ന്യൂഡല്‍ഹി: 1993ലെ മുംബയ് സ്‌ഫോടന കേസുകളില്‍ രാജ്യം തേടുന്ന അധോലോക നായകന്‍ ദാവൂദ് ഇബ്രാഹിമിനെ വധിക്കുന്നതിന് തൊട്ടരുകില്‍ ഇന്ത്യ എത്തിയെന്നും അവസാന നിമിഷം ആ ഓപ്പറേഷന്‍ റദ്ദാക്കിയെന്നും വെളിപ്പെടുത്തല്‍. ഒരു വര്‍ഷം മുന്പായിരുന്നു സൂപ്പര്‍ ബോയ്‌സ് എന്ന് പേരിട്ട ഒന്പതംഗ കമാന്‍ഡോ സംഘം പാകിസ്ഥാനിലേക്ക് നുഴഞ്ഞു കയറി ദാവൂദിനെ കണ്ടെത്തി വധിക്കാന്‍ ശ്രമിച്ചതും. എന്നാല്‍ അവസാന നിമിഷം കമാന്‍ഡോകള്‍ക്ക് ലഭിച്ച ഫോണ്‍ സന്ദേശത്തോടെ ആ ഓപ്പറേഷന്‍ ഉപേക്ഷിക്കുകയും ചെയ്തതായി വിശ്വസ്ത വൃത്തങ്ങളെ ഉദ്ധരിച്ചു കൊണ്ട് സി.എന്‍.എന്‍.ഐ.ബി.എന്‍ വാര്‍ത്താ ചാനല്‍ റിപ്പോര്‍ട്ട് ചെയ്തു. 

2013 സെപ്തംബര്‍ 13നായിരുന്നു ഓപ്പറേഷന്‍ നടന്നത്. ഇന്ത്യയുടെ രഹസ്യാന്വേഷണ ഏജന്‍സിയായ റിസര്‍ച്ച് ആന്‍ഡ് അനാലിസിസ് വിംഗ് (റാ) തിരഞ്ഞെടുത്ത, മികച്ച പരിശീലനം ലഭിച്ച കമാന്‍ഡോ സംഘമാണ് ഓപ്പറേഷന് നിയോഗിക്കപ്പെട്ടത്. ഇവര്‍ക്ക് സുഡാന്‍, ബംഗ്‌ളാദേശ്, നേപ്പാള്‍ എന്നിവിടങ്ങളിലേക്കുള്ള  പാസ്‌പോര്‍ട്ടും നല്‍കി.  ഓപ്പറേഷന് ഇസ്രായേലിന്റെ രഹസ്യാന്വേഷണ ഏജന്‍സിയായ  മൊസദിന്റെ സജീവ പിന്തുണയും ഇന്ത്യ തേടി.

ഇന്ത്യയില്‍ നിന്ന് രക്ഷപ്പെട്ട ശേഷം ദാവൂദ് ഇബ്രാഹിം കറാച്ചിയില്‍  പാകിസ്ഥാന്റെ സംരക്ഷണയിലാണ് കഴിഞ്ഞുവന്നത്. കറാച്ചിയിലെ ക്‌ളിപ്ടണ്‍ റോഡിലെ വീട്ടില്‍ നിന്ന് ഡിഫന്‍സ് ഹൗസിംഗ് സൊസൈറ്റിയിലേക്ക് എന്നും രാവിലെ ദാവൂദ് യാത്ര ചെയ്യാറുണ്ടായിരുന്നു. ഇത് മനസിലാക്കിയ കമാന്‍ഡോ സംഘം, ആ വഴിയിലുള്ള ഒരു ദര്‍ഗയില്‍ വച്ച് ദാവൂദിനെ വധിക്കാന്‍ പദ്ധതിയിട്ടു. റോഡില്‍ അവര്‍ നിലയുറപ്പിക്കുകയും ചെയ്തു. ദാവൂദിന്റെ കാറിനെ കുറിച്ച് വിവരമൊന്നും കമാന്‍ഡോ സംഘത്തിന് ഇല്ലായിരുന്നു. എന്നാല്‍ ദാവൂദിന്റെ സാന്നിദ്ധ്യം സ്ഥിരീകരിക്കുന്ന ഒരു വീഡിയോ കൈവശമുണ്ടായിരുന്നു. എന്നാല്‍ ആക്രമണം നടപ്പാക്കുന്നതിന് മുന്പ് ദുരൂഹ സാഹചര്യത്തില്‍ ഫോണ്‍ സന്ദേശം എത്തി. അതോടെ ഓപ്പറേഷന്‍ ഉപേക്ഷിക്കുകയായിരുന്നു വിശ്വസ്ത വൃത്തത്തെ ഉദ്ധരിച്ച് ചാനല്‍ റിപ്പോര്‍ട്ട് ചെയ്തു. എന്നാല്‍ ആക്രമണ പദ്ധതി  ഉപേക്ഷിച്ചത് സംബന്ധിച്ച് കൂടുതല്‍ വിവരങ്ങള്‍ വെളിപ്പെടുത്തിയില്ലെന്നാണ് ചാനല്‍ റിപ്പോര്‍ട്ട്. 

മുംബയ് സ്‌ഫോടനങ്ങള്‍ക്ക്  ശേഷം പാകിസ്ഥാനിലേക്ക് കടന്ന ദാവൂദിനെ വിട്ടുകിട്ടാന്‍ ഇന്ത്യ നിരന്തര ശ്രമം നടത്തി വരികയാണ്.