റിട്ടയേർഡ് ജസ്റ്റിസ് അഗസ്റ്റിൻ കണിയാമറ്റത്തിന്റെ ലേഖനം സീറോ മലബാർ സഭയുടെ ദുഷിച്ച ചരിത്ര സംഭവങ്ങളെപ്പറ്റി ഒരു ഉൾകാഴ്ച നൽകുന്നുണ്ട്. ലേഖനത്തിൽ വസ്തുതകൾ പലതും ചൂണ്ടി കാണിക്കുന്നു. സത്യങ്ങൾ പുറത്തു വരുംതോറും സീറോ മലബാർ സഭയുടെ അടിത്തറതന്നെ ഇളകുന്നുവോയെന്ന് തോന്നിപ്പോവുന്നു. പത്രോസിന്റെ പാറയെന്നു ക്രിസ്തു ഉപമിച്ച സഭയുടെ വ്യക്തിപ്രഭാവം മണൽക്കൂമ്പാരത്തിൽ പണി കഴിപ്പിച്ച സഭയുമാകുന്നു. അപമാനഭാരം താങ്ങാനാവാത്ത സഭയുടെ തലവനാണ് കർദ്ദിനാൾ ആലഞ്ചേരിയെന്നു പറയാതെ വയ്യ. 

മാർ ജേക്കബ് തൂംകുഴി 1973 മുതൽ ഇരുപത്തി രണ്ടു വർഷം മാനന്തവാടി രൂപതയുടെ ആദ്യത്തെ ബിഷപ്പായി ഭരണം നടത്തിയിരുന്നു. അതിനുശേഷം 1975-ൽ അദ്ദേഹം താമരശേരിയുടെ ബിഷപ്പായപ്പോൾ ചുമതല വഹിച്ചത് മോൺസിഞ്ഞോർ ജോസഫ് കണിയാമറ്റമായിരുന്നു. 1997-ൽ രണ്ടു വർഷത്തിനുശേഷം ഇമ്മാനുവേൽ പൊത്തനാംമുഴി എന്ന കർമ്മീലീത്ത വൈദികൻ അവിടെ ബിഷപ്പായി ചുമതല ഏറ്റെടുത്തു. മോൺസിഞ്ഞോർ ജോസഫ് കണിയാമറ്റം ലേഖകന്റെ ബന്ധുക്കാരനാണോയെന്നു അറിഞ്ഞുകൂടാ. ബിഷപ്പ് പൊത്തനാംമൂഴിയുടെ നിയമനം സംബന്ധിച്ച രാഷ്ട്രീയം വ്യക്തമായി ഈ ലേഖനത്തിൽനിന്നും മനസിലാക്കാൻ സാധിക്കുന്നില്ല. ചങ്ങനാശേരി ആർച്ച് ബിഷപ്പ് പവ്വത്തിലാണ് അവിടെ പുരോഹിത രാഷ്ട്രീയം കളിച്ചതെന്നു മനസിലായി.    

മാനന്തവാടി രൂപത കേരളത്തിലെ കുപ്രസിദ്ധ രൂപതകളിലൊന്നാണ്. അതിന്റെ ഇപ്പോഴത്തെ രൂപതാ അധികാരി ജോസ് പൊരുന്നേടമെന്ന ഒരു ബിഷപ്പും.

മാനന്തവാടി രൂപതയിലെ ഒരു വികാരിയുടെ ചില രഹസ്യ വിവരങ്ങൾ പുറത്തു വിട്ട വിശ്വാസിയുടെ ഭാര്യയുടെ കുമ്പാസാര രഹസ്യം വികാരി കുർബാനക്കിടയിൽ അടുത്തയിടെ പരസ്യമായി പറഞ്ഞതും വലിയ വിവാദമായി മാറിയിരുന്നു. മാത്രമല്ല ആ കുടുംബത്തെ കൂദാശകൾ സ്വീകരിക്കുന്നതിൽനിന്നും പള്ളിയിൽ മുടക്കുകയും ചെയ്തു. ബിഷപ്പ് ജോസ് പൊരുന്നേടം വികാരിയുടെ പക്ഷം ചേർന്ന് വിശ്വാസിക്ക് വിലക്കു കല്പ്പിച്ചതിൽ കൂട്ടുനിൽക്കുകയും ചെയ്തു. 

