കാലടി: ടൊവിനോ തോമസിനെ നായകനാക്കി ബേസില് ജോസഫ് സംവിധാനം ചെയ്യുന്ന "മിന്നല് മുരളി' സിനിമയുടെ സെറ്റ് തകര്ത്ത നിലയില്. കാലടി മണപ്പുറത്ത് ലക്ഷങ്ങള് മുടക്കി വിദേശ നിര്മ്മിത മാതൃകയില് നിര്മിച്ച പള്ളിയുടെ സെറ്റാണ് അക്രമികള് അടിച്ചു തകര്ത്തത്.അതേസമയം, ആക്രമത്തിന് നേതൃത്വം നല്കിയവരെ അഭിനന്ദിച്ച് അന്താരാഷ്ട്രീയ ഹിന്ദു പരിഷത്ത് (എഎച്ച്പി) രംഗത്തെത്തി. ക്ഷേത്രത്തിന് സമീപം പള്ളിയുടെ സെറ്റ് ഇടുന്നത് ഹിന്ദുവിന്റെ സ്വാഭിമാനം തകര്ക്കുമെന്ന് എഎച്ച്പി ജനറല് സെക്രട്ടറി ഹരി പാലോട് ഫേസ്ബുക്ക് പോസ്റ്റില് പറഞ്ഞു.
ഇത് തകര്ത്തത്തിന്റെയും തകര്ത്തവരുടെയും ചിത്രങ്ങളും സോഷ്യല് മീഡിയയില് പ്രചരിക്കുന്നുണ്ട്. മാര്ച്ചില് നിര്മിച്ച സെറ്റില് ലോക്ക്ഡൗണ് കാരണം ഷൂട്ടിംഗ് നീണ്ടുപോവുകയായിരുന്നു. വയനാട്ടില് ആദ്യ ഷെഡ്യൂള് പൂര്ത്തിയാക്കിയ മിന്നല് മുരളിയുടെ രണ്ടാം ഘട്ട ചിത്രീകരണമാണ് മണപ്പുറത്തെ സെറ്റില് നടക്കേണ്ടിയിരുന്നത്.
അതേസമയം, ക്ഷേത്രം അധികൃതരില് നിന്ന് ഉള്പ്പെടെ എല്ലാ വകുപ്പുകളില് നിന്നും അനുമതി വാങ്ങിയാണ് സെറ്റ് നിര്മ്മിച്ചതെന്നും ചിത്രത്തിന്റെ നിര്മാതാവ് സോഫിയാ പോള് പറഞ്ഞു.