പി സി മാത്യുവിന്റെ  ആംഗ്ലേയ ഭാഷയിലുള്ള ചോദ്യത്തെ മലയാളത്തിലേക്ക്  തര്‍ജ്ജമചെയ്യുമ്പോൾ 'ഇവന്മാർക്ക് വേറെ തൊഴിൽ ഒന്നും ഇല്ലേ' എന്നാണ് ഞാൻ മനസ്സിലാക്കുന്ന അർഥം . ഇതിന്റെ മറ്റൊരു ധ്വനി തൊഴിൽ ഇല്ലാത്തവർക്കും, റിട്ടയർ ആയവർക്കും അഭിപ്രായ സ്വാതന്ത്യം ഇല്ലാ എന്നുമാണ് . അതായത് അവർക്ക് ഈ കാലഘട്ടത്തിലെ സാമൂഹ്യ പ്രശ്നങ്ങളെ കുറിച്ച് ചിന്തിക്കുവാനും അഭിപ്രായം പറയാനും  അവകാശമില്ല മിണ്ടാതെയിരുന്ന്  "എന്നെ പോലെയുള്ളവർ പറയുന്നത് കേട്ട്  വാ പൂട്ടി  ഇരുന്ന് കൊൾക " എന്ന ഒരു  താക്കീത്കൂടി ഉണ്ട് .  ഇനി ഇദ്ദേഹത്തിന്റെ ആദ്യത്തെ വാചകം ശ്രദ്ധിക്കുക . "സ്ത്രീകൾക്ക് നേരെയുള്ള ഈ പ്രശ്നങ്ങൾ ചീത്ത തന്നെയാണെന്ന് ഞാൻ  വിശ്വസിക്കുന്നു  " പക്ഷെ എന്റെ ചോദ്യം ഈ സ്ത്രീകൾ ഇലക്ഷൻ വരുമ്പോൾ മാത്രം ഈ പ്രശ്‌നം ഉന്നയിക്കുന്നതെന്താണ് ?  കൂർമ്മ ബുദ്ധിയായ ഇദ്ദേഹം കണ്ണടച്ച് പൂച്ച പാല് കുടിക്കുന്നത് പോലെയാണണ്  ഈ ചോദ്യവും അദ്ദേഹത്തിൻറെ സന്ദേഹവും തൊടുത്തു വിട്ടിരിക്കുന്നതെന്ന് സാധാരണക്കാരും തൊഴിലില്ലാത്തവരുമായ  വായനക്കാർക്കും മനസിലാകും . (അദ്ദേഹത്തെപ്പോലെ  ജ്ഞാനികളായ വായനക്കാർക്ക് അത് ഏതു തരത്തലും വളച്ചൊടിക്കാമല്ലോ ? )