അതുപോലെ, ഫാദർ റോബിന്റെ കൗമാരക്കാരിയിൽ ഉണ്ടായ അവിഹിത ഗർഭത്തെയും മറച്ചു വെക്കാൻ എല്ലാ സഹായങ്ങളും ചെയ്തു കൊടുത്തത് ഇതേ മാനന്തവാടി ബിഷപ്പായിരുന്നു.

രൂപതാ വക കർണ്ണാടകയിലുണ്ടായിരുന്ന അറുന്നൂറ്റി ഇരുപത് ഏക്കർ ഭൂമിയാണ് ചുളു വിലക്ക് ഒരു ശതകോടി മുതലാളി വാങ്ങിയത്. അതിലെ ഇടനിലക്കാരൻ ഒരു വികാരി തട്ടിയെടുത്തത് മൂന്നു കോടി രൂപയും. ഈ വസ്തു കച്ചവടത്തിന്റെ കണക്കുകൾ ഇടവക ജനങ്ങളെ കാണിക്കാതെ ഒളിച്ചു വെച്ചിരിക്കുകയാണ്. സഭയിലെ കള്ളന്മാർ കപ്പലിനകത്തു തന്നെയുണ്ട്. അതുകൊണ്ടാണ് ലേഖകൻ വേലി തന്നെ വിളവ് തിന്നുന്നുവെന്ന തലവാചകം ലേഖനത്തിനു കൊടുത്തിരിക്കുന്നതും.

നിലക്കൽ പ്രശ്നമുണ്ടാക്കി അവിടെ നിലയ്ക്കൽ തോമ്മാ ശ്ളീഹായുടേതെന്നു പറഞ്ഞു കള്ളക്കുരിശു സ്ഥാപിക്കാൻ പ്രചോദനം നൽകിയത് ചങ്ങനാശേരി ആർച്ച് ബിഷപ്പായിരുന്ന 'പവ്വത്തിൽ' ആയിരുന്നു. മത സൗഹാർദ്ദത്തിന്റെ ഈറ്റില്ലമായിരുന്ന കേരളമണ്ണിൽ ഹിന്ദുക്കളെയും ക്രിസ്ത്യാനികളെയും രണ്ടു തട്ടിലാക്കാൻ കാരണമാക്കിയതും പവ്വത്ത് ബിഷപ്പിന്റെ വിചാര ശൂന്യങ്ങളായ പ്രവർത്തികളായിരുന്നു. മറ്റുള്ളവരുടെ പവിത്രമായ ആരാധന സ്ഥലങ്ങളായ ശബരി മലയുടെ പരിസരങ്ങൾ കൈവശപ്പെടുത്താൻ മോഹിച്ച ആ ബിഷപ്പ് തന്നെയാണ് സീറോ മലബാർ സഭയിൽ ഇത്രമാത്രം കുത്തിത്തിരിപ്പുകൾ ഉണ്ടാക്കിയതും.

നൂറ്റാണ്ടുകളായി ആരാധിച്ചിരുന്ന കുരിശിന്റെ സ്ഥാനത്ത് ക്ലാവർ കുരിശു സ്ഥാപിച്ചു വിശ്വാസികളെ രണ്ടു തട്ടിലാക്കിയതും ഈ ബിഷപ്പ് തന്നെ. 'കർദ്ദിനാൾ ആലഞ്ചേരി' പവ്വത്തു ബിഷപ്പിന്റെ മാനസ പുത്രനെന്നതും ശരി തന്നെ. 

സീറോ മലബാർ സഭ തികച്ചും ഒരു ചർച്ചിയാനിറ്റിയായത് പവ്വത്ത് ബിഷപ്പിന്റെ കാലം മുതലാണ്. മാർ കാവുകാടനെപ്പോലെയുള്ള പരിശുദ്ധരായ ബിഷപ്പുമാരും വൈദിക പ്രമാണികളും സഭയ്ക്കുണ്ടായിരുന്ന കാര്യം മറക്കുന്നില്ല.

സഭയുടെ പല ചരിത്ര സത്യങ്ങളും ഓർമ്മിപ്പിച്ചതിൽ ലേഖകനു നന്ദി. ലേഖനം എഴുതുമ്പോൾ വില്ലന്മാരായ കഥാപാത്രങ്ങളുടെ പേരുവിവരങ്ങളും കൂടി എഴുതുക. വായനക്കാർക്ക് അത് കൂടുതൽ ചരിത്രത്തെ അവലോകനം ചെയ്യാൻ സഹായകമാവും.