കര്ണാല്: തീവ്രവാദത്തിനെതിരെ പോരാടണമെന്ന് പാകിസ്താന് ഗൗരവമായി ആലോചിക്കുന്നുണ്ടെങ്കില് അതിനായി ഇന്ത്യന് സൈന്യത്തെ പാകിസ്താനിലേയ്ക്ക് അയയ്ക്കാന് തയ്യാറാണെന്ന് കേന്ദ്ര പ്രതിരോധ മന്ത്രി രാജ്നാഥ് സിങ്. ഹരിയാണയിലെ കര്ണാലില് തിരഞ്ഞെടുപ്പ് റാലിയില് പ്രസംഗിക്കുകയായിരുന്നു രാജ്നാഥ് സിങ്.
ഇമ്രാന് ഖാനുമുന്നില് ഒരു നിര്ദേശം വയ്ക്കാന് ആഗ്രഹിക്കുകയാണ്. തീവ്രവാദത്തിനെതിരെ പോരാടുന്നതിനെ ഗൗരവമായി കാണുന്നുണ്ടെങ്കില് വേണ്ട സഹായം നല്കാന് ഞങ്ങള് തയ്യാറാണ്. ഇന്ത്യന് സൈന്യത്തിന്റെ സഹായം ആവശ്യമാണെങ്കില് അതും നല്കും, രാജ്നാഥ് സിങ് പറഞ്ഞു.