Image

സുരേന്ദ്രനെ വേട്ടയാടിയാല്‍ പിണറായിക്ക് മക്കളെ കാണാന്‍ ജയിലില്‍ പോകേണ്ടി വരുമെന്ന് എ. എന്‍ രാധാകൃഷ്ണന്‍

Published on 15 June, 2021
സുരേന്ദ്രനെ വേട്ടയാടിയാല്‍ പിണറായിക്ക് മക്കളെ കാണാന്‍ ജയിലില്‍ പോകേണ്ടി വരുമെന്ന് എ. എന്‍ രാധാകൃഷ്ണന്‍
മുഖ്യമന്ത്രി പിണറായി വിജയനെതിരെ ഭീഷണിയുമായി ബി.ജെ.പി നേതാവ് എ എന്‍ രാധാകൃഷ്ണന്‍. ബിജെപി നേതാക്കളെ കള്ളക്കേസില്‍ കുടുക്കാനാണ് തീരുമാനമെങ്കില്‍ മുഖ്യമന്ത്രി പിണറായി വിജയന്‍ അധികകാലം വീട്ടില്‍ കിടന്ന് ഉറങ്ങാമെന്ന് വിചാരിക്കേണ്ടെന്ന് എ.എന്‍ രാധാകൃഷ്ണന്‍ പറഞ്ഞു. കേരളത്തില്‍ ജനാധിപത്യ ധ്വംസനാണ് നടക്കുന്നതെന്നും, ജനാധിപത്യത്തിന്‍റെ സംരക്ഷണത്തിനായി ബി.ജെ.പി നടത്തുന്ന സമരത്തിന് കേരള പൊതുസമൂഹം പിന്തുണക്കണമെന്നും രാധാകൃഷ്ണന്‍ പറഞ്ഞു.

കെ സുരേന്ദ്രനെ കള്ളക്കേസില്‍ കുടുക്കാനാണ് മുഖ്യമന്ത്രിയുടെ നേതൃത്വത്തില്‍ പൊലീസ് ശ്രമിക്കുന്നത്. ബി.ജെ.പിക്കാരെ കള്ളക്കേസില്‍ കുടുക്കി ജയിലില്‍ ഇട്ടുകളയാം എന്നാണ് പിണറായി വിജയന്‍ വിചാരിക്കുന്നത്. ശബരിമല കാലത്ത് ബി.ജെ.പിക്കാരെ കേരളത്തിലെ പൊലീസ് സ്റ്റേഷനുകളില്‍ കയറ്റിയ ചരിത്രമാണ് പൊലീസിന് ഉള്ളത്. ആ പരിചയത്തിന്‍റെ അഹങ്കാരത്തിലാണ് ഇനിയും പോകുന്നതെങ്കില്‍, മുഖ്യമന്ത്രിക്ക് മക്കളെ കാണാന്‍ ജയിലില്‍ വരേണ്ട സാഹചര്യമുണ്ടാകുമെന്നും എ.എന്‍ രാധാകൃഷ്ണന്‍ പറഞ്ഞു. തങ്ങളെ ഭയപ്പെടുത്താന്‍ നോക്കേണ്ടതില്ല. കൊടുത്താല്‍ കൊല്ലത്തും കിട്ടും, തങ്ങള്‍ തിരിച്ചടിക്കുമെന്ന് രാധാകൃഷ്ണന്‍ പറഞ്ഞു. പിണറായി വിജയന്റെ ഭരണകൂട ഭീകരതക്കെതിരെ കേരള പൊതുസമൂഹം ഉണരേണ്ടതാണ്.

കേരളത്തില്‍ അപ്രഖ്യാപിത അടിയന്തരാവസ്ഥയാണ്. ജനാധിപത്യ സംരക്ഷത്തിനാണ് ബി.ജെ.പി ഇപ്പോള്‍ സമരം ചെയ്യുന്നത്. കോവിഡിന്റെ പശ്ചാതലത്തില്‍ സമരങ്ങളുമായി മുന്നോട്ട് കൊണ്ടുപോകാന്‍ പറ്റാത്ത സാഹചര്യം പിണറായി വിജയന്‍ ദുരുപയോഗം ചെയ്യുകയാണ്. ബി.ജെ.പിയുടെ സമരം വിജയിപ്പിക്കാന്‍ കേരള പൊതുസമൂഹം നിശബ്ദം അണിചേരണമെന്നും രാധാകൃഷ്ണന്‍ പറഞ്ഞു.
Join WhatsApp News
മലയാളത്തില്‍ ടൈപ്പ് ചെയ്യാന്‍ ഇവിടെ ക്ലിക്ക് ചെയ്യുക