മലയാള സിനിമയിലൊരു ചരിത്ര വിജയമായിരുന്നു ദൃശ്യം. ജീത്തു ജോസഫ് തിരക്കഥയെഴുതി സംവിധാനം ചെയ്ത ചിത്രം മറ്റ് ഭാഷകളിലേക്കും റീമേക്ക് ചെയ്യപ്പെടുകയുണ്ടായി. ഇപ്പോഴിതാ ദൃശ്യത്തിന് രണ്ടാം ഭാഗം ഒരുങ്ങുകയാണ്. മോഹന്ലാലും ജീത്തുവും വീണ്ടും കൈകോര്ക്കുമ്പോള് ആരാധകരുടെ പ്രതീക്ഷയും വാനോളം ഉയര്ന്നിരിക്കുകയാണ്. ചിത്രവുമായി ബന്ധപ്പെട്ടൊരു വാര്ത്ത പുറത്തു വിട്ടിരിക്കുകയാണ് ജീത്തു ജോസഫ്. ഒന്നാം ഭാഗത്തില് നിന്നും തീര്ത്തും വ്യത്യസ്തമായിരിക്കും രണ്ടാം ഭാഗം എന്നാണ് ജീത്തു പറയുന്നത്. തന്റെ കുടുംബത്തിനു വേണ്ടി കൊലപാതകം മറച്ചുവെക്കുന്ന ജോര്ജുകുട്ടിയെ ആയിരുന്നു ഒന്നാം ഭാഗത്തില് കണ്ടത്.
രണ്ടാം ഭാഗം ക്രൈമുമായി ബന്ധപ്പെട്ടതായിരിക്കില്ലെന്നും പൂര്ണമായും കുടുംബകഥയായിരിക്കും പറയുകയെന്നുമാണ് ജീത്തു അറിയിച്ചിരിക്കുന്നത്. ഫാമിലി ഡ്രാമയായിരിക്കും രണ്ടാം ഭാഗം. ക്രൈം ആദ്യ ഭാഗത്തില് തന്നെ അവസാനിച്ചു. ജോര്ജുകുട്ടിയുടെ കുടുംബത്തിