ബാര്‍ കോഴക്കേസില്‍ മാധ്യമങ്ങളെ പഴിച്ചും മാണിക്ക് പരോക്ഷ പിന്തുണ നല്‍കിയും മാര്‍ ജോസഫ് പവ്വത്തില്‍
Published on 30 January, 2015
തിരുവനന്തപുരം: ബാര്‍ കോഴക്കേസില്‍ മാധ്യമങ്ങളെ പഴിച്ചും ധനമന്ത്രി കെ.എം. മാണിക്ക് പരോക്ഷ പിന്തുണ നല്‍കിയും ആര്‍ച്ച് ബിഷപ്പ് മാര്‍ ജോസഫ് പവ്വത്തിലിന്റെ ലേഖനം. ദീപിക ദിനപത്രത്തിലാണ് ' മാദ്ധ്യമങ്ങള്‍ ലക്ഷ്മണരേഖ കടക്കരുത്' എന്ന തലക്കെട്ടില്‍ ലേഖനം പ്രസിദ്ധീകരിച്ചിരിക്കുന്നത്. എന്നാല്‍, കെ.എം. മാണിയുടെ പേര് ഒരിക്കല്‍പോലും ലേഖനത്തില്‍ ഉപയോഗിച്ചിട്ടില്ല. മാദ്ധ്യമക്കാര്‍ ആരോപണക്കാരും വിധിയാളന്മാരുമായി മാറുന്നത് ശരിയല്ലെന്നും ബാര്‍ കോഴക്കേസില്‍ ഇതോണോ സംഭവിക്കുന്നതെന്ന് പലരും ചോദിക്കുന്നുണ്ടല്ലോ എന്നും ലേഖനത്തില്‍ പറയുന്നു.
ശരിയായ തെളിവുകളില്ലാതെ ഒരു മനുഷ്യനെ തുടര്‍ച്ചയായി വേട്ടയാടുന്നതില്‍ എന്തോ അപാകതയുണ്ടെന്നാണ് അവര്‍ പറയുന്നത്. ജനാധിപത്യത്തില്‍ ആരോപണങ്ങളുടെ നിജസ്ഥിതി അന്വേഷിക്കാനും വിലയിരുത്താനും വിധി പറയാനുമെല്ലാം സംവിധാനങ്ങളുണ്ട്. കുറ്റം, കൃത്യമായി തെളിയിക്കുന്നതുവരെ ആരേയും കുറ്റവാളികളായി കരുതരുത്. പക്ഷെ, മാദ്ധ്യമങ്ങള്‍ക്ക് ഇങ്ങനെയുള്ള മാനദണ്ഡങ്ങളൊന്നും ഇല്ലെന്നു പറയാം. കുറ്റവിചാരണയും ശിക്ഷയും മാധ്യമങ്ങള്‍ ഏറ്റെടുക്കുന്നത് ശരിയാവില്ല. അത് ജനാധിപത്യവിരുദ്ധമാണ്. ആവിഷ്‌കാര സ്വാതന്ത്ര്യത്തിനുപരിധികള്‍ കണ്ടെത്താന്‍ മാധ്യമങ്ങള്‍ തന്നെ ശ്രദ്ധിക്കണം. അല്ലെങ്കില്‍ ഭരണകര്‍ത്താക്കള്‍ അതിരുകള്‍ നിര്‍ണയിക്കണം. ആവിഷ്‌കാര സ്വാതന്ത്ര്യത്തിനു പരിധിയില്ലെങ്കില്‍ പ്രതികരണ സ്വാതന്ത്ര്യവും അതിരുവിട്ടുപോകും. വിഗ്രഹഭഞ്ജനം പലര്‍ക്കുമൊരു ഹരമാണ്. മറ്റുള്ളവര്‍ പൂജ്യരായി കാണുന്നതിനെ അവഹേളിക്കുകയാണ് അവരുടെ ഇഷ്ടവിനോദമെന്നും ലേഖനത്തില്‍ പറയുന്നു.
Facebook Comments
Comments
Aniyankunju 2015-01-30 14:33:41
ബാര്‍ കോഴ സംബന്ധിച്ച എല്ലാ കാര്യങ്ങളും കൊച്ചുകുട്ടികള്‍ക്ക് പോലും വ്യക്തമായിട്ടും ഇക്കാര്യത്തില്‍ ഇനിയും കേരള സമൂഹത്തിന് തെളിവു വേണോയെന്ന് യാക്കോബായ സുറിയാനിസഭ നിരണം ഭദ്രാസനാധിപന്‍ ഡോ.ഗീവര്‍ഗീസ് മാര്‍ കൂറിലോസ് മെത്രാപ്പോലീത്ത ചോദിച്ചു. നാണം ഇല്ലാത്തവരാണ് ഇത്തരം ചോദ്യങ്ങള്‍ ഉന്നയിക്കുന്നത്.
രസീത് കൊടുത്ത് ആരെങ്കിലും കൈക്കൂലി വാങ്ങുമോയെന്ന് ഇനിയും തെളിവ് ചോദിക്കുന്നവര്‍ ഓര്‍ക്കണം.
