വലതുകാലില് ചെറിയൊരു നീര്ക്കെട്ട്-വാര്ദ്ധക്യം, പൊണ്ണത്തടി, കസര്ത്തില്ലായ്മ- പിന്നെ കൈയിലിരുപ്പ് ഇവയാണ് കാരണങ്ങള്.
നീരിന് ആയുര്വേദമാണ് ഉത്തമം എന്ന അഭിപ്രായം പറഞ്ഞത് എന്റെ ഭാര്യയാണ്-ആയുര്വ്വേദമെങ്കില് ആയുര്വേദം. സമീപത്തുള്ള ആര്യവൈദ്യശാലയെ ശരണം പ്രാപിച്ചു. സരിത ലുക്കുള്ള ഒരു മഹിളാമണിയാണു വൈദ്യ. വിശദമായ പരിശോധനക്കു ശേഷം, അഞ്ചു ദിവസത്തെ തിരുമ്മല് നല്ലതായിരിക്കുമെന്നു ഡോക്ടര് അഭിപ്രായപ്പെട്ടു.
'അതിനെന്താ? നോ പ്രോബ്ലം'- ഞാന് സന്തോഷത്തോടെ സമ്മതിച്ചു.
ആ തരുണീമണി ഏഴോ ഒന്പതോ ദിവസം വേണമെങ്കിലും എന്നെ തടവിക്കോട്ടെ-വേണമെങ്കില് ജീവപര്യന്തം അവരുടെ തടവിലാക്കിക്കോട്ടെ-എനിക്കു പരിപൂര്ണ്ണ സമ്മതം.
നല്ല ദിവസമായ വ്യാഴാഴ്ച രാവിലെ എട്ടു മണിക്ക് ആദ്യത്തെ തടവല്. ഏഴരയ്ക്കു തന്നെ ഞാന് ഹാജരായി.
അല്പനേരത്തെ കാത്തിരിപ്പു കഴിഞ്ഞപ്പോള്, മമ്മുക്കോയ ഛായയുള്ള ഒരാള് വന്നു എന്നെ തടവു മുറിയിലേക്കു കൂട്ടിക്കൊണ്ടുപോയി. അവിടെച്ചെന്നപ്പോള് ഒരു ഇന്ദ്രന്സ് കൂടി കൂട്ടിനുണ്ട്.
'സാറെ, ഷര്ട്ടും മുണ്ടും അഴിച്ചു വെയ്ക്കണം-'
ഞാന് ഷര്ട്ടും മുണ്ടും അഴിച്ചു.
'സാര്, ആ ജട്ടി കൂടി ഊരണം-' അനുസരിക്കാതെ നിവൃത്തിയില്ലല്ലോ! ഞാന് തടവുകാരനാണല്ലോ!
'കുട്ടി മാമ്മ, അതു കേട്ടപ്പോള് ഞാന് സത്യമായും ഞെട്ടി മാമ്മ'- -
'യോദ്ധ'സിനിമയിലെ ജഗതിയുടെ ഡയലോഗ് ഒരു ഫ്ളാഷ് ബാക്കടിച്ചു. മനസ്സില് കൂടെ മിന്നല്പിണര് പോലെ കടന്നുപോയി.
മമ്മുക്കോയ ഒരു വലിയ കോണകം എന്റെ അരയില് ചുറ്റി. നാടകത്തിന്റെ തിരശ്ശീല പോലെ അതെന്റെ മണിമംഗലത്തിനു മറയായി മുന്നില് കിടന്നാടി.
'ഡോക്ടര് എപ്പോഴാ വരുന്നത്?'- എന്റെ ആകാംക്ഷ കയറു പൊട്ടിച്ചു.
'ഏയ്- ഡോക്ടര് ഇവിടെ വരികയില്ല-ഞങ്ങളാ ട്രീറ്റുമെന്റ് നടത്തുന്നത്-' മമ്മുക്കോയ മൊഴിഞ്ഞു.
'എന്തു ട്രീറ്റുമെന്റാണു നടത്തുവാന് പോകുന്നത്?'
'കിഴി.'
'കിഴിയോ-അതെന്താ ?''
''കിഴികള് പലവിധമുണ്ട്-നാരങ്ങാക്കിഴി, നവരക്കിഴി, എലക്കിഴി അങ്ങിനെ പലതും-സാറിനു നവരക്കിഴിയാണു പറഞ്ഞിരിക്കുന്നത്.
ഔഷധഗുണമുള്ള നവരയരി വേവിച്ചത്, മറ്റു പലവിധ എണ്ണ, കുഴമ്പു ചേരുവകള്, പിന്നെ കുറേ ആയുര്വേദ ഔഷധങ്ങള്-ഇവയെല്ലാം കൂടി ഒരു തുണിയില് കെട്ടിയാണു നവരക്കിഴി തയ്യാറാക്കുന്നത്.
