ഒരിക്കൽ കൂടി പ്രണയിക്കണം..
മരണമില്ലാത്ത
അനശ്വരപ്രണയത്തിന്റെ
തേൻതുള്ളികൾ രുചിക്കണം.
കാലത്തിന്റെ
കൽപ്പടവുകളിലെങ്ങോ
കളഞ്ഞുപോയ
പ്രണയകാലത്തിലേക്ക്
നിന്റെ കൈപിടിച്ച്
തിരികെ നടക്കണം..
വരൂ പ്രിയനെ,
നീലപൈന്മരങ്ങൾ
തണൽ വിരിച്ച,
പ്രണയപുഷ്പങ്ങൾ
വർണം വിടർത്തുന്ന,
കോടമഞ്ഞിന്റെ
നീലകഞ്ചുകമണിഞ്ഞ
ഈ മനോഹര താഴ് വരയിലേക്ക്..
ഇവിടെ,
വാനമ്പാടികൾ പൊഴിക്കുന്ന
മധുരഗീതങ്ങൾക്കൊപ്പം,
മീവൽ പക്ഷികൾക്കു
കൂടൊരുക്കുന്ന
ദേവദാരു ശിഖരങ്ങൾ,
വിരഹത്തിന്റെ മഞ്ഞുരുക്കി
പ്രണയാമൃതം തൂകുമ്പോൾ,
തുള്ളിതുടിക്കുന്ന
വർണശലഭങ്ങൾക്കൊപ്പം
നമുടെ പ്രണയം
പങ്കുവെക്കാം..
തണുത്തുറഞ്ഞുപോയ
മധുചഷകം വീണ്ടും നിറക്കാം
പിന്നെ നമുക്കൊരുമിച്ചു നുകരാം
അതിനവസാന തുള്ളിവരേയും..