തിരുവനന്തപുരം: ഉമ്മന്‍ചാണ്ടി സര്‍ക്കാറിന്റെ കൂട്ടുത്തരവാദിത്തം തകര്‍ന്നുവെന്ന് പ്രതിപക്ഷ നേതാവ് വി.എസ് അച്യുതാനന്ദന്‍. സത്യപ്രതിജ്ഞാവേളയില്‍ ആര്യാടന്‍ മുഹമ്മദ് നടത്തിയ പരസ്യ പ്രഖ്യാപനവും അദ്ദേഹം മന്ത്രിസഭാ യോഗം ബഹിഷ്കരിച്ചതും കൂട്ടുത്തരവാദിത്തം നഷ്ടമായതിന്റെ പരസ്യപ്രഖ്യാപനമാണെന്നും ആര്യാടന്റെ പേരെടുത്ത് പരാമര്‍ശിക്കാതെ വി.എസ്  കുറ്റപ്പെടുത്തി.

മന്ത്രിമാരുടെ എണ്ണം നിയമ സഭാംഗങ്ങളുടെ പതിനഞ്ച് ശതമാനത്തില്‍ കൂടരുത് എന്ന ചട്ടം ലംഘിക്കപ്പെട്ടിരിക്കുകയാണ്. ചീഫ് വിപ്പ് ഉള്‍പ്പെടെ 22 പേര്‍ക്ക് മന്ത്രി പദവി നല്‍കിയിരിക്കുകയാണ്. ഇത് കേരളത്തിന്റെ ചരിത്രത്തില്‍ ആദ്യമാണ്. യു.ഡി.എഫ് സര്‍ക്കാര്‍ പൊതുഖജനാവ് ധൂര്‍ത്തടിക്കുകയണെന്നും വി.എസ് പ്രസ്താവനയില്‍ കുറ്റപ്പെടുത്തി.

സാമുദായിക ധ്രുവീകരണത്തിന് കൂട്ടു നില്‍ക്കുന്ന നടപടികളാണ് യൂ.ഡി.എഫ് സര്‍ക്കാര്‍ സ്വീകരിക്കുന്നതെന്നും ശെല്‍വരാജിനെ നെയ്യാറ്റിന്‍കരയില്‍ സ്ഥാനാര്‍ഥിയാക്കാനുള്ള തീരുമാനം സാമുദായി രാഷ്ട്രീയത്തിന് കീഴടങ്ങലാണെന്നും വി.എസ് ആരോപിച്ചു.

കൊല്ലം: മുസ്ലിം ലീഗിന് അഞ്ചാം മന്ത്രിസ്ഥാനം നല്‍കിയ നടപടി ആത്മഹത്യാപരമാണെന്ന് എസ്.എന്‍.ഡി.പി യോഗം ജനറല്‍ സെക്രട്ടറി വെള്ളാപ്പള്ളി നടേശന്‍. സാമുദായിക സന്തുലനം ഉണ്ടായില്ലെങ്കില്‍ സാമുദായിക കലഹമുണ്ടാവും. കോണ്‍ഗ്രസിന്റെത് തറകളിയാണെന്നും വെള്ളാപ്പള്ളി കുറ്റപ്പെടുത്തി.

 വകുപ്പ് മാറ്റിയത് കൊണ്ട് കാര്യമില്ല. തൊഴുത്തുമാറ്റിക്കെട്ടിയാല്‍ മച്ചിപ്പശു പ്രസവിക്കുമോ? വെള്ളാപ്പള്ളി ചോദിച്ചു. നെയ്യാറ്റിന്‍കരയില്‍ ഇത് പ്രതിഫലിക്കുമെന്നും അദ്ദേഹം പറഞ്ഞു.