കൊറോണ വൈറസിന്റെ പശ്ചാത്തലത്തില് ഫോമാ കണ് വന്ഷന് കപ്പലില് നടത്തണോ എന്നതു സംബന്ധിച്ച് നാഷനല് കമ്മിറ്റി അന്തിമ തീരുമാനമെടുത്തില്ല. ഏപ്രില് അവസാനം കമ്മിറ്റി വീണ്ടും ചേരും.
കപ്പലില് കണ് വന്ഷന് വേണ്ട എന്ന നിലപാടാണു പൊതുവെ ഉയര്ന്നത്. അളുകളുടെ സുരക്ഷിതത്വമാണു പ്രധാനമെന്നു പ്രസിഡന്റും സെക്രട്ടറിയും വ്യക്തമാക്കി.
കപ്പല് കണ് വന്ഷന് റദ്ദാക്കുന്ന പക്ഷം അടച്ച തുക തിരികെ ലഭിക്കാന് കപ്പല് കമ്പനിയുമായി ചര്ച്ച ചെയ്യാന് കണ് വന്ഷന് ചെയര്മാന് ബിജു ലോസനെ ചുമതലപ്പെടുത്തി.
പ്ലാന് ബി എന്താണെന്നു അന്തിമമായി തീരുമാനിച്ചിട്ടില്ലെന്നു ജനറല് സെക്രട്ടറി ജോസ് ഏബ്രഹാം പറഞ്ഞു. കപ്പല് കണ് വന്ഷന് ദിനങ്ങളില് തന്നെ ഹൂസ്റ്റണില് കണ് വന്ഷന് നടത്തിയാല് നന്നാകുമെന്നു ചിലര് അഭിപ്രായപ്പെട്ടു. അതല്ല, അധികാരമാറ്റം നടക്കുന്ന ഒക്ടോബറില് ഡാലസില് വച്ച് ചെറിയ തോതില് കണ്വന്ഷനും ഇലക്ഷനും നടത്താമെന്ന നിര്ദേശവും വന്നു.
എന്തായാലും അന്തിമ തീരുമാനം അടൂത്ത കമ്മിറ്റില് ആയിരിക്കും. അടുത്ത ദിവസങ്ങളില് എന്തു മാറ്റമാണ് ഉണ്ടാവുകയെന്നു അറിയില്ലല്ലൊ-ജോസ് ഏബ്രഹാം പറഞ്ഞു.
കപ്പല് കണ് വന്ഷനോട് പൊതുവില് എല്ലാവരും എതിര്പ്പാണു പ്രകടിപ്പിച്ചതെന്നു ട്രഷറര് ഷിനു ജോസഫ് പറഞ്ഞു. ഇത്രയും പേര് ഒരുമിച്ച് പോകുന്നതിനു ബുക്ക് ചെയ്തതിനാല് പണം തിരികെ കിട്ടുന്നത് സംബന്ധിച്ച് വ്യക്തത വരേണ്ടതുണ്ട്. എന്തായാലും അംഗങ്ങളുടെ സുരക്ഷയാണു തങ്ങള്ക്ക് എല്ലാവര്ക്കും പ്രധാനം.
അതേ സമയം, പുതുതായി രണ്ട് അസോസിയേഷനുകള്ക്കു ഫോമയില് അംഗത്വം നല്കാനും കമ്മിറ്റി തീരുമാനിച്ചു. കാലിഫോര്ണീയയിലെ ലോസ് ഏഞ്ചലസില് നിന്നും ഫ്ലോറിഡയിലെ ഓര്ലാന്ഡോയില് നിന്നുമുള്ള സംഘടനകള്ക്കാണു അംഗത്വം നല്കുക. മറ്റു മൂന്നു സംഘനകളുടെ അപേക്ഷ കൂടി ലഭിച്ചുവെങ്കിലും അവയെപ്പറ്റി തീരുമാനം എടുത്തില്ല.
ഫോമാ വിമന്സ് ഫോറം നല്കുന്ന നഴ്സിംഗ് സ്കോളര്ഷിപ്പ് 50 എന്നതിനു പകരം 55 എണ്ണം നല്കും. മാര്ച്ച് 21-നു കേരളത്തില് വച്ച് വിതരണം ചെയ്യാന് തീരുമാനിച്ചത് മാറ്റി വച്ചു.