സിഎസ്ഐ മധ്യകേരള മഹായിടവക തൃതീയ ജൂബിലി സ്മാരക കണ്‍വന്‍ഷനില്‍ മുഖ്യപ്രഭാഷണം നടത്തുകയായിരുന്നു കൂറിലോസ്.
ഓട്ടോറിക്ഷകള്‍ പോലെ ധാരാളം ബിഷപ്പുമാരുണ്ട്. രണ്ടിനുംകേരളത്തില്‍ പഞ്ഞമില്ല. സഭകള്‍ തിന്മകള്‍ക്കെതിരെ ആര്‍ജവത്തോടെ പ്രതികരിക്കണം. നമ്മളുടെ ആളെ തൊട്ടാല്‍ ലേഖനം എഴുതുന്ന സ്ഥിതിയാണിപ്പോള്‍. ബാര്‍ കോഴയെക്കുറിച്ചുള്ള ശബ്ദരേഖയിലൂടെ കാര്യങ്ങള്‍ വ്യക്തമാണ്. ബാര്‍ പൂട്ടിയതു തന്നെ കാശുമേടിച്ച് തുറക്കാനാണ്്.
ഫലത്തില്‍ "ബാര്‍ വാപ്പസി'യാണ് നടക്കുന്നത്.
ഒന്ന്, രണ്ട്, മൂന്ന്, നാല് എന്നിങ്ങനെ പണം വാങ്ങിയവരുടെ പട്ടികയെക്കുറിച്ച് തന്നെ പറയുന്നു. ഭരണം കയ്യാളുന്നവര്‍ക്ക് ഇതൊക്കെ ഇല്ലാതാക്കാനും പറ്റുമെന്ന് സമൂഹം ഭയക്കുന്നു. ഈ പശ്ചാത്തലത്തില്‍ ക്രിസ്ത്യാനികള്‍ യഥാര്‍ഥ പ്രതിപക്ഷമാകണം.
യേശുക്രിസ്തുവിനും ഒരു രാഷ്ട്രീയം ഉണ്ടായിരുന്നു. സാമ്രാജ്യത്വവും മുതലാളിത്തവും എല്ലാത്തിനും വെല്ലുവിളികള്‍ ഉയര്‍ത്തുന്നു. പണത്തിന്റ ആധിപത്യവും ആര്‍ത്തിയും വലിയ തിന്മയായി. പുതിയ ദൈവമായി പണം വരുന്നു. പണത്തെ ആരാധിക്കുന്ന നിലയിലേക്ക് ക്രിസ്ത്യാനിയും മാറി. അതായത് ക്രിസ്തുവിനു പകരം മാമോനെ ആരാധിക്കുന്നു. സഭകളെയും അഴിമതി ബാധിക്കുന്നു. സുവിശേഷ കണ്‍വന്‍ഷനുകള്‍ പോലും മദ്യമുതലാളിയുടെ പണംകൊണ്ട് നടത്തുന്ന സ്ഥിതിയുണ്ട്.ഇംഗ്ലണ്ടില്‍ പള്ളികളില്‍ പ്രാര്‍ഥിക്കാന്‍ വിശ്വാസികള്‍ കുറഞ്ഞപ്പോള്‍ വലിയ ഹാളിന്റെ പകുതി ബാറിന് വാടയ്ക്ക് കൊടുത്തത് കാണാനടിയായി. അവിടെത്തന്നെ പ്രത്യേക ഹാളിലിരുന്ന് മദ്യപിക്കാന്‍ കൂടുതല്‍ പണം ഈടാക്കുന്നതായി മനസ്സിലാക്കി. കൂടുതല്‍ അന്വേഷിച്ചപ്പോള്‍ ആ ഭാഗം പള്ളിയുടെ "മദ്ബഹ' യായിരുന്നെന്നായിരുന്നു മറുപടി.സത്യത്തില്‍ ക്രിസ്തുവില്‍ നിന്ന് ക്രിസ്ത്യാനികളും ശ്രീനാരായണഗുരുവില്‍ നിന്ന് അദ്ദേഹത്തിന്റെ പ്രസ്ഥാനക്കാരും ഗാന്ധിയില്‍ നിന്ന് ഗാന്ധിയന്മാരും അകലുന്നു. ബാര്‍ കോഴയിലൊക്കെ കുരുങ്ങിയവര്‍ ഖദറെങ്കിലും ധരിക്കാതിരിക്കണം- മാര്‍ കൂറിലോസ് പറഞ്ഞു.
Leave A Reply
മലയാളത്തില്‍ ടൈപ്പ് ചെയ്യാന്‍ ഇവിടെ ക്ലിക്ക് ചെയ്യുക
അസഭ്യവും നിയമവിരുദ്ധവും അപകീര്‍ത്തികരവുമായ പരാമര്‍ശങ്ങള്‍ പാടില്ല. വ്യക്തിപരമായ അധിക്ഷേപങ്ങളും
ഉണ്ടാവരുത്. അവ സൈബര്‍ നിയമപ്രകാരം കുറ്റകരമാണ്. അഭിപ്രായങ്ങള്‍ എഴുതുന്നയാളുടേത് മാത്രമാണ്. ഇ-മലയാളിയുടേതല്ല
EMalayalee Available in MediaAppUSA
Copyright © 2024 emalayalee.com - All Rights Reserved.
Webmastered by MIPL, Web Hosting Calicut Kerala