കൊച്ചി: സുരേഷ് ഗോപിയുടെ 250-ാം ചിത്രത്തിന് കോടതിയുടെ വിലക്ക്. കടുവാക്കുന്നേല് കുറുവച്ചന് എന്ന കഥാപാത്രമായി സുരേഷ് ഗോപി എത്തുന്ന ചിത്രത്തിനാണ് വിലക്ക് ഏര്പ്പെടുത്തിയിരിക്കുന്നത്.
പകര്പ്പവകാശത്തിന്റെ പേരില് സമര്പ്പിച്ച പരാതി പരിഗണിച്ച് എറണാകുളം ജില്ലാ കോടതിയുടേതാണ് വിധി. മുളകുപാടം ഫിലിംസിന്റെ ബാനറില് ടോമിച്ചന് മുളകുപാടം നിര്മ്മിക്കാനിരുന്ന ചിത്രം സംവിധാനം ചെയ്യുന്നത് മാത്യു തോമസ്, രചന ഷിബിന് ഫ്രാന്സിസ് എന്നിവരാണ്.
ഷാജി കൈലാസിന്റെ സംവിധാനത്തില് പൃഥ്വിരാജിനെ നായകനാക്കി പ്രഖ്യാപിച്ച കടുവ എന്ന ചിത്രത്തിന്റെ അണിയറപ്രവര്ത്തകരാണ് പരാതി നല്കിയത്. കടുവ എന്ന ചിത്രത്തിന്റെ തിരക്കഥയും കഥാപാത്രവും പകര്പ്പവകാശവും ലംഘിച്ചെന്ന പരാതി പരിശോധിച്ചാണ് സുരേഷ് ഗോപി ചിത്രം കോടതി വിലക്കിയത്. സംവിധായകനും തിരക്കഥാകൃത്തുമായ ജിനു ഏബ്രഹാം ആണ് 'കടുവ'യുടെ രചന നിര്വ്വഹിച്ചിരിക്കുന്നത്.
രണ്ടു ചിത്രങ്ങളുടെയും പ്രമേയം ഒന്നായതോടെയാണ് ആദ്യം പ്രഖ്യാപിച്ച കടുവയുടെ അണിയറ പ്രവര്ത്തകര് നിയമനടപടിക്ക് തയാറായത്. സുരേഷ്ഗോപി ചിത്രത്തിന്റെ ചിത്രീകരണം തടയണമെന്നാവശ്യപ്പെട്ട് ജിനുവാണ് എറണാകുളം ജില്ലാ കോടതിയില് ഹര്ജി നല്കിയത്.
ഹര്ജി സ്വീകരിച്ച കോടതി സുരേഷ്ഗോപി ചിത്രത്തിന്റെ ഷൂട്ടിംഗ്, സോഷ്യല് മാധ്യമങ്ങളിലുള്പ്പെടെ നടത്തുന്ന പ്രചരണം എന്നിവ തടഞ്ഞ് ഉത്തരവായി.
സുരേഷ് ഗോപിയുടെ ജന്മദിനമായ ജൂണ് 26ന് ചിത്രത്തിന്റെ മോഷന് പോസ്റ്റര് പുറത്തിറങ്ങിയിരുന്നു. ഇതിന് പിന്നാലെയാണ് കടുവ എന്ന ചിത്രത്തിന്റെ അണിയറപ്രവര്ത്തകര് പരാതി നല്കിയത്.