അറ്റ്ലാന്റ: ബിരുദദാന ചടങ്ങില് പ്രസംഗിക്കാനും ഓണററി ഡോക്ടറേറ്റ് സ്വീകരിക്കാനും എത്തിയ ബില്യനര് റോബര്ട്ട് എഫ് സ്മിത്തിന്റെ പ്രഖ്യാപനം മോര് ഹൗസ് കോളജിലെ 400-ല് പരം ഗ്രാഡുവേറ്റുകള്ക്ക് ഞെട്ടലായി. അവരുടെയെല്ലാം സ്റ്റുഡന്റ് ലോണ് താന് കൊടുത്തു തീര്ക്കുമെന്നായിരുന്നു ആഫ്രിക്കന് അമേരിക്കനായ സ്മിത്തിന്റെ പ്രഖ്യാപനം.
ആഫ്രിക്കന് അമേരിക്കക്കാരാണു കോളജിലെ ഭൂരിപക്ഷം വിദ്യാര്ഥികള്. പ്രഖ്യാപനം കേട്ട് പലരും കരഞ്ഞു. ലോണ് തീര്ക്കാന് ഏകദേശം നാലു മില്യന് വേണ്ടി വരും.
ഏകദേശം 4.4 ബില്യന് ഡോളര് ആസ്തിയാണ് റോബര്ട്ടിനുള്ളത്. കോര്ണല്, കൊളംബിയ സര്വകലാശാലകളില്നിന്ന് പഠനം പൂര്ത്തിയാക്കിയ റോബര്ട്ട്, രണ്ടായിരത്തില് വിസ്റ്റാ ഇക്വിറ്റി പാര്ട്ണേഴ്സ് എന്ന സ്ഥാപനം ആരംഭിച്ചു. 2015-ഓടെ ഏറ്റവും ധനികനായ ആഫ്രിക്കന്- അമേരിക്കനായി അദ്ദേഹം മാറിയതായി ഫോര്ബ്സ് മാസിക പറയുന്നു.
നേരത്തെ ഒന്നര മില്യന് ഡോളറിന്റെ സഹായം മോര്ഹൗസ് കോളേജിന് റോബര്ട്ട് വാഗ്ദാനം ചെയ്തിരുന്നു. റോബര്ട്ടിന്റെ പ്രവൃത്തിയെ സ്കൂളിന്റെ ചരിത്രത്തിലെ തന്നെ ഏറ്റവും വലിയ സമ്മാനമെന്നാണ് സ്കൂള് അധികൃതര് വിശേഷിപ്പിച്ചത്.
മാര്ട്ടിന് ലൂതര് കിങ്ങ് ജൂനിയര്, സിനിമാ സംവിധായകന് സ്പൈക്ക് ലീ, നടന് സാമുവേല് എല് ജാക്ക്സണ് തുടങ്ങിയവര് മോര്ഹൗസ് കോളേജിലെ പൂര്വവിദ്യാര്ഥികളാണ്.