സ്വര്‍ണ്ണമത്സ്യം (കവിത-ശ്രീദേവി)

സ്വപ്നത്തില്‍ നല്ലൊരു സ്വര്‍ണ്ണ മത്സ്യം

(ശല്‍ക്കങ്ങള്‍ മിന്നുന്നു വെള്ളി പോലെ)

വെള്ളമില്ലാത്തൊരു ചില്ലു ജാറില്‍

തുള്ളിപ്പിടയ്ക്കവേ, നീറിയുള്ളം...

എങ്കിലുമെന്തൊരു ചന്തമെന്നോ

തങ്ക മത്സ്യത്തിന്റെ നൃത്തലാസ്യം..!

ഒട്ടു നേരം കൂടി കണ്ടിരുന്നാല്‍

കഷ്ടമല്ലേ; യിതു ചത്തു പോകും..!

ചുറ്റിനും വെള്ളത്തിനായ് തിരഞ്ഞേന്‍,

കുറ്റിരുട്ടിന്‍ കടല്‍ കണ്ടു നെഞ്ചം

പൊട്ടുമാറേങ്ങിക്കരഞ്ഞ നീരാല്‍

ചില്ലു ജാറാഹാ, നിറഞ്ഞു തൂവി..!

പെട്ടെന്നെന്‍ കണ്‍കുഴിക്കുള്ളിലെന്തോ

പൊട്ടി വീഴുമ്പോലെ ചുട്ടു നീറ്റല്‍;

ഞെട്ടി ഞാന്‍ കണ്‍ മിഴിച്ചൊന്നു നോക്കാന്‍

അത്ര മേലായാസപ്പെട്ടു തോല്‌ക്കെ

വെള്ളമില്ലാത്തൊരു ചില്ലു ജാറില്‍

തുള്ളിപ്പിടയ്ക്കുന്ന മത്സ്യമായ് ഞാന്‍..!

വെള്ളി ശല്‍ക്കങ്ങള്‍ തറച്ചു കൊണ്ടെന്‍

കണ്‍ വെട്ടമപ്പാടെ മാഞ്ഞു പോയി..!