കോവിഡ് പ്രതിരോധത്തിന് ഉപയോഗിക്കുന്ന അണുനാശിനി മനുഷ്യരുടെ മേല്‍ പ്രയോഗിച്ച്‌ ഉത്തര്‍പ്രദേശ് പൊലീസ്. റായ്ബറേലിയിലാണ് കുടിയേറ്റ തൊഴിലാളികളുടെ പുറത്ത് യുപി പൊലീസ് അണുനാശിനി പ്രയോഗിച്ചത്.

ഞായറാഴ്ച ബറേലിയിലെ ബസ് സ്റ്റാന്റിലാണ് സംഭവം നടന്നത്. ഡല്‍ഹി, നോയിഡ എന്നിവിടങ്ങളില്‍ നിന്ന് എത്തിയ കുടിയേറ്റ തൊഴിലാളികള്‍ക്ക് മേലാണ് അണുനാശിനി പ്രയോഗിച്ചത്. ഇവരെ ബസുകളില്‍ കയറ്റുന്നതിന് മുന്‍പായിരുന്നു പൊലീസിന്റെ ക്രൂര നടപടി.

'അമ്ബതോളം വരുന്ന ഞങ്ങള്‍ ബസ് സ്റ്റാന്റില്‍ ബസുകള്‍ക്കും ഭക്ഷണത്തിനും വേണ്ടി കാത്തിരിക്കുയായിരുന്നു. അപ്പോഴാണ് ഒരുകൂട്ടം ആളുകള്‍ വന്ന് ഞങ്ങള്‍ക്ക് മേല്‍ അണുനാശിനി പ്രയോഗിച്ചത്. ഞങ്ങളെ ശുദ്ധീകരിക്കാന്‍ വന്നവരാണ് എന്നാണ് അവര്‍ പറഞ്ഞത്. സ്ത്രീകളും കുട്ടികളും പേടിച്ച്‌ കരയുകയായിരുന്നു'- തൊഴിലാളിയായ മുഹമ്മദ് അഫ്‌സല്‍ പറയുന്നു.