Image

എവിടെ പിശാചുക്കള്‍, മാലാഖമാര്‍ (കവിത: മാര്‍ഗരറ്റ് ജോസഫ്)

Published on 25 October, 2021
എവിടെ പിശാചുക്കള്‍, മാലാഖമാര്‍ (കവിത: മാര്‍ഗരറ്റ് ജോസഫ്)
പ്രാകൃതമാം യുഗവീഥികളില്‍,
പാദങ്ങളൂന്നിയ പാമരന്മാര്‍;
കാലംകൊളുത്തിയ കൈത്തിരിയാല്‍,
ആത്മാന്ധകാരമകറ്റുന്നവര്‍;
ഉല്‍ക്കടമോഹത്തിന്‍ മൂര്‍ത്തികളായ്,
ദുര്‍ഘടമെല്ലാം തകര്‍ത്തീയുന്നോര്‍;
ആദിമുതല്‌ക്കോരോമാത്ര തോറും,
മാനവരാശി മുന്നോട്ടുമാത്രം....
അദ്ധ്വാനഭാരം തലയിലേറ്റി,
അപ്പംതിരഞ്ഞ് പോകുന്നവര്‍ക്ക്,
ഭൂമിയാകെ തറവാട്ടു സ്വത്തായ്,
ഏതോ വഴിത്തിരിവെത്തുവോളം.
ആകാശത്തോളം വിശാലതയില്‍,
രാപ്പകല്‍ പായുന്ന ബുദ്ധിജീവി;
ജാതിമത വര്‍ണ്ണവര്‍ഗ്ഗങ്ങളായ്,
ജീവിതം വേലികെട്ടിത്തിരിച്ച്,
വ്യത്യസ്ത കര്‍മ്മധര്‍മ്മങ്ങളാര്‍ന്ന്,
മിഥ്യയില്‍ തപ്പിത്തടയുന്നവര്‍;
വെട്ടിപ്പിടിക്കാനൊരുമ്പെടുന്ന,
മാനസമേ, നിനക്കെങ്ങതിര്‍ത്തി?
സ്വത്വം പുലര്‍ത്തുന്ന പുഞ്ചിരിയാല്‍,
സത്യത്തിന്‍ സാക്ഷികളാകേണ്ടവര്‍,
സംസ്‌കാരസമ്പന്ന, രുത്തമന്മാര്‍-
സംസ്സര്‍ഗ്ഗമില്ലാത്തോ,രജ്ഞാനികള്‍,
കാടത്തമുള്ളവരെന്നിങ്ങനെ,
ഉത്തമന്മാരി,ലധര്‍മ്മന്മാരില്‍,
അന്ധവിശ്വാസികളെത്രയെത്ര,
ഈയരങ്ങാഘോഷമാക്കീടുവാന്‍?
ദേശഭോദങ്ങളനുസരിച്ച്,
മര്‍ത്ത്യനനാചാര, മാചാരമായ്,
ഭൂതപ്രേതങ്ങള്‍, പിശാചുക്കളും,
ആരാധനാമൂര്‍ത്തികള്‍ ചിലര്‍ക്ക്;
'ഹാലോവീന്‍' രൂപഭാവങ്ങളില്‍ ഹാ!
ഹാലിളക്കും പല ദൃശ്യങ്ങളായ്;
എവിടെ പിശാചുക്കള്‍, മാലാഖമാര്‍?
സ്വര്‍ഗ്ഗനരക നിഗൂഢതകള്‍?
മാടിവിളിക്കും മൃഗതൃഷ്ണപോല്‍-
ഓളമിളക്കുന്ന വിഭ്രാന്തിയോ?
കണ്ടതും കേട്ടതും കോര്‍ത്തിണക്കി-
ചിത്രങ്ങള്‍ ഹൃത്തില്‍ വരയ്ക്കുന്നതോ?


Join WhatsApp News
American Mollakka 2021-10-26 22:20:58
മനസനു അറിവ് കിട്ടാൻ തുടങ്ങിയപ്പോൾ അബൻ പടച്ചോൻറെയും ഇബ്‌ലീസിന്റേയും ശക്തി അന്വേഷിച്ചു. ഹാലോവീൻ ദിബസം ഇബ്‌ലീസ്സല്ല പുറത്തേക്ക് ബരുന്നത് അത് മനുസനാണ്. മാർഗരറ്റ് സാഹിബ മനുസന്മാരോട് നന്നാകാൻ പറയു. ഇബ്‌ലീസിനെ ബെറുതെ ബിടുക. മനുസനോളം ബല്യ ഇബ്‌ലീസില്ല. ഈ ബിബരം ഞമ്മള് നിസ്കരിക്കുമ്പോൾ പടച്ചോൻ പറഞ്ഞതാണ്.
Sudhir Panikkaveetil 2021-10-26 23:41:26
ഭൂത പ്രേതാദികളിൽ വിശ്വസിക്കുന്നവർ അതായത് അവരെ ആരാധിക്കുന്നവർ പിശാചുകൾക്ക് വേണ്ടി ഒരു ദിവസം നീക്കിവയ്ക്കുന്നതിൽ അത്ഭുതമില്ല. കാലം കൊളുത്തിയ കൈത്തിരിയാൽ ആത്മന്ധകാരമകറ്റിയവർ വീണ്ടും ഇരുട്ടിലേക്ക് തപ്പിത്തടയുന്നത് മാനവ രാശിയുടെ മുന്നോട്ടുള്ള പ്രയാണത്തെ ബാധിക്കുമെന്ന് കവയിത്രി ഓര്മിപ്പിക്കുകയാവാം.
Joy parippallil 2021-10-28 20:12:29
മനുഷ്യ മനസ്സിലെ പൈശാചിക ചിന്തകൾ ഹാലോവിൻ രൂപം ധരിച്ചു പുറത്ത് വരുന്നു എന്ന് പറയാം....!!
മലയാളത്തില്‍ ടൈപ്പ് ചെയ്യാന്‍ ഇവിടെ ക്ലിക്ക് ചെയ്യുക