Image

മരണത്തോടു മല്ലിടുന്ന ഈ സഹോദരങ്ങളെ സഹായിക്കുക

Published on 27 April, 2013
മരണത്തോടു മല്ലിടുന്ന ഈ സഹോദരങ്ങളെ സഹായിക്കുക
അവിരാമമായ സേവനത്തിന്റെ പതിനഞ്ച്‌ വര്‍ഷത്തെ പാരമ്പര്യമുള്ള ജീവകാരുണ്യപ്രസ്ഥാനമാണ്‌ പുതുപ്പള്ളി ചാരിറ്റബിള്‍ ക്ലബ്‌. കാരുണ്യത്തിന്റെയും അനുതാപത്തിന്റെയും വഴിയില്‍ ഒരു പടികൂടി മുന്നോട്ടു വച്ചുകൊണ്‌ട്‌ ചാരിറ്റബിള്‍ ക്ലബിന്റെ ആഭിമുഖ്യത്തില്‍ നടത്തപ്പെടുന്ന കനിവാര്‍ന്ന ഒരു സംരംഭമാണ്‌ പാലിയേറ്റീവ്‌ കെയര്‍ യൂണിറ്റ്‌.

ജീവിതത്തിലേക്ക്‌ ഇനിയൊരു മടങ്ങിവരവിനുള്ള എല്ലാ പ്രതീക്ഷയും അവസാനിച്ച്‌, ആശുപത്രിയില്‍ നിന്ന്‌ ഉപേക്ഷിക്കപ്പെട്ട, മരണാസന്നരും നിരാശ്രയരുമായ മാരകരോഗികളെ വേദനരഹിതരായി ശാന്തമായി മരിക്കാന്‍ അവസരമൊരുക്കുക എന്നതാണ്‌ ഈ പദ്ധതിയുടെ ഉദ്ദേശ്യം.

പാലിയേറ്റീവ്‌ യൂണിറ്റിലെ ഡോക്‌ടര്‍മാരും നേഴ്‌സുമാരുമടങ്ങുന്ന മെഡിക്കല്‍ ടീം രോഗികളുടെ വീടുകള്‍ സന്ദര്‍ശിച്ച്‌ അവര്‍ക്കുവേണ്‌ട പരിചരണവും ശുശ്രൂഷയും സൗജന്യമായി നല്‌കി അവരെ സാന്ത്വനിപ്പിക്കുന്നു. വാട്ടര്‍ബെഡ്‌, റയിസ്‌ ട്യൂബ്‌, യൂറിന്‍ ട്യൂബ്‌, മരുന്നുകള്‍ എന്നിവ വാങ്ങുന്നതിന്‌ മാസം തോറും വലിയ ഒരു തുകയാണ്‌ ചെലവഴിക്കേണ്‌ടി വരുന്നത്‌.

എല്ലാ ദിവസവും പ്രവര്‍ത്തിക്കുന്ന വൈദ്യസഹായ കേന്ദ്രത്തില്‍ മെഡിക്കല്‍ രംഗത്തെ പ്രമുഖരായ ഡോക്‌ടര്‍മാര്‍ രോഗികളെ സൗജന്യമായി ചികിത്സിക്കുന്നു.

ഡോ. സുഗുണന്‍ മറ്റത്തില്‍ എംബി.ബി.എസ്‌, ഡോ. എന്‍.ടി ഏബ്രഹാം എം.ഡി, ഡോ. വി.പി രാജന്‍ എം.ബി.ബി.എസ്‌ ഡി.ജി.ഒ, ഡി - ഓര്‍ത്തോ, ഡോ. വി.ആര്‍ ശശിധരന്‍ എം.ബി.ബി.എസ്‌ എം.ഫില്‍, ഡോ. ഷാജഹാന്‍ എന്നിവര്‍ ചാരിറ്റബിള്‍ ക്ലബിലെ സേവന മനസ്‌കരായ ഡോക്‌ടര്‍മാരില്‍ ചിലര്‍ മാത്രമാണ്‌.

