തിരുവനന്തപുരം: എന്ഡോസള്ഫാന് ദുരിതബാധിതരുടെ സമരത്തിനെതിരെ വിമര്ശനവുമായി ആരോഗ്യമന്ത്രി. കുട്ടികളെ പ്രദര്ശിപ്പിച്ചുള്ള സമരരീതി ശരിയല്ല . സമരക്കാരുടെ ആവശ്യങ്ങള് സര്ക്കാര് അംഗീകരിച്ചതാണെന്നും ആരോഗ്യമന്ത്രി കെ കെ ശൈലജ തിരുവനന്തപുരത്ത് പറഞ്ഞു. ആയുഷ്മാന് ഭാരത് പദ്ധതിയുമായി ബന്ധപ്പെട്ട് പ്രധാനമന്ത്രി ഗുണഭോക്താക്കള്ക്ക് തിടുക്കപ്പെട്ട് കത്തയച്ചത് ശരിയായില്ലെന്ന് കെ കെ ശൈലജ പറഞ്ഞു.
അതേസമയം സെക്രട്ടേറിയേറ്റിനുമുന്നിലെ എന്ഡോസള്ഫാന് ദുരിതബാധിതരുടെ കുടുംബത്തിന്റെ സമരം നാല് ദിവസം പിന്നിട്ടു.അര്ഹരെ പട്ടികയില്പ്പെടുത്തുന്നതില് തീരുമാനമാകാതെ സമരത്തില് നിന്ന് പിന്നോട്ടില്ലെന്ന നിലപാടില് ഉറച്ച് നില്ക്കുകയാണ് സമരസമിതി. ഇന്നലെ സര്ക്കാര് വിളിച്ച ചര്ച്ച പരാജയപ്പെട്ട സാഹചര്യത്തില് സമരം ശക്തമാക്കാനാണ് സമരസമിതിയുടെ തീരുമാനം.
നാളെ മുഖ്യമന്ത്രിയുടെ ഔദ്യോഗിക വസതിയിലേക്ക് സങ്കടയാത്ര നടത്തും. അര്ഹരായ മുഴുവന് പേരെയും ഇരകളുടെ പട്ടികയില് ഉള്പ്പെടുത്തണമെന്നാണ് ആവശ്യം. എന്ഡോസള്ഫാന് ബാധിതരായ ഒന്പത് കുട്ടികളും അവരുടെ രക്ഷിതാക്കളും അടക്കം മുപ്പതംഗ സംഘമാണ് തലസ്ഥാനത്ത് സമരം നടത്തുന്നത്. തുടര്ന്നുള്ള ദിവസങ്ങളില് കൂടുതല് അമ്മമാര് സമരത്തിനെത്തുമെന്നാണ് സമരസമിതി വ്യക്തമാക്കുന്നത്.