Image

അര്‍ച്ചനയുടെ ആരോപണം ശെരിവെച്ച് ബാദുഷ: നടിയില്‍ നിന്ന് പ്രലോഭനം ഉണ്ടായപ്പോള്‍ ഷെറിന് അബദ്ധം പറ്റി, വാട്‌സാപ്പ് സന്ദേശം പുറത്ത്

Published on 14 October, 2018
അര്‍ച്ചനയുടെ ആരോപണം ശെരിവെച്ച് ബാദുഷ: നടിയില്‍ നിന്ന് പ്രലോഭനം ഉണ്ടായപ്പോള്‍ ഷെറിന് അബദ്ധം പറ്റി, വാട്‌സാപ്പ് സന്ദേശം പുറത്ത്

നടി അര്‍ച്ചന പദ്മിനി ഉയര്‍ത്തിയ ഗുരുതര ആരോപണം പ്രൊഡക്ഷന്‍ കണ്‍ട്രോളര്‍ ബാദുഷ ശെരിവെയ്ക്കുന്ന വാട്‌സാപ്പ് സന്ദേശം പുറത്ത്. പുള്ളിക്കാരന്‍ സ്റ്റാറാ എന്ന മമ്മുട്ടി ചിത്രത്തിന്റെ ലൊക്കേഷനില്‍ വെച്ച് പ്രൊഡക്ഷന്‍ എക്‌സിക്യൂട്ടീവായ ഷെറിന്‍ സ്റ്റാന്‍ലി മോശമായി പെരുമാറിയെന്നാണ് അര്‍ച്ചന പദ്മിനി ഡബ്ല്യൂസിസി പത്രസമ്മേളനത്തില്‍ വെളിപ്പെടുത്തിയത്. ഇയാള്‍ക്കെതിരെ ഫെഫ്കയില്‍ പരാതി നല്‍കിയെങ്കിലും നടപടികള്‍ ഉണ്ടായില്ലെന്നും, ഷെറിന്‍ സ്റ്റാന്‍ലി സിനിമയില്‍ സജീവമാണെന്നുമായിരുന്നു അര്‍ച്ചന തുറന്നടിച്ചത്. എന്നാല്‍ നടപടി സ്വീകരിച്ചില്ലെന്ന ആരോപണം തള്ളി ഫെഫ്ക ജനറല്‍ സെക്രട്ടറി ബി. ഉണ്ണിക്കൃഷ്ണന്‍ രംഗത്തെത്തിയിരുന്നു.

ഇതിനു പിന്നാലെയാണ് സിനിമാസംഘടനകളുടെ ഗ്രൂപ്പില്‍ ഇട്ട ബാദുഷയുടെ ശബ്ദസന്ദേശം പുറത്തായത്. ഇതില്‍ നടി ഷെറിന്‍ സ്റ്റാന്‍ലിക്കെതിരെ ഉയര്‍ത്തിയ ആരോപണം ബാദുഷ ശെരിവെയ്ക്കുന്നുണ്ട്. നടിയില്‍ നിന്ന് പലപ്പോഴായി പ്രലോഭനം ഉണ്ടായപ്പോള്‍ ഷെറിന് അബദ്ധം പറ്റിയെന്ന രീതിയില്‍ നടിയെ അപമാനിക്കുന്ന തരത്തിലാണ് ബാദുഷയുടെ വിശദീകരണം. ഷെറിന്‍ സ്റ്റാന്‍ലി തന്റെയൊപ്പം നിലവില്‍ ജോലി ചെയ്യുന്നുണ്ടെന്നും ബാദുഷ സന്ദേശത്തില്‍ പറയുന്നു. എന്നാല്‍ നടിയുടെ പരാതി കിട്ടിയ ഉടനെ ഷെറിനെതിരെ നടപടി സ്വീകരിച്ചുവെന്നും ഇയാള്‍ സസ്‌പെന്‍ഷനിലാണെന്നുമായിരുന്നു ഫെഫ്ക ജനറല്‍ സെക്രട്ടറി ബി. ഉണ്ണിക്കൃഷ്ണന്റെ വാദം. ഷെറിന്‍ സിനിമയില്‍ തന്റെയൊപ്പം വര്‍ക്കുചെയ്യുന്നുവെന്ന ബാദുഷയുടെ വെളിപ്പെടുത്തലോടെ ഫെഫ്കയുടെ വാദവും പൊളിയുകയാണ്. അടുത്തിടെ ഇറങ്ങിയ കുട്ടനാടന്‍ മാര്‍പ്പാപ്പ ഉള്‍പ്പെടെയുള്ള സിനിമയില്‍ ഷെറിന്‍ സ്റ്റാന്‍ലി വര്‍ക്ക് ചെയ്തിരുന്നുവെന്ന് ബാദുഷ ശബ്ദ സന്ദേശത്തില്‍ പറയുന്നുണ്ട്.

താരസംഘടനയായ അമ്മയ്‌ക്കെതിരെ വനിതാ കൂട്ടായ്മയായ ഡബ്ല്യൂസിസി( വിമന്‍ ഇന്‍ സിനിമ കളക്ടീവ്) നടത്തിയ വിമര്‍ശനശരങ്ങള്‍ക്കിടെയാണ് ഷൂട്ടിങ്ങ് ലൊക്കേഷനില്‍ നിന്ന് തനിക്ക് നേരിട്ട ദുരനുഭവം നടി അര്‍ച്ചന പദ്മിനി വെളിപ്പെടുത്തിയത്. സംഭവത്തില്‍ ഫെഫ്കയ്ക്ക് പരാതി നല്‍കിയെങ്കിലും അയാള്‍ ഇപ്പോഴും സിനിമയില്‍ സജീവമാണെന്നും അര്‍ച്ചന തുറന്നടിച്ചിരുന്നു.

Join WhatsApp News
മലയാളത്തില്‍ ടൈപ്പ് ചെയ്യാന്‍ ഇവിടെ ക്ലിക്ക് ചെയ്യുക