          ഭാരതത്തിൽ നിന്ന്  ഇവിടെ കുടിയേറിയിരിക്കുന്ന എല്ലാവര്ക്കും അറിയാവുന്ന ഒരു സത്യമാണ് സ്ത്രീകളെ നമ്മുടെ പിതാക്കളും പിതാമഹന്മാരും എല്ലാ മതങ്ങളും  അടിച്ചമർത്തിയിരുന്നു എന്നത്     സ്വാധീനത്തിൽ വളർന്നു വന്ന് ഇവിടെ കുടിയേറിയ പലരും അത് തുടരുകയും അവരുടെ സ്ത്രീകളുടെ സ്വാതന്ത്ര്യത്തെയും അതുവഴി ആന്തരിക സ്വാതന്ത്ര്യത്തെ    അടിച്ചമർത്തിയിട്ടുണ്ടന്നുള്ളത് ഞാൻ പറയാതെ നിങ്ങളെപ്പോലുള്ളവർക്ക് അറിവുള്ളതാണല്ലോ . ഇതിന്റെ കാടിന്യത്തിൽ തകർന്നു പോയ പല കുടുംബങ്ങളെയും നമ്മളക്ക് അറിയാവുന്നതാണ്.  അമേരിക്കയിൽ മീടൂ എന്ന,  ഇത്തരത്തിൽ അടിച്ചമർത്തപ്പെട്ടവരുടെ മുന്നേറ്റത്തിന്റെ ചാലക ശക്ക്തിയുടെ പ്രഭവ സ്ഥാനം  നൂറ്റാണ്ടുകളായി,  സ്ത്രീകൾ ഒരു താണ വർഗ്ഗം അല്ലെങ്കിൽ ഉപവർഗ്ഗമാണെന്ന പുരുഷന്റ മനോഭാവത്തിൽ നിന്നും അതുപോലെ അവരുടെ പെരുമാറ്റങ്ങളിൽ നിന്നുമാണ്  . സ്ത്രീകൾ വിദ്യാഭ്യാസ പരമായും, സാമ്പത്തികമായും സ്വയം പരിയാപ്തത നേടിയപ്പോൾ, അവർ കൂടുതൽ സ്വാതന്ത്രരാവുകയും, വേണ്ടി വന്നാൽ വിവാഹ മോചനം നേടാൻ തയാറാക്കുകയും ചെയ്‌തു. പണവും പ്രതാപവും കൊണ്ട് എന്ത് നേടാമെന്നുള്ള പുരുഷ മനോഭാവം വെല്ലുവിളിക്കപ്പെട്ടു . ഇന്ന് ഭരണധിപന്മാർ, മത നേതാക്കന്മാർ, സിനിമ താരങ്ങൾ, കോൺഗ്രസ്സ്മാൻമാർ, സെൻറ്ററിന്മാർ അങ്ങനെ പണത്തിന്റെയും പ്രതാപത്തിന്റെയും പിന്നിൽ നിന്ന് സ്ത്രീകളെ പീഡിപ്പിച്ചിരുന്ന 

പലമാന്യന്മാരുടെയും മുഖം മൂടികൾ പിച്ചി ചീന്തപ്പെട്ടു . പലരും അവമാനിതരായി അവരുടെ സ്ഥാനങ്ങൾ ഉപേക്ഷിക്കുകയും ചെയ്‌തു . ഒരു സമയത്ത് പണവും പ്രതാപവും കൊണ്ട് സ്ത്രീകളുടെ വാ മൂടി കെട്ടാം എന്ന് വിചാരിച്ചിരുന്നവർക്ക് അത് കഴിയാതെ വന്നു .  ജീവനെയും സമൂഹത്തിനേയും നില നിറുത്തണമെങ്കിൽ സ്ത്രീകൾ ഒരു അനിവാര്യ ഘടകമാണെന്ന് തിരിച്ചറിയുന്ന ഒരു സമൂഹം രൂപാന്തരപ്പെട്ടുകൊണ്ടിരിക്കുകയാണ്  അവർ സമൂഹത്തിലെ നേതൃത്വത്തിന്റെ ചുക്കാൻ പിടിക്കുന്നവരിൽ നിന്ന് സ്വാഭാവത്തിൽ ഉത്‌കൃഷ്ടതയും സന്മാർഗ്ഗികതയും അവകാശപ്പെട്ടു തുടങ്ങി . പ്രത്യകിച്ച് ഇലക്ഷൻ സമയത്ത് അതിന്റെ ശക്തി കൂടുതൽ പ്രകടമായി കാണാൻ തുടങ്ങി.   ഒരു കാലംവരെ ആരാലും ചോദ്യം ചെയ്യപ്പെടാതെ സ്വതന്ത്ര ജീവിതം നയിച്ചിരുന്നവർ അസ്വസ്ഥരായി . അങ്ങനെയുള്ളവർക്ക് ഒത്താശ ചെയ്ത് കൊടുക്കുന്ന നിങ്ങളെപോലെയുള്ളവരുടെ വക്ര ബുദ്ധിയിൽ ഇതുപോലെയുള്ള ചോദ്യങ്ങൾ പൊന്തി വരികയും , അതിനെ ചോദ്യം ചെയ്യുന്നവരെ ഇടിച്ചു താഴ്ത്താൻ ശ്രമിക്കുകയും ചെയ്യുന്നു . ഗാന്ധിജി പറഞ്ഞതുപോലെ ആദ്യം നിങ്ങൾ ഞങ്ങളെ പോലെയുള്ളവരെ അവഗണിക്കും, പിന്നെ ഞങ്ങളെ നോക്കി വിഡ്ഢികൾ എന്ന് വിളിച്ച് പൊട്ടി ചിരിക്കും അവസാനം നിങ്ങൾ യുദ്ധത്തിന് തയാറാകും .  നിങ്ങൾ  രാഹുലിനെപ്പോലെ, പി സി ജോർജ്ജിനെപോലെ, കൊല്ലം തുളസിയിലെപ്പോലെ, സുരേഷ് ഗോപിയെപ്പോലെ, നിങ്ങളുടെ സ്ത്രീകളെയും കൂട്ടി നിരത്തിൽ ഇറങ്ങും . നിങ്ങളുടെ സ്ത്രീകളുടെ സ്വാതന്ത്ര്യം ചവിട്ടി താഴ്ത്തുവാൻ.  അവരെ കരുവാക്കി നിങ്ങൾ രക്ത ചൊരിച്ചിലിന് തയാറാകും .  ഇതൊന്നും നിങ്ങൾക് ആരോടും കടപ്പാടുണ്ടായിട്ടല്ല. നിങ്ങളുടെ ദുഷിച്ച പ്രവണതകളെ താലോലിക്കുവാൻ വേണ്ടി . നിങ്ങൾക്ക് ആരോടും കടപ്പാടില്ല. നിങ്ങൾ നിങ്ങളെ സ്നേഹിക്കുന്നു. നിങ്ങളുടെ ചിത്രങ്ങളിൽ നോക്കി അതിന്റെ ചുവട്ടിൽ നിങ്ങളെകുറിച്ചെഴുതിയിരിക്കുന്ന പൊങ്ങച്ച പട്ടിക വായിച്ച് നിങ്ങൾ ആനന്ദിക്കുന്നു .  

ഈ കാപട്യം എന്നുവരെ തുടങ്ങുവാൻ സാധിക്കും .? ഇല്ല നിങ്ങളെപ്പോലുള്ളവരുടെ കൊട്ടാരങ്ങൾ തകർക്കപ്പെടുവാൻ സമയമായിരിക്കുന്നു 

സമൂഹത്തില്‍ നിലനിന്നു പോന്ന അനാചാരങ്ങള്‍ക്കെതിരെ ഒരു ജനതയെ ഉണര്‍ത്തിയ ആശാന്‍ വരികള്‍ എക്കാലവും പ്രസക്തി നേടുന്നവയാണ്.

മറ്റൊന്നുകൂടി ഓർത്തിരിക്കുക 

'' മാറ്റുവിന്‍ ചട്ടങ്ങളെ സ്വയ,മല്ലെങ്കില്‍

  മാറ്റുമതുകളീ നിങ്ങളെത്താന് ‍....''

മിസ്റ്റർ പി സി മാത്യു നിങ്ങൾ ഇത് ഒരു മന്ത്രമായി ഒരുവിട്ടുകൊൾക  കാരണം ഇത് മാറ്റങ്ങളുടെ സമയമാണ് . നിങ്ങളുടെ അനുഭവങ്ങളും പാണ്ഡിത്യവും ഒരിക്കലും നിങ്ങളുടെ രക്ഷക്ക് വരില്ല . കാലത്തിന്റെ മാറ്റങ്ങെളെ ഉൾക്കൊണ്ട് സമൂഹ നന്മയ്ക്കായ് നില കൊള്ളുക .   

മാറ്റത്തിൻ കൊടുങ്കാറ്റടിച്ചിടുമ്പോൾ 

മാറാതെ നിന്നിട്ടെന്തു കാര്യം 

മൈക്കലും ഹാർവിയും ഐക്കുമൊക്കെ 

ആഞ്ഞടിച്ചപ്പോൾ ജനം ഓടി മാറി 

എന്നാൽ ചില വിഡ്ഢിയാന്മാർ 

ചോദ്യങ്ങൾ ഉയർത്തി എതിർത്തു നിന്നു 

എന്തായി അവരുടെ കഥകളെന്ന് 

എന്തിന് ഇവിടെ ഞാൻ കുറിച്ചിടേണം 

എല്ലാം നിങ്ങൾക്ക്  നന്നായി അറിവുള്ളതല്ലേ  ,

വേണെങ്കിൽ ആകാം തുടർന്നു കൊള്ക 

എന്നാൽ വിരമിക്കുകയാണ്  ഭേദം