തൃശൂര്: തേക്കിന്കാട് മൈതാനത്തെ മാലിന്യങ്ങള് കോര്പറേഷന് അധികൃതരുടെ നേതൃത്വത്തില് പൂര്ണമായും നീക്കം ചെയ്യുമെന്നു കൃഷിമന്ത്രി വി.എസ്. സുനില്കുമാര് അറിയിച്ചു. വര്ഷങ്ങളായി തൃശൂര് കോര്പറേഷന്റെ ശുചീകരണ തൊഴിലാളികളാണ് പൂരപ്പിറ്റേന്നു മാലിന്യങ്ങള് നീക്കം ചെയ്ത് തേക്കിന്കാട് മൈതാനവും തൃശൂര് നഗരവും ശുചീകരിക്കുന്നത് . എന്നാല്, ഇത്തവണ പൂരപ്പിറ്റേന്നത്തെ ശുചീകരണവുമായി ബന്ധപ്പെട്ടുണ്ടായ ചില തര്ക്കങ്ങള് മൂലം മാലിന്യ സംസ്കരണ പ്രവര്ത്തനങ്ങള് നീണ്ടുപോയി. മാലിന്യങ്ങള് സംസ്കരിക്കുന്നതിന്റെ ഭാഗമായി ഇന്നലെ കൃഷി മന്ത്രി, തൃശൂര് കോര്പറേഷന് മേയര് അജിത വിജയന്, ഡിപിസി അംഗം വര്ഗീസ് കണ്ടംകുളത്തി എന്നിവരുമായി നടത്തിയ ചര്ച്ചയുടെ അടിസ്ഥാനത്തിലാണ് മാലിന്യങ്ങള് പൂര്ണമായി സംസ്കരിക്കുന്നതിനു തീരുമാനമെടുത്തത്.