കവെന്ട്രി: യുകെയിലെ ദേശീയ നിയമങ്ങള്ക്കനുസൃതമായി ഗ്രേറ്റ് ബ്രിട്ടണ് സീറോ മലബാര് രൂപതയില് വിശ്വാസപരിശീലനം ഒരുക്കുന്നതിനുള്ള സേഫ് ഗാര്ഡിംഗ് മിനിസ്ട്രിയുടെ ആദ്യ സമ്മേളനം കവെന്ട്രിയിലെ സാള്ട് ലി ചര്ച്ചില് നടന്നു.
മാര് ജോസഫ് സ്രാമ്പിക്കല് സമ്മേളനം ഉദ്ഘാടനം ചെയ്തു. സമ്മേളനത്തില്, രൂപതയുടെ ഇപ്പോഴുള്ള സേഫ് ഗാര്ഡിംഗ് സംവിധാനത്തെക്കുറിച്ചും നാഷണല് കാത്തോലിക് സേഫ് ഗാര്ഡിംഗ് കമ്മീഷന്റെ പോളിസികളും നിര്ദ്ദേശങ്ങളും നടപ്പാക്കുന്നതിന്റെ സാധ്യതകളെക്കുറിച്ചും ചര്ച്ചകള് നടത്തി തീരുമാനങ്ങളെടുത്തു. രൂപതയുടെ ഡിസ്ക്ലോഷര് ആന്ഡ് ബാറിംഗ് സര്വീസ് ചുമതലകള് ലിജോ രെഞ്ചി, ജസ്റ്റിന് ചാണ്ടി എന്നിവര്ക്കും രൂപതാതലത്തിലുള്ള സേഫ് ഗാര്ഡിങ് ട്രെയിനിംഗ് ചുമതല ടോമി സെബാസ്റ്റ്യനും മാര് ജോസഫ് സ്രാമ്പിക്കല് നല്കി.
രൂപത സേഫ് ഗാര്ഡിങ് കമ്മീഷന്റെ നേതൃത്വത്തില്, രൂപതയിലെ എല്ലാ ഇടവക, മിഷന്, വിശുദ്ധ കുര്ബാന കേന്ദ്രങ്ങളിലും സേഫ് ഗാര്ഡിംഗ് ടീമുകള് രൂപീകരിക്കും. രൂപത സേഫ് ഗാര്ഡിംഗ് കമ്മീഷന്റെ പ്രവര്ത്തനങ്ങള്ക്കു എല്ലാവരുടെയും പിന്തുണയും സഹകരണവും മാര് ജോസഫ് സ്രാമ്പിക്കല് അഭ്യര്ഥിച്ചു.
രൂപതയുടെ ഔദ്യോഗിക സമ്മേളനങ്ങളില് കുട്ടികള്ക്കും സവിശേഷ ശ്രദ്ധ ആവശ്യമുള്ള മുതിര്ന്നവര്ക്കും നിയമപരമായ പരിരക്ഷ ഉറപ്പു വരുത്തുക എന്നതാണ് കമ്മീഷന്റെ ലക്ഷ്യം. കഴിഞ്ഞ വര്ഷം നവംബറിലാണ് സേഫ് ഗാര്ഡിംഗ് കമ്മീഷന് സ്ഥാപിച്ചുകൊണ്ട് രൂപതാധ്യക്ഷന് ഉത്തരവിറക്കിയത്.
സമ്മേളനത്തില് കമ്മീഷന് ചെയര്പേഴ്സണ് ഡോ. മിനി നെല്സണ് (നോറിച്ച്), രൂപത സേഫ് ഗാര്ഡിംഗ് കോ ഓര്ഡിനേറ്റര് ലിജോ രെഞ്ചി (പോര്ട്സ്മൗത്ത്), കമ്മീഷന് അംഗങ്ങളായ ടോമി സെബാസ്റ്റ്യന് (ചെംസ്ഫോര്ഡ്), ഡോ. മാത്യു ജോസഫ് (സാള്ട് ലി), ആന്സി ജോണ്സന് (കവെന്ട്രി), പോള് ആന്റണി (ഓക്സ്ഫോര്ഡ്), ഡോ. ഷിബു വെളുത്തപ്പിള്ളി (ബ്ലാക്ക്ബേണ്), ജസ്റ്റിന് ചാണ്ടി (റെഡ് ഹില് ), ജിന്സി ജോര്ജ് (ന്യൂപോര്ട്ട്), ബിന്ദു ജോബി (അബര്ദ്ദീന്), ഫാ. ജോയി വയലില് (കാറ്റിക്കിസം കമ്മീഷന്ചെയര്മാന്), ഫാ. ജോര്ജ് ചേലക്കല് (വൈദിക പ്രതിനിധി), റവ. ഡോ. വര്ഗീസ് പുത്തന്പുരക്കല് (യൂത്ത് കമ്മീഷന് ചെയര്മാന്), സിസ്റ്റര് സുഷ നരിയന്കുന്നേല് (സന്യസ്ത പ്രതിനിധി) എന്നിവര് സംബന്ധിച്ചു.
റിപ്പോര്ട്ട്: ഫാ. ബിജു കുന്നയ്ക്കാട്ട്