യൂദായുടെ വിലാപം(കവിത: ചാക്കോ ഇട്ടിച്ചെറിയ)

പന്ത്രണ്ടുശിഷ്യരെ ചേര്‍ത്തൊരീശോനിന്റെ

ശിഷ്യരില്‍ ഞാനാണ് യൂദാ

പന്ത്രണ്ടുപേരിലുംശപ്തനാണിന്നുഞാന്‍

ദൈവരാജ്യത്തിന്നൊരന്യന്‍

ആദിമധ്യാന്തങ്ങളില്ലാത്തൊരെന്‍ ജീവ

കാരുണ്ണ്യപൂരാക്കടലെ

ആരിലുംസാക്ഷാല്‍ കനിവുള്ള നിന്‍ കൃപാ

ദാനങ്ങളെങ്ങള്‍ക്കുനല്‍കാന്‍

അന്നുമിന്നുംകാലമൊക്കെയും സന്നിധി

ചേര്‍ന്നുവരും നിന്റെമക്കള്‍

എന്നേഅപരാധിയായ്ക്കണ്ടിടായ്വാന്‍ !

എനിക്കുംകൃപാവരം നല്‍കൂ !

എന്നോഒരുദിനംഎന്നേ വിളിച്ചു നിന്‍

ചാരേഅടുപ്പിച്ഛതില്ലേ

കൂട്ടുകെട്ടെല്ലാമുപേക്ഷിച്ചുശിഷ്യനായ്

പെട്ടെന്നു ചേര്ന്നുവന്നില്ലേ

എന്തെന്തുനന്‍മകള്‍ വന്നുചേര്‍ന്നീടുവാ

നന്തരംഗത്തില്‍ കൊതികൊ

ണ്ടെന്‍നാഥ നിന്‍വാക്കിലാശ്രയംവച്ചു ഞാന്‍ !

കണ്ടെന്റെ സൌഭാഗ്യമെല്ലാം

നീവന്നതെന്തിനായീഭൂവിലെന്നു നീ

ആവോളമന്നുചൊന്നില്ലേ

ആരത് കേട്ടെന്നുചോദിച്ചിടട്ടെഞാന്‍

ആരോട് ചോദിച്ചിടാനായ് ?

നിന്നെയൊറ്റിക്കൊടുത്തെന്നന്നുമിന്നു

മെന്നെന്നുമീലോകര്‍പറഞ്ഞീ

ടുന്നെന്റെനാഥ ഞാന്‍ ചെയ്‌തോരപരാധ

മെന്നോടു ചൊല്ലിടൂവേഗം

ഞാന്‍ചെയ്തപാതകമാണോ പറയൂ

എനിയ്ക്കുള്ള കര്‍ത്തവ്യമല്ലേ

ഞാനതുചെയ്യാതിരുന്നെങ്കില്‍ മറ്റൊരാള്‍

ചെയ്യാതെപറ്റുമോ ചൊല്ലൂ

സര്‍വസൃഷ്ടിക്കുംവരാനുള്ള സൌഭാഗ്യ

മന്നുകൈവന്നതാല്‍ മര്‍ത്യന്‍

നിന്നുയര്‍പ്പിന്‍ശക്തി പ്രാപിച്ചു നിത്യ

രക്ഷക്കവകാശിയായില്ലേ

അങ്ങു മരിക്കതുയിര്‍ക്കാതെയീവക

എങ്ങനെപൂര്‍ണ്ണമായ്ത്തീരും ?

ഞാനതുചെയ്യാതിരുന്നെങ്കില്‍ മറ്റൊരാള്‍

ചെയ്യാതെപറ്റുമോ ചൊല്ലൂ!

ആരോഅപരാധമന്നറിയാതെ

പറഞ്ഞതു പാട്ടായിമാറി

ഇന്നുംവിചിന്തനം ചെയ്യാതെ മാലോകര്‍

എന്നേപ്പഴിചൊല്ലിടുന്നു

അങ്ങെന്റെജീവിതംസംശുദ്ധമായ്ത്തീര്‍ത്ത

താരുമറിഞ്ഞില്ലപോലും

എന്‍ പാപവുംപേറിഅങ്ങ് കുരിശില്‍

മരിച്ചെന്നസത്യവുമൊപ്പം

പത്രോസിനെ അങ്ങുശാസിച്ചു,സാത്താനെ

വിട്ടുപോ എന്നെ,യെന്നോതി !

അങ്ങെയ്ക്കിതൊന്നുംഭവിക്കാതിരിക്കട്ടെ

എന്നവന്‍ചൊന്നതാലല്ലോ

വന്നൂമരിച്ചുയര്‍ത്തെങ്ങള്‍ക്ക് ജീവനെ

തന്നീടുവാന് നിന്റെലക്ഷ്യം

എന്നോടുരച്ചതാല്‍ ഞാനതില്‍പങ്കാളി

എന്നതല്ലേപരമാര്ത്ഥം !

ചാക്കോ ഇട്ടിച്ചെറിയ.

യൂദായുടെ വിലാപം(കവിത: ചാക്കോ ഇട്ടിച്ചെറിയ)

PATHRANGAL

US WEBSITES

EMalayalee Available in MediaAppUSA