അപകടകരമായ വെല്ലുവിളിയായി സംഘപരിവാര് മാറുന്നുവെന്നു
കുറ്റപ്പെടുത്തി സാംസ്കാരികരംഗത്തെ പ്രമുഖരായ എഴുപതോളം പേര് ചേര്ന്നു
സര്വ ധര്മ സമഭാവന എന്നപേരില് പുതിയ പ്രസ്ഥാനം.
പുതിയ പ്രതിരോധ മാതൃകകള് സൃഷ്ടിക്കുന്നതിനുള്ള കാലം
വൈകിയിരിക്കുകയാണെന്നും ഇതിനുളള ശ്രമത്തിന്റെ ഭാഗമായി ധൈഷണിക നേതൃത്വം
ആവിഷ്കരിക്കുകയാണു ലക്ഷ്യമെന്നും എം.ടി.വാസുദേവന് നായരും അടൂര്
ഗോപാലകൃഷ്ണനും ഉള്പ്പെടെയുളളവര് ചേര്ന്ന സാംസ്കാരിക കൂട്ടായ്മ
വ്യക്തമാക്കി.
സംരംഭത്തിന്റെ വിജയത്തിന്, എല്ലാ മതങ്ങളിലും രാഷ്ട്രീയപ്രസ്ഥാനങ്ങളിലും
പെട്ടവരെ സ്വാഗതം ചെയ്യുന്നതായും പറഞ്ഞു. എം.കെ.സാനു, ഡോ.
കെ.എന്.പണിക്കര്, എം.ലീലാവതി, കെ.സച്ചിദാനന്ദന്, സക്കറിയ, സേതു,
പെരുമ്പടവം ശ്രീധരന്, വൈശാഖന്, ലെനിന് രാജേന്ദ്രന്, ടി.വി.ചന്ദ്രന്,
ജോയ് മാത്യു തുടങ്ങിവരാണു കൂട്ടായ്മയില്.
ഇന്ത്യയെ ഹിന്ദുമത
രാഷ്ട്രമാക്കുക എന്ന ലക്ഷ്യത്തോടെ, മതത്തെ രാഷ്ട്രീയാധികാരത്തിന്
ഉപകരണമാക്കുന്ന സംഘപരിവാറിന്റെ രാഷ്ട്രീയ പ്രസ്ഥാനമാണു രാജ്യം
ഭരിക്കുന്നതെന്നു കൂട്ടായ്മ ആരോപിച്ചു.
കൊളോണിയല് ചൂഷണയന്ത്രമായി പ്രവര്ത്തിച്ച ആധുനിക ഹിന്ദുമതത്തെയാണു
സംഘപരിവാര് ഭാരതീയ സംസ്കാരത്തിന്റെയും പാരമ്പര്യത്തിന്റെയും പേരില്
മഹത്തായ ഇന്ത്യന് ജനജീവിതത്തിനു മേല് കെട്ടിവയ്ക്കാന് ശ്രമിക്കുന്നത്.
സംഘപരിവാറിന്റെ ഹിന്ദുത്വ രാഷ്ട്രീയത്തില് നിന്നുള്ള മോചനത്തിലൂടെ മാത്രമേ
ഇന്ത്യന് ജനത സ്വതന്ത്രരാകൂ. ഗാന്ധിജിയുടെയും ശ്രീനാരായണ ഗുരുവിന്റെയും
ഡോ. അംബേദ്ക്കറുടെയും മതചിന്തകള് പോലെ, മാര്ക്സിന്റെ മതത്തോടുള്ള
യാഥാര്ഥ്യബോധം നിറഞ്ഞ സമീപനവും ഈ സംരംഭത്തിനു ശക്തി പകരുന്നുവെന്നു
സാംസ്കാരിക നായകര് പറഞ്ഞു.