മണ്ഡല മകരവിളക്ക് തീര്ഥാടനകാലത്ത് ശബരിമലയും പരിസര പ്രദേശങ്ങളും ആറ് മേഖലകളായി തിരിച്ച് നാല് ഘട്ടങ്ങളായി സുരക്ഷാസംവിധാനം ഏര്പ്പെടുത്തിയതായി സംസ്ഥാന പൊലീസ് മേധാവി ലോകനാഥ് ബെഹറ. ഉന്നത ഉദ്യോഗസ്ഥര് കൂടാതെ 15,259 പൊലീസ് ഉദ്യോഗസ്ഥരെയാണ് നിയോഗിച്ചിട്ടുളളതെന്നും അദ്ദേഹം വ്യക്തമാക്കി.
നാല് ഘട്ടങ്ങളുള്ള ഈ സീസണില് എസ്.പി, എ.എസ്.പി തലത്തില് 55 ഉദ്യോഗസ്ഥര് സുരക്ഷാ ചുമതലകള്ക്കായി ഉണ്ടാകും. ഡിവൈ.എസ്.പി തലത്തില് 113 പേരും ഇന്സ്പെക്ടര് തലത്തില് 359 പേരും എസ്.ഐ തലത്തില് 1,450 പേരുമാണ് ഇക്കാലയളവില് ഡ്യൂട്ടിയിലുണ്ടാവുക.
12,562 സീനിയര് സിവില് പൊലീസ് ഓഫീസര്, സിവില് പൊലീസ് ഓഫീസര് എന്നിവരെയും വനിത സി.ഐ, എസ്.ഐ തലത്തിലുളള 60 പേരെയും 860 വനിതാ സീനിയര് സിവില് പൊലീസ് ഓഫീസര്/ സിവില് പൊലീസ് ഓഫീസര്മാരെയും നിയോഗിച്ചിട്ടുണ്ട്.
നവംബര് 15 മുതല് 30 വരെയുളള ഒന്നാം ഘട്ടത്തില് 3,450 പൊലീസ് ഉദ്യോഗസ്ഥരെ വിന്യസിച്ചിട്ടുണ്ട്. ഇവരില് 230 പേര് വനിതാ പൊലീസ് ഉദ്യോഗസ്ഥരാണ്. എസ്.ഐ തലത്തില് 349 പേരും സി.ഐ തലത്തില് 82 പേരും ഡിവൈ.എസ്.പി തലത്തില് 24 പേരും ഡ്യൂട്ടിയിലുണ്ടാകും.
ഒരു സബ് ഇന്സ്പെക്ടറുടെ നേതൃത്വത്തില് 20 അംഗങ്ങളുളള കേരള പൊലീസ് കമാന്ഡോ സംഘത്തെ സന്നിധാനത്ത് ഡ്യൂട്ടിക്കായി നിയോഗിച്ചിട്ടുണ്ട്. 20 അംഗങ്ങളുളള മറ്റൊരു കമാന്ഡോ സംഘം പമ്പയിലുണ്ടാകും. കൂടാതെ ഏത് സാഹചര്യവും നേരിടുന്നതിനായി തണ്ടര് ബോള്ട്ടിന്റെ ഒരു പ്ലാറ്റൂണിനെ മണിയാറില് സജ്ജമാക്കി നിര്ത്തിയിട്ടുണ്ട്. ബോംബുകള് കണ്ടെത്തി നിര്വീര്യമാക്കുന്ന കേരള പൊലീസിന്റെ 234 പേരടങ്ങുന്ന പ്രത്യേക സംഘത്തെയും പമ്പയിലും സന്നിധാനത്തും വിന്യസിച്ചിട്ടുണ്ട്.