Image

വാദത്തിനായി കൂടുതല്‍ സമയം വേണം; ദിലീപിന്റെ ഹര്‍ജി പരിഗണിക്കുന്നത്‌ 23ലേയ്‌ക്ക്‌ മാറ്റി

Published on 12 December, 2018
വാദത്തിനായി കൂടുതല്‍ സമയം വേണം; ദിലീപിന്റെ ഹര്‍ജി പരിഗണിക്കുന്നത്‌   23ലേയ്‌ക്ക്‌ മാറ്റി
ന്യൂഡല്‍ഹി: ദിലീപിന്റെ ഹര്‍ജി പരിഗണിക്കുന്നത്‌ കോടതി 23ലേയ്‌ക്ക്‌ മാറ്റി. വാദത്തിനായി കൂടുതല്‍ സമയം വേണമെന്ന ദിലീപിന്റെ ആവശ്യം കോടതി അംഗീകരിക്കുകയായിരുന്നു.

നടിയെ ആക്രമിച്ച കേസിലെ പ്രധാന തെളിവായ വീഡിയോ ദൃശ്യങ്ങളുടെ പകര്‍പ്പ്‌ ആവശ്യപ്പെട്ട്‌ നടന്‍ ദിലീപ്‌ നല്‍കിയ ഹര്‍ജി ഇന്ന്‌ സുപ്രീം കോടതി പരിഗണിക്കുമെന്നായിരുന്നു അറിയിച്ചിരുന്നത്‌.

വിചാരണ കോടതിയും ഹൈക്കോടതിയും ഈ ആവശ്യം തള്ളിയതിനെ തുടര്‍ന്നാണ്‌ ദിലീപ്‌ സുപ്രീം കോടതിയിലെത്തിയത്‌.

നടിയെ ആക്രമിച്ച കേസില്‍ നിരപരാധിത്വം തെളിയിക്കാന്‍ വീഡിയോയിലെ സംഭാഷണങ്ങള്‍ ഉപകരിക്കും എന്നാണ്‌ ദിലീപിന്റെ വാദം. കോടതിയില്‍ സമര്‍പ്പിച്ച ദൃശ്യങ്ങളില്‍ എഡിറ്റിങ്‌ നടന്നിട്ടുണ്ടെന്നും ദിലീപ്‌ വാദിക്കുന്നു.

കഴിഞ്ഞ തവണ വാദം കേട്ട കോടതി ഐടി ആക്‌റ്റ്‌ അടക്കമുള്ള നിയമങ്ങള്‍ പ്രകാരം മെമ്മറി കാര്‍ഡ്‌ ലഭിക്കാന്‍ പ്രതിക്ക്‌ അവകാശം ഉണ്ടോയെന്ന്‌ ബോധ്യപ്പെടുത്താന്‍ ദിലീപിന്റെ അഭിഭാഷകന്‌ നിര്‍ദ്ദേശം നല്‍കിയിട്ടുണ്ട്‌.

മെമ്മറി കാര്‍ഡിലെ ദൃശ്യങ്ങള്‍ എഡിറ്റ്‌ ചെയ്‌തതാണെന്ന വിചാരണക്കോടതിയിലേയും ഹൈക്കോടതിയിലേയും വാദങ്ങള്‍ ദിലീപ്‌ സുപ്രീംകോടതിയിലും ഉന്നയിച്ചിട്ടുണ്ട്‌.

Join WhatsApp News
മലയാളത്തില്‍ ടൈപ്പ് ചെയ്യാന്‍ ഇവിടെ ക്ലിക്ക് ചെയ്യുക