തിരുവനന്തപുരം: ബാലഭാസ്‌കറിന്റെ പിതാവ്‌ ഉണ്ണിയെ ഭാര്യാ വീട്ടുകാര്‍ ഇറക്കിവിട്ടു. ബാലുവിന്റെ മരണശേഷം മരുമകള്‍ ലക്ഷ്‌മിയുടെ വീട്ടിലെത്തിയ തന്നോട്‌ മോശമായി പെരുമാറുകയും വീട്ടില്‍ നിന്ന്‌ ഇറങ്ങിപ്പോകാന്‍ ആവശ്യപ്പെടുകയുമായിരുന്നുവെന്ന്‌ ഉണ്ണി ബിഗ്‌ ന്യൂസിനോടു പറഞ്ഞു.

സ്വര്‍ണക്കടത്ത്‌ കേസില്‍ പിടിയിലായ ബാലുവിന്റെ പ്രോഗ്രാം മാനേജര്‍ പ്രകാശ്‌ തമ്‌ബിയും ഇതേകേസില്‍ ഒളിവില്‍ കഴിയുന്ന ഫിനാന്‍സ്‌ മാനേജര്‍ വിഷ്‌ണുവും ചേര്‍ന്നു നടത്തിയ നാടകത്തിന്റെ ഫലമായിരുന്നു തന്നെ ഇറക്കിവിട്ടതെന്ന്‌ അദ്ദേഹം വ്യക്തമാക്കി.

ലക്ഷ്‌മിയെ കുറിച്ച്‌ അപവാദങ്ങള്‍ പരത്തുകയാണെന്നും ആ കുടുംബത്തെ നശിപ്പിക്കാനുള്ള ശ്രമം നടക്കുകയാണെന്നും ഇരുവരും ലക്ഷ്‌മിയുടെ വീട്ടുകാരെ ധരിപ്പിച്ചു. ഇതിന്റെ വസ്‌തുത എന്തെന്നു മനസിലാക്കാന്‍ നില്‍ക്കാതെ തന്നോട്‌ ഇറങ്ങിപ്പോകാന്‍ പറയുകയായിരുന്നുവെന്നും ഉണ്ണി പറയുന്നു. വിഷ്‌ണുവും തമ്‌ബിയുമാണ്‌ ഇക്കാര്യം തങ്ങളോട്‌ പറഞ്ഞതെന്ന്‌ ലക്ഷ്‌മിയുടെ മാതാവ്‌ പറഞ്ഞതായി ഉണ്ണി വ്യക്തമാക്കി.



എന്നാല്‍ ഡ്രൈവറെക്കൊണ്ട്‌ മൊഴി മാറ്റിപ്പറയിച്ചു. ബാലുവാണ്‌ വണ്ടി ഓടിച്ചതെന്നായിരുന്നു പറഞ്ഞത്‌. അത്‌ പച്ച കള്ളമാണ്‌. ബാലുവാണ്‌ വണ്ടി ഓടിച്ചതെന്ന്‌ തെളിയിക്കാന്‍ പ്രകാശ്‌ തമ്‌ബിയും സുനില്‍കുമാറും ചേര്‍ന്ന്‌ മറ്റൊരാളെക്കൊണ്ട്‌ മൊഴി കൊടുപ്പിച്ചിട്ടുണ്ട്‌. കെഎസ്‌ആര്‍ടിസിയിലെ ഒരു കണ്ടക്ടറാണ്‌ മൊഴി നല്‍കിയത്‌. സുനില്‍കുമാറിന്റെ ഉറ്റ സുഹൃത്താണ്‌ അയാള്‍. വാഹനം ഓടിച്ചത്‌ അയാള്‍ കണ്ടിട്ടുണ്ടോ എന്നുപോലും അറിയില്ലെന്ന്‌ ഉണ്ണി പറഞ്ഞു.

ഞങ്ങള്‍ ആ സമയം ബാലുവിന്റെ ജീവന്‍ രക്ഷിക്കാനുള്ള നെട്ടോട്ടത്തിലായിരുന്നു. ഈ അവസരം മുതലാക്കി വിഷ്‌ണുവും തമ്‌ബിയും ചേര്‍ന്ന്‌ സിസി ടിവി ദൃശ്യങ്ങള്‍ ഉള്‍പ്പെടെയുള്ള തെളിവുകള്‍ നശിപ്പിക്കുന്ന തിരക്കിലായിരുന്നുവെന്നും അദ്ദേഹം ആരോപിച്ചു.