മലയാളിയുടെ അരി ആഹാരം, അങ്കിള് ബെന്സ്, ആന്റ് ജെമാമ, മിസ്സസ് ബട്ടര്വര്ത്ത്, തുടങ്ങിയ ബ്രാന്ഡ് നെയ്മുകള് അമേരിക്കന് ജീവിതത്തിന്റെ ഭാഗമായിട്ട് നിരവധി ദശാബ്ദങ്ങള് കഴിഞ്ഞു.
കുട്ടിക്കാലം മുതല്ക്കേ അറിഞ്ഞും പറഞ്ഞും, കണ്ടും കേട്ടുമൊക്കെ ഓരോരോ ബ്രാന്ഡുകളോട് പ്രിയമേറിവന്നതാണ്. പൊതിഞ്ഞു കെട്ടി വരുന്ന ബാഗിന്റെയും ബോക്സിന്റേയുമൊക്കെ പുറത്തുള്ള ചിത്രങ്ങളും വാക്കുകളും കണ്ടു അവയോടൊക്കെ പ്രത്യേക അടുപ്പവും ഇഷ്ടവും കൂടി. അവ നിത്യ ജീവിതത്തിന്റെ ഭാഗമായി. ഇക്കാലമത്രയും ഈ ബ്രാന്ഡുകളുടെ വംശീയതയെക്കുറിച്ചു ആരും പറഞ്ഞുമില്ല, ചിന്തിച്ചുമില്ല. ആ കാലം മാറി.
പേരുകളും ചിത്രങ്ങളും പ്രതിമയും വംശീയച്ചുവയുടെ ഭൂതക്കണ്ണാടിയില് നോക്കിക്കാണുന്ന പുതിയ കാലം. വംശീയ ചുവയുള്ള പേരുകള്ക്കു ഉടമകള് ഇല്ലാതെ വരുന്ന കാലം. പല ബ്രാന്ഡുകളും വംശീയ വിദ്വേഷത്തിന്റെ ചവറ്റുകൊട്ടയിയിലേക്ക് എറിയപ്പെട്ടാല് ലേശം പോലും അതിശയിക്കേണ്ടതില്ല. ബ്രാന്ഡ് നെയിം ഭക്ഷണപദാര്ഥങ്ങള്ക്കു പോലും ഇനി രക്ഷയില്ല. ലോഗോയും,
ചിഹ്നങ്ങളും പ്രതീകങ്ങളും പുനര് വിചിന്തനത്തിന്റെ തടവറകളില് അടക്കപ്പെടുന്നു. പ്രതീകാത്മകമായുള്ള പരസ്യഘടകങ്ങളും, ഘടനയും എല്ലാമെല്ലാം അടിമുതല് മുടി വരെ സസൂക്ഷ്മം നിരീക്ഷണം ചെയ്യപ്പെടുന്നു. പരസ്യങ്ങളില് ആകൃഷ്ടരായി വാങ്ങുന്ന ഈ വക ഭക്ഷണ സാധനങ്ങള് ദിനംപ്രതി കഴിക്കുന്ന കുട്ടികള് ബോക്സിന്റെ കവറില് വരുന്ന മാറ്റങ്ങള് കണ്ടു ഭക്ഷണം കഴിക്കാന് വിസമ്മതിച്ചാല് കുടുംബത്തില് തന്നെയാവും വിപ്ലവം നടക്കുക.
പ്രതീകങ്ങളും ചിഹ്നങ്ങളും അടയാളങ്ങളുമെല്ലാം, പല കാരണങ്ങളാല്, സമര്ത്ഥിക്കുവാന് ഏറെ ബുദ്ധിമുട്ടുണ്ടെങ്കില് കൂടി, ആരോ പറഞ്ഞതുപോലെ 'വെറുക്കപ്പെടേണ്ട' നാമധാരികളായി മാറുന്നുവെങ്കില്, അതിന് ആരെയാണ് പഴിക്കേണ്ടത്? ആഹാര പദാര്ത്ഥങ്ങള് മാര്ക്കെറ്റിങ്ങിനു വേണ്ടി മനോഹരമായ ബോക്സുകളിലും ബാഗുകളിലും പായ്ക്ക് ചെയ്യുമ്പോള് ലോഗോയും, ട്രേഡ്മാര്ക്കും, പാക്കിങ്ങ് കവറിലെ നിറവും പടവും ആകൃതിയുമൊക്കെ വംശീയ ചുവയുള്ളതായി വ്യാഖ്യാനിക്കപ്പെട്ടാല് ഒരു പക്ഷെ കമ്പനി പോലും പൂട്ടേണ്ടി വരും. ഇപ്പോഴത്തെ നാട്ടുനടപ്പ് ആ വഴിയിലൂടെയാണ്.
ആന്റ് ജെമാമ എടുക്കാം: ക്വേക്കര് ഓട്ട്സിന്റെ ഉടമസ്ഥതയിലുള്ള പാന് കേക്ക് സിറപ്പ് കമ്പനി. 130 വര്ഷം പഴക്കം. ആന്റ് ജെമാമ എന്നതില് വംശീയമായ സ്റ്റീരിയോടൈപ്പ് (സര്വ്വസാധാരണമായ സ്ഥിരസങ്കല്പം) ഒരു പക്ഷെ ഉണ്ടായിരിക്കുമെന്നാണ് കമ്പനി ഇപ്പോള് പറയുന്നത്. ആന്റിയുടെ ഇമേജിന് പലപ്പോഴായി അല്പസ്വല്പം മാറ്റം വരുത്തുവാനുള്ള ശ്രമങ്ങള് നടത്തിയെന്നും അവയൊക്കെ പാളിയെന്നും കമ്പനി സമ്മതിക്കുന്നു.
പിനക്കള് ഫുഡ്സിന്റെ ഉടമസ്ഥതയിലുള്ള, സിറപ്പ് , ബേക്കിംഗ് ഫുഡ്ഡ് ബ്രാന്ഡ് നെയിമായ മിസ്സസ് ബട്ടര്വര്ത്തും ലേബലുകള് മാറ്റുവാനുള്ള ആലോചനയിലാണ്.
അരിയാഹാരം കഴിക്കുന്ന മലയാളികള്ക്കെല്ലാം അറിയാവുന്ന ബ്രാന്ഡ് നെയിമാണ് അങ്കിള് ബെന്സ്. മാര്സ് കമ്പനിയുടെ ഉടമസ്ഥതയിലുള്ള അങ്കിള് ബെന്സിന്റെ പേരും ചിത്രങ്ങളും മാറ്റുമെന്ന് കമ്പനി പറഞ്ഞു കഴിഞ്ഞു. അങ്കിള് ബെന്സിന്റെയും ആന്റ് ജെമാമയുടെയും പരസ്യങ്ങളിലും ബാഗുകളിലും ഒക്കെ കാണുന്ന ചിത്രങ്ങള്ക്കുള്ള സാമ്യം ഏതു നിറവുമായിട്ടാണോ ആ നിറമുള്ളവരെ ആക്ഷേപിക്കയോ, അധിക്ഷേപിക്കുകയോയാണെന്നാണ് പുതിയ വിശദീകരണം.
ഇതു ശരിയോ തെറ്റോ? ആലോചിക്കുവാന് പോലും മിനക്കെടാതെ തിടുക്കത്തില് മാറ്റങ്ങള് വരുത്തുവാനാണു കമ്പനികകളുടെ ശ്രമം. സോറി ബ്രാന്ഡ്നെയിംസ് . സോറി അങ്കിള്, സോറി ആന്റി, നിങ്ങള് പടിക്കു പുറത്ത്.