കാഞ്ഞിര മരത്തിന്റെ പലകയില് തീര്ത്ത പത്തായം പോലുള്ള ഒരു മേശപ്പുറത്തു കയറി കമഴ്ന്നു കിടക്കുവാനായിരുന്നു അടുത്ത നിര്ദ്ദേശം. കോണകത്തിന്റെ കെട്ട് അവര് പിന്നില് നിന്നുമഴിച്ചു- പിന്ഭാഗത്തിപ്പോള് ഞാന് പിറന്നപടിയാണ്, എന്റെ ചളുങ്ങിത്തുടങ്ങിയ ചന്തികള് പ്രദര്ശിപ്പിച്ചുകൊണ്ട്. വൈദ്യരത്നം വരാഞ്ഞതിനു ഞാന് ദൈവത്തിനു സ്തുതി പറഞ്ഞു.
മാമ്മുക്കോയയും ഇന്ദ്രന്സും എന്റെ ഇരുവശത്തുമായി നിലയുറപ്പിച്ചു. ചൂടുള്ള ഏതോ എണ്ണയോ കുഴമ്പോ പുറത്തു കമഴ്ത്തുന്നുണ്ട്. പിന്നെ തടിയില് ചിന്തേരിട്ടു പിടിക്കുന്നതുപോലെ ഒരു പിടി-തോളു മുതല് പാദം വരെ-ഇടയ്ക്ക് നട്ടെല്ലില് വിരലുകൊണ്ട് ചില അഭ്യാസങ്ങള് കാണിക്കുന്നുണ്ട്. ഈ പ്രക്രിയ കുറേ നേരത്തേയ്ക്കു തുടര്ന്നു. അതിനുശേഷം മലര്ന്നു കിടക്കുവാന് പറഞ്ഞു.
'തന്തയ്ക്കു പിറക്കാഴിക പറയരുത്' എന്നു പറയുവാന് നാവു വളച്ചതാണ്. എങ്കിലും ഞാനതുമനുസരിച്ചു. ആവശ്യക്കാരന് ഞാനാണല്ലോ! ആവശ്യക്കാന് ഔചിത്യമില്ലല്ലോ!
മാമ്മുക്കോയയും ഇന്ദ്രന്സും ചിരിയടക്കുവാന് പാടുപെടുന്നുണ്ട് .''ഇത്ര ചിരിക്കാന് എന്തിരിക്കുന്നു?'എന്നു ചോദിക്കണമെന്നു വിചാരിച്ചെങ്കിലും-
'ഒന്നുമില്ല. അതുകൊണ്ടല്ലേ ചിരിക്കുന്നത്-'എന്ന മറുപടിക്കു സാദ്ധ്യതയുള്ളതുകൊണ്ട് ഞാന് എന്റെ അധരങ്ങള്ക്കു കടിഞ്ഞാണിട്ടു.
തിരുമ്മേല് കഴിഞ്ഞായിരുന്നു കിഴികുത്തല്. തിരിച്ചും മറിച്ചുമിട്ടു കുത്താവുന്നടൊത്തൊക്കെ കുത്തി. അതു കഴിഞ്ഞ് ചൂടുവെള്ളത്തില് ഒരു കുളിയുണ്ട്. മറ്റുള്ള രോഗികളുടെ മുന്നില് കൂടി എന്റെ 'ഫ്ളാറ്റ് ടയര്' പൃഷ്ടവും പ്രദര്ശിപ്പിച്ചുകൊണ്ട് കുളിമുറിയിലേക്കു ഞാന് ആനയിക്കപ്പെട്ടു.
ഏതായാലും സംഗതി ഏറ്റു. അഞ്ചു ദിവസത്തെ തടവല് കൊണ്ടു നീരു പരിപൂര്ണ്ണമായി വിട്ടുമാറി.
'എങ്ങനെയുണ്ടായിരുന്നു തിരുമ്മ്?' അമേരിക്കയില് നിന്നും ഭാര്യയുടെ ഓവര്സീസ് സ്നേഹാന്വേഷണം-
'തന്തയ്ക്കു പിറക്കാഴിക ഉണ്ടെങ്കില് തലേന്നേ പറയണം-'എന്ന മറുപടിയാണു നാവിന് തുമ്പത്തു വന്നത്.
എന്നാല് ഭാവി ഭവിഷ്യത്തുകള് ഒഴിവാക്കാന് വേണ്ടി 'തരക്കേടില്ലായിരുന്നു'എന്ന വാക്കില് ഞാന് മറുപടി ഒതുക്കി.
അശ്ലീലം കലര്ന്ന ഒരു കഥയല്ലേ?