സഞ്ജയാ,
എന്താണിത്?
വല്ലാതെ, കാറ്റിലുലയുന്നല്ലൊ നീ.
വായിക്കാനാവുന്നില്ലല്ലൊ,
എനിക്കിപ്പോള് നിന്നെ.
2
പിരിച്ചുവിടാനുമാവുന്നില്ലല്ലൊ;
ശീലമായ്പ്പോയല്ലൊ നീ എനിക്ക്.
എവിടെ കിട്ടുമെനിക്കിനിയൊരു
നിസ്വാര്ത്ഥ, സത്യവചസ്സിനെ;
'ഹത കുഞ്ജര'
പൂജ്യം സത്യമെന്നെഴുതുന്നവനെ.
'ശിഖണ്ഡി'യെ, ഈണത്തില് പാടാത്തവനെ.
'ഊരുഭംഗ'ത്തെ വെള്ളപൂശി കാട്ടാത്തവനെ.
പുത്തനദൃശ്യവലയെറിഞ്ഞ്,
മാനത്തെ മാനിനെ വിടുവിക്കുന്നവനെ?
3
ഞാനറിയുന്നു സഞ്ജയാ,
ഹസ്തിനാപുരത്തിന്റെ
നാല് തൂണുകളിലുമിപ്പോള്
ഹിരണ്യകശിപുവാണെന്ന്.
സഞ്ജയാ,
നിന്നെ പറഞ്ഞു വിട്ടാല്,
പിന്നെയാര് പറയുമീ ജന്മാന്ധനോട്, കുരുക്ഷേത്രം?
യുദ്ധമറിയാതെയെങ്ങിനെയെഴുതും
ഞാനെന്റെ നാടിന്റെ കഥ?
നിസ്സഹായനാണ് ഞാനിന്ന് സഞ്ജയാ.
നമ്പാനില്ലാതെയായല്ലൊ,
ഒരു തൂണും, തുരുമ്പുമെനിക്കിന്നീശ്വരാ!
നിന്റെ നാമവുമെനിക്കിപ്പോള്
സ്വന്തമല്ലാതായല്ലൊ, ദൈവമേ!