റഷ്യയില് പോയി വേള്ഡുകപ്പ് ഫുട്ട്ബോള്
കാണണമെന്ന് ആഗ്രഹമുണ്ടായിരുന്നെങ്കിലും സാമ്പത്തികം അനുവദിക്കാഞ്ഞതു കൊണ്ട്
വീട്ടിലിരുന്ന് ഫ്രീയായി കാണാമെന്ന് നിനച്ചു. കേബിള് കമ്പനിക്ക് റൊമ്പ
താങ്ക്സ്. ചേര്ത്തലയില്നിന്ന് ഒരു സാഹസിക യുവാവ് സൈക്കിള്ചവിട്ടി
റഷ്യയില്പോയി കളി കണ്ടെന്ന് പത്രവാര്ത്ത. മലയാളി യുവാക്കള് ഇതുപോലുള്ള
സാഹസികതകള്ക്ക് മുതിരുന്നത് അഭിനന്ദനീയമാണ്. രാഷ്ടീയപാര്ട്ടികളുടെ
ചട്ടുകങ്ങളായി മുദ്രാവാക്യം വിളിച്ചും ഹര്ത്താല് നടത്തിയും ജീവിതം
പാഴാക്കുന്നതിനു പകരം ഇങ്ങനെയുള്ള സാഹസികകൃത്യങ്ങളില് ഏര്പ്പെടുന്നത്
എത്രയോ നല്ലതാണ്. ബസ്സിനും കടകള്ക്കും കല്ലെറിയുന്നതിനുപകരം ഏതെങ്കിലും
മൈതാനത്തുപോയി ഷോട്ട്പുട്ട് എറിഞ്ഞു പരിശീലിച്ചാല് നിനക്കും നാടിനും
ഗുണകരമായിരിക്കും.
റഷ്യയിലെ ഫുട്ട്ബോള് മാമാങ്കം കണ്ടുകൊണ്ടിരുന്നപ്പോള് ഞാനാലോചിച്ചത്
ഇന്ഡ്യക്ക് എന്നെങ്കിലും ഫൈനല് റൗണ്ടില് കളിക്കാനാകുമോ എന്നാണ്. ആയിരം
വര്ഷംകഴിഞ്ഞാലും സാധ്യമാകുമെന്ന് തോന്നുന്നില്ല. നൂറ്റിമുപ്പത്തഞ്ചുകോടി
ജനങ്ങള് ഉണ്ടെന്നുപറഞ്ഞിട്ട് എന്തുകാര്യം? ക്വാളിറ്റിയുള്ള
ഒരെണ്ണമെങ്കിലുമുണ്ടോ ഒളിമ്പിക്സില് സ്വര്ണ മെഡല് നേടാന്? അരിയും
ഗോതമ്പും തിന്നു തീര്ക്കാനല്ലാതെ ഈ നൂറ്റിമുപ്പത്തഞ്ചുകോടിയെക്കൊണ്ട്
എന്തുപ്രയോജനം?
നമ്മുടെ യുവാക്കള്ക്ക് മെസ്സിയുടേയും റൊണാള്ഡോയുടേയും ഫോട്ടോവച്ച്
പൂജിക്കാനല്ലാതെ ആഘോഷിക്കാന് മറ്റൊന്നുമില്ലല്ലോ. സന്തോഷിക്കാന്
ഒന്നുമില്ലാത്തതു കൊണ്ടാണ് അവര് വല്ലവരുടേയും വിജയം ആഘോഷിക്കുന്നത്.
അര്ജന്റീന തോറ്റതിന്റെ സങ്കടത്തില് ഒരു മാന്യന് കോട്ടയത്ത് ആത്മഹത്യ
ചെയ്തതായി വായിച്ചു.
കേരളത്തിലെ ഒരു ജില്ലയുടെ വലിപ്പവും ജനസംഖ്യയുമുള്ള ക്രൊയേഷ്യയാണ്
ഫൈനലില് കളിച്ചത്. അവര് ജയിച്ചോ തോറ്റോ എന്നുള്ളത് വിഷയമല്ല. അവര്
ഫൈനല്വരെ എത്തിയെന്നുള്ളതാണ് അഭിനന്ദനീയം. അപ്പോള് ജനങ്ങളുടെ
എണ്ണത്തിലല്ല ക്വാളിറ്റിയിലാണ് കാര്യം.
അതുപറഞ്ഞപ്പോളാണ് ഗോപാലകൃഷ്ണനെ ഓര്മ്മവന്നത്. വെറും ഗോപാലകൃഷ്ണനല്ല,
ഡോക്ടര് ഗോപാലകൃഷ്ണന്. എന്തിന്റെ ഡോക്ടറാണെന്ന് അറിയില്ല. മെഡിക്കലാണോ
അതോ ഏതെങ്കിലും യൂണിവേഴ്സിറ്റി സമ്മാനിച്ച ഡോക്ടറേറ്റാണോ? രണ്ടായാലും
അദ്ദേഹത്തിന്റെ ആശയങ്ങളും സംസാരവും ഡിഗ്രി നല്കിയ യൂണിവേഴ്സിറ്റിയുടെ
അന്തസ്സിന് ചേര്ന്നതല്ല. സാംസ്കാരിക കേരളമെന്ന് അഭിമാനിക്കുന്ന നാട്ടില്
വര്ഗീയം പരസ്യമായി പറയാന് പലരും മടിക്കും, നമ്മുടെയെല്ലാം മനസില് അത്
കുടികൊള്ളുന്നുണ്ടെങ്കിലും. എന്നാല് നമ്മുടെ ഡോക്ടര്ക്ക് അങ്ങനെയുള്ള
ഉളുപ്പൊന്നുമില്ല. അദ്ദേഹം യൂട്യൂബില്കൂടി വര്ഗീയത വച്ചുകാച്ചുകയാണ്.
കേരളത്തിലെ ചില ക്രിസ്ത്യാനികള്ക്ക് ചില്ലറ കുഴപ്പങ്ങളുണ്ടെന്നുള്ളത്
സത്യമാണ്. പെണ്മക്കളുടെ കല്ല്യാണാലോചന വരുമ്പോഴും നാലുപേരു കൂടുന്ന
സദസിലും പൊങ്ങച്ചത്തിനു വേണ്ടി തങ്ങളുടെ കുടുംബ മഹത്വം
എഴുന്നെള്ളിക്കുകയെന്നുള്ളത്. അതായത് തോമാ ശ്ലീഹ കേരളത്തില് വന്നപ്പോള്
കൃസ്തുമതം സ്വീകരിച്ച നമ്പൂതിരിമാരുടെ പരമ്പരയാണ് തങ്ങളുടെത് എന്നൊക്കെ.
ചിലതൊക്കെ സത്യവുമായിരിക്കാം. ഇന്ഡ്യയിലെ ക്രിസ്ത്യാനികളും മുസ്ലീമുകളും
ഹിന്ദുക്കളില്നിന്ന് മാര്ഗ്ഗം കൂടിയവരാണ്, അല്ലതെ റോമായില്നിന്നോ
അറേബ്യയില്നിന്നോ കുടിയേറിയവരല്ല. ഇത് എല്ലാവര്ക്കും അറിയാവുന്ന
സത്യമാണ്.
പക്ഷേ, ഗോപാലകൃഷ്ണന് പറയുന്നത് മറ്റൊന്നാണ്. നമ്പൂതിരിമാര് ക്രിസ്ത്യാനികളില് ബീജം പാകിയതു കൊണ്ടാണ്!