കളിപ്പാവകളല്ലോ നമ്മളേവരും, ആരോ
കളിപ്പിക്കുന്നു നമ്മെയജ്ഞാത ഹസ്തങ്ങളാല് !
ചരടില് കൊരുത്തൊരു പാവപോല് കരുതുന്നു
ചലിപ്പിക്കുന്നു തന്റെ ഇംഗിതാനുസരണം!
രൂപമോ, ശരീരമോ മാറ്റുവാനാവാതല്ലൊ
കൂപമണ്ഡൂകം പോലെ കഴിയുന്നെല്ലാവരും!
സ്വാതന്ത്ര്യമില്ലാ തെല്ലു മൊന്നിനും കഴിവില്ല
താതന്റെ നിര്ദ്ദേശത്തിനൊത്തു നാം ചലിക്കുന്നു!
യൗവ്വനം വിടാതെയും വാര്ദ്ധക്യം വരാതെയു
മുര്വ്വിയില് കഴിയുവാ നാവുകില്ലൊരുത്തര്ക്കും!
മരണമില്ലാതാക്കാന് രോഗങ്ങളില്ലാതാക്കാന്
മറക്കാന് ഭൂതം ദുഃഖ മൊന്നിനുമാവുകില്ല!
ശ്രവണം നശിക്കാതെ, കാഴ്ചയേ കുറയാതെ,
ആയുസ്സു കുറയ്ക്കാനും കൂട്ടാനും കഴിയുമോ?
പ്രളയം, ഭൂകമ്പവും, ശൈത്യവുമത്യുഷ്ണവും
പ്രകൃതി ക്ഷോഭങ്ങളും നിര്ത്തുവാന് കഴിയുമോ?
ഒന്നിനും സ്വയമാവില്ലെങ്കിലുമത്യുച്ചത്തില്
എന്തിനു മര്ത്ത്യാ, സദാ, വീമ്പടിക്കുന്നു താങ്കള്?
കളിയല്ലെല്ലാവരുമോര്ത്തിരിയ്ക്കണം നൂനം,
കളിപ്പാവകള് മാത്രം നമ്മളെന്നൊരാ സത്യം!