Image

ഓര്‍മ്മപ്പീലികള്‍ (ഡോ.ആശാ അരവിന്ദ്)

Published on 08 September, 2019
ഓര്‍മ്മപ്പീലികള്‍ (ഡോ.ആശാ അരവിന്ദ്)
ദിവസമൊടുങ്ങുമ്പോള്‍..
പഴയൊരോര്‍മ സഞ്ചിയുമായി
നടക്കാനിറങ്ങണം..

എല്ലാവരുടേതുമായ വിളര്‍ത്ത
ചരല്‍പ്പാതയില്‍ ഒറ്റയ്ക്കായതിന്റെ
സ്വാതന്ത്ര്യം,
പുതു ഭാഷയിലൊരു
പാട്ടു പാടി പറത്തണം..

ഇരുട്ട് കനക്കുന്ന കാട്ടിലൂടെ
തടാകത്തെ തഴുകി വന്ന കാറ്റിനെ തൊട്ടു,
പൊഴിഞ്ഞുവീണ തൂവലുകള്‍
തേടണം; കണ്ണ് ചിമ്മാതെ..

കരിം പച്ചിലയിളക്കങ്ങളോട് കൂട്ടു കൂടി
ആരുമില്ലായ്മകളെ അലിയിച്ചെടുക്കണം
മുള്‍പ്പടര്‍പ്പിലൊളിച്ച
മന്ദഹാസങ്ങളെ നോക്കിച്ചിരിക്കണം..

കാലമറിയാതെയാകുന്ന കാലത്തിലേക്കായി
ഓര്‍മ്മപ്പീലികള്‍ സഞ്ചിയിലിടണം..
അനുതാപമറിയാത്ത ആള്‍ക്കൂട്ടത്തെയൊഴിഞ്ഞു ,
വേറിട്ടൊരു വഴി തിരഞ്ഞേ പോകണം..
Join WhatsApp News
മലയാളത്തില്‍ ടൈപ്പ് ചെയ്യാന്‍ ഇവിടെ ക്ലിക്ക് ചെയ്യുക