ശാസ്താംകോട്ട : താലൂക്ക് ആശുപത്രിയില് ഡോക്ടറെ മര്ദിച്ച സംഭവത്തില് ശൂരനാട് പഞ്ചായത്ത് പ്രസിഡന്റ് ശ്രീകുമാറിനെ പൊലീസ് അറസ്റ്റ് ചെയ്തു. ശനിയാഴ്ച രാവിലെ സ്വകാര്യ ആശുപത്രിയില്നിന്നും ഡിസ്ചാര്ജ് ചെയ്തതിന് പിന്നാലെയാണ് അറസ്റ്റ്. ശ്രീകുമാര് അടക്കം ഏഴുപേര്ക്കെതിരെ ജാമ്യമില്ലാ വകുപ്പ് പ്രകാരം കേസ് എടുത്തിട്ടുണ്ട്.
ഡി.സി.സി ജനറല് സെക്രട്ടറി കാഞ്ഞിരംവിള അജയകുമാര്, യൂത്ത് കോണ്ഗ്രസ് പ്രവര്ത്തകന് നിതിന് കല്ലട എന്നിവരെയും കണ്ടാലറിയുന്ന നാലുപേരെയുമാണ് പ്രതി ചേര്ത്തിട്ടുള്ളത്. ഡോ. എം. ഗണേഷിനെ മര്ദിച്ചതിലും ആശുപത്രി സൂപ്രണ്ട് ഡോ. ഷഹാന മുഹമ്മദിനെ ഭീഷണിപ്പെടുത്തിയതിനുമാണ് കേസ്. പ്രതികളെ അറസ്റ്റ് ചെയ്യണമെന്നാവശ്യപ്പെട്ട് ശാസ്താംകോട്ട താലൂക്കാശുപത്രിയില് ഒ.പി ബഹിഷ്കരിച്ച് ആശുപത്രി ജീവനക്കാരുടെ സമരം തുടരുകയാണ്.
വ്യാഴാഴ്ച രാത്രിയാണ് കേസിനാസ്പദമായ സംഭവം. ശൂരനാട് വടക്ക് പാതിരിക്കല് അരവണ്ണൂര് കളീക്കല് സരസമ്മ (89) കിണറ്റില് വീണ് മരിച്ചിരുന്നു. ഫയര്ഫോഴ്സ് എത്തിയാണ് ഇവരെ പുറത്തെടുത്തത്. പിന്നീട് പഞ്ചായത്ത് പ്രസിഡന്റ് ശ്രീകുമാറിന്റെ നേതൃത്വത്തില് മൃതദേഹം താലൂക്ക് ആശുപത്രിയിലെത്തിച്ചു.
ഇവിടെവെച്ച് മരണം സ്ഥിരീകരിക്കുന്നത് ബന്ധിച്ചുണ്ടായ തര്ക്കമാണ് കൈയേറ്റത്തില് കലാശിച്ചത്.