തിരുവനന്തപുരം: കോണ്ഗ്രസിന്റെ പോഷക സംഘടനയായ ഒഐസിസി ഓഷ്യാന കണ്വീനറായി ജോസ് എം.ജോര്ജിനെ കെപിസിസി നിയമിച്ചു. ഒഐസിസി എല്ലാ വിദേശ രാജ്യങ്ങളിലും പുനഃസംഘടിപ്പിക്കുന്നതിന്റെ ഭാഗമായിട്ടാണ് ജോസിന്റെ നിയമനം . കേരളാ പ്രദേശ് കോണ്ഗ്രസ് കമ്മറ്റിയുടെ നിര്ദ്ദേശപ്രകാരം ഒഐസിസി ഗ്ലോബല് ചെയര്മാന് കുന്പളത്ത് ശങ്കര പിള്ളയാണ് ഓഷ്യാന കണ്വീനറായി ജോസ് എം.ജോര്ജിനെ നോമിനേറ്റ് ചെയ്തത്. കെപിസിസി പ്രസിഡന്റ് കെ. സുധാകരനടക്കം കേരളത്തിലെ കോണ്ഗ്രസ് നേതാക്കളുമായി വളരെ അടുത്ത ബന്ധം പുലര്ത്തുന്ന സജീവ രാഷ്ട്രീയ പ്രവര്ത്തകനാണ് ഓസ്ട്രേലിയയില് കുടിയേറിയിരിക്കുന്ന ജോസ് എം ജോര്ജ്.
ഓസ്ട്രേലിയായിലെ ഒഐസിസിയുടെ സ്ഥാപക പ്രസിഡന്റും കഐസ്യു മുന് ഇടുക്കി ജില്ല- ഭാരവാഹിയും, സൗദി അറേബ്യയിലെ റിയാദ് മുന് ഒഐസിസി ജനറല് സെക്രട്ടറിയുമായിരുന്നു ജോസ് എം ജോര്ജ് . റിയാദില് ശക്തമായി പ്രവര്ത്തിച്ചിരുന്ന കലയുടെ മുന് പ്രസിഡന്റായും അദ്ദേഹം പ്രവര്ത്തിച്ചിട്ടുണ്ട്. ശ്രദ്ധേയമാര്ന്ന പല പരിപാടികളും സംഘടിപ്പിച്ച് ഒഐസിസി ഓസ്ട്രേലിയായ്ക്ക് ഒരു മികച്ച പ്രവര്ത്തനം കാഴ്ച വയ്ക്കുവാന് ഇദ്ദേഹത്തിന്റെ നേതൃത്വത്തിന് മുന്പ് കഴിഞ്ഞിട്ടുണ്ട്.
മലേഷ്യാ, സിങ്കപ്പൂര്, ന്യൂസിലാന്ഡ്, ഫിജി, പപ്പുവ ന്യൂഗിനി തുടങ്ങിയ സ്ഥലങ്ങളും ഓസ്ട്രിയ, ജോര്ജിയ, റഷ്യ, ലൈബീരിയാ തുടങ്ങിയ സ്ഥലങ്ങളുടെ അധിക ചുമതലയും കെപിസിസി ജോസ് എം. ജോര്ജിനെ നല്കിയിട്ടുണ്ട്. ഗ്ലോബല് കമ്മറ്റിയുടെ അംഗീകാരത്തോടെ ഓഷ്യാനയുടെ വിവിധ രാജ്യങ്ങളില് അഡ്ഹോക്ക് കമ്മിറ്റികളും, വിപുലമായ മെംന്പര്ഷിപ്പ് ക്യാന്പയിനും ഒഐസിസി ഓഷ്യാന കണ്വീനറായ ജോസ് എം. ജോര്ജിന്റെ നേതൃത്വത്തിലുള്ള കമ്മിറ്റി സംഘടിപ്പിക്കുമെന്നും ഗ്ലോബല് ചെയര്മാന് കുന്പളത്ത് ശങ്കര പിള്ള അറിയിച്ചു.
കേരള ന്യൂസ് പത്രത്തിന്റെയും കേരള ന്യൂസ് ചാനലിന്റെയും ചീഫ് എഡിറ്ററായ ജോസ് എം.ജോര്ജ് മികച്ച സംഘാടകനാണ്. ഓണ്ലൈന് മാധ്യമങ്ങളുടെ കൂട്ടായ്മയായ ചീഫ് എഡിറ്റേഴ്സ് ഗില്ഡിന്റെ സംസ്ഥാന ജനറല് സെക്രട്ടറിയായും ജോസ് എം. ജോര്ജ് പ്രവര്ത്തിക്കുന്നു.