സംസ്ഥാന ആസുത്രണബോര്ഡിലേയ്ക്ക് ഒരാളെ നിര്ദ്ദേശിക്കാന് ജോസ് വിഭാഗത്തിന് ലഭിച്ച അവസരം പാര്ട്ടിക്ക് പ്രയോജനം ചെയ്യാതെ പോയതില് ജോസ് വിഭാഗം നേതാക്കളിലും അണികളിലും അതൃപ്തിയെന്ന് സൂചന. പ്രമുഖ മാധ്യമ പ്രവര്ത്തകനും സഞ്ചാരിയുമായ സന്തോഷ് ജോര്ജ് കുളങ്ങരയെയാണ് പാര്ട്ടി ഈ സ്ഥാനത്തേയ്ക്ക് നിര്ദ്ദേശിച്ചത്.
എന്നാല് താന് ഒരു പാര്ട്ടിയുടേയും നോമിനിയല്ലെന്ന് പറഞ്ഞ് സന്തോഷ് ജോര്ജ് കുളങ്ങര രംഗത്ത് വന്നതോടെയാണ് പാര്ട്ടിക്കുള്ളില് അസ്വാരസ്യങ്ങള് ഉടലെടുത്തിരിക്കുന്നത്. സിപിഎം നിര്ദ്ദേശ പ്രകാരം സന്തോഷ് ജോര്ജ് കുളങ്ങരയ്ക്ക് ജോസ് കെ. മാണി സ്ഥാനം നല്കുകയായിരുന്നുവെന്നാണ് റിപ്പോര്ട്ടുകള്.
പാര്ട്ടിയിലെ സീനിയര് നേതാക്കന്മാര് കണ്ണുവച്ചിരുന്ന സ്ഥാനമാണിത് . പലരും ജോസ് കെ. മാണിയോട് ഈ ആവശ്യം ഉന്നയിക്കുകയും ചെയ്തിരുന്നു. എന്നാല് സിപിഎമ്മിന്റെ സമ്മര്ദ്ദത്തില് ജോസിന് മറിച്ചൊരു തീരുമാനമെടുക്കാന് കഴിയുമായിരുന്നില്ലെന്നാണ് പാര്ട്ടിക്കുള്ളിലെ അടക്കം പറച്ചില്.
ഈ സ്ഥാനം നോട്ടമിട്ടിരുന്ന പല നേതാക്കന്മാരും ഇതിനകം തന്നെ ജോസ് കെ.മാണിയെ അതൃപ്തി അറിയിച്ചു കഴിഞ്ഞു. വരാനിരിക്കുന്ന ബോര്ഡ് കോര്പ്പറേഷന് വീതം വയ്പ്പിലും മധ്യകേരളത്തിലെ പല സിപിഎം നേതാക്കളേയും കേരളാ കോണ്ഗ്രസിന്റെ അക്കൗണ്ടില് സ്ഥാനങ്ങളിലെത്തിക്കാന് സിപിഎം ശ്രമിക്കുന്നുണ്ട്. ഇങ്ങനെ സംഭവിച്ചാല് പാര്ട്ടിക്കുള്ളില് ഒരു പൊട്ടിത്തെറി തന്നെ ഉണ്ടായേക്കും.