്ലാനി പറഞ്ഞപോലെ, കേരളത്തിലെ ബിഷപ്പുമാർ ഒരു അല്മായൻ കത്ത് അയച്ചാൽ മറുപടി അയക്കില്ല. കാക്കനാട്ടുനിന്നു ആലഞ്ചേരിയുടെ ഓഫീസ് അറിഞ്ഞ ഭാവവും കാണിക്കില്ല. സഭാപ്രശ്നങ്ങളുമായി ആരെങ്കിലും കാക്കനാട്ട് എത്തിയാൽ കർദ്ദിനാൾ ആലഞ്ചേരി പത്തായത്തിനുള്ളിൽ ഒളിച്ചിരിക്കും. അടുത്ത കാലത്തെ ജലന്ധർ ബിഷപ്പുമായുള്ള കന്യാസ്ത്രി വിവാദങ്ങളിൽ ആലഞ്ചേരിയുടെ സമീപനവും അതിന് തെളിവാണ്. മാന്യമായി അല്മെനികളോട് എങ്ങനെ പെരുമാറണമെന്നു പഠിക്കാനായി കേരളത്തിലെ ബിഷപ്പുമാർക്കു പ്രായോഗിക പരിശീലനം നൽകുന്നതു നന്നായിരിക്കും.