ഡോക്‌ടര്‍മാരുടെ സേവനത്തോടൊപ്പം മരുന്നുകളും സൗജന്യമായി നല്‌കുന്ന ഈ വൈദ്യസഹായ കേന്ദ്രത്തിലേക്ക്‌ ദിവസേന നൂറു കണക്കിന്‌ രോഗികളാണ്‌ എത്തുന്നത്‌.

ഇതിനു പുറമെ, മറ്റ്‌ ഹോസ്‌പിറ്റലുകളുമായി സഹകരിച്ച്‌ വിവിധ മെഡിക്കല്‍ ക്യാമ്പുകളും എല്ലാ വര്‍ഷവും മധുര അരവിന്ദ്‌ ആശുപത്രിയുമായി ചേര്‍ന്ന്‌ സൗജന്യതിമിര ശസ്‌ത്രക്രിയാ ക്യാമ്പും, കണ്ണടവിതരണവും സംഘടിപ്പിക്കാറുണ്‌ട്‌.

പൊതുജന ആരോഗ്യ രംഗത്ത്‌ വിദ്യാഭ്യാസ മേഖലയിലും വിപുലമായ സേവന പ്രവര്‍ത്തനങ്ങള്‍ ചാരിറ്റബിള്‍ നടത്തുന്നുണ്‌ട്‌. വിദ്യാഭ്യാസ രംഗത്ത്‌ നേഴ്‌സിംഗ്‌ പഠനം ഉള്‍പ്പെടെയുള്ള പഠനസഹായപദ്ധതി സ്‌പോണ്‍സര്‍മാരുടെ സഹായത്തോടെ നടപ്പാക്കിവരുന്നു.

നിഷ്‌കാമകര്‍മിയും സഹജീവികളുടെ സങ്കടങ്ങള്‍ സ്വന്തം ഹൃദയത്തുടിപ്പുകളായി ഏറ്റുവാങ്ങി സേവനനിരതമായ ഒരു ജീവിതത്തിനുടമയുമായ രാധാകൃഷ്‌ണന്‍ എന്ന എളിയ മനുഷ്യനാണ്‌ പുതുപ്പള്ളി ചാരിറ്റബിള്‍ ക്ലബിന്റെ താങ്ങും തണലുമായി വര്‍ത്തിക്കുന്നത്‌. `വിധവയുടെ ചില്ലിക്കാശു'പോലെ സാധാരണക്കാരായ ചുരുക്കം ആളുകള്‍ ദശാംശമായി നല്‌കുന്ന തുക കൊണ്‌ട്‌ ഞെങ്ങിഞെരുങ്ങിയാണ്‌ അദ്ദേഹം ഈ സംരംഭങ്ങളെല്ലാം നടത്തിക്കൊണ്‌ടു പോകുന്നത്‌.

മനസില്‍ കനിവിന്റെയും കാരുണ്യത്തിന്റെയും നീരുറവകള്‍ ഇനിയും വറ്റിയിട്ടില്ലാത്ത അമേരിക്കന്‍ മലയാളികളായ വായനക്കാര്‍, നാട്ടില്‍ മരണത്തോടു മല്ലിടുന്ന നിങ്ങളുടെ ഈ സഹോദരങ്ങളെ സഹായിക്കില്ലേ.

വിലാസം: എന്‍. രാധാകൃഷ്‌ണന്‍, പുതുപ്പള്ളി ചാരിറ്റബിള്‍ ക്ലബ്‌, പുതുപ്പള്ളി പി.ഒ, കോട്ടയം 686011, കേരള, ഇന്ത്യ, ഫോണ്‍: 9249239652.
മരണത്തോടു മല്ലിടുന്ന ഈ സഹോദരങ്ങളെ സഹായിക്കുകമരണത്തോടു മല്ലിടുന്ന ഈ സഹോദരങ്ങളെ സഹായിക്കുകമരണത്തോടു മല്ലിടുന്ന ഈ സഹോദരങ്ങളെ സഹായിക്കുക
Join WhatsApp News
മലയാളത്തില്‍ ടൈപ്പ് ചെയ്യാന്‍ ഇവിടെ ക്ലിക്ക് ചെയ്യുക