അനില്‍ അംബാനിയുടെ ആര്‍കോം നഷ്ടത്തില്‍ നിന്നും നഷ്ടത്തിലേക്ക് തകര്‍ന്നടിയുകയാണ് എന്ന് റിപ്പോര്‍ട്ട്. രാജ്യത്തെ മുന്‍നിര ടെലികോം സേവനദാതാക്കളായിരുന്ന ആര്‍കോമിന്റെ ഭൂരിഭാഗം സര്‍വീസുകളും നിര്‍ത്തിയിട്ടും ഇപ്പോഴും ഭീമന്‍ നഷ്ടം തുടരുകയാണ്.

കഴിഞ്ഞ സാമ്പത്തിക വര്‍ഷത്തിലെ നാലാം പാദത്തില്‍ കമ്പനിയുടെ നഷ്ടം 7767 കോടി രൂപയിലെത്തി. 50,000 കോടി രൂപയാണ് വിവിധ ബാങ്കുകള്‍ക്കായി അനില്‍ അംബാനി നല്‍കാനുളളത്. എന്നാല്‍ 50,000 കോടി രൂപയല്ല 90,000 കോടി രൂപയുടെ കടമുണ്ടെന്ന റിപ്പോര്‍ട്ടുകളും അടുത്തിടെ പുറത്തുവന്നിരുന്നു. പാപ്പരത്ത നടപടിക്ക് വിധേയമായിട്ടുള്ള കമ്പനി നല്‍കാനുള്ള കോടികളുടെ കണക്കുകള്‍ ആര്‍കോം ഓഹരികള്‍ക്കും വന്‍ തിരിച്ചടിയായി.

രാജ്യത്തിനകത്തും പുറത്തുമുള്ള ബാങ്കുകളും ടെലികോം മന്ത്രാലയവും മൊബൈല്‍ ഫോണ്‍ കമ്പനികളും ടെലികോം ടവര്‍ കമ്പനികളും കോടികളുടെ കടം തിരിച്ചുപിടിക്കാന്‍ ആര്‍ബിഎസ്എ അഡൈ്വസേഴ്‌സ് എല്‍എല്‍പിയോടു ആവശ്യപ്പെട്ടിരുന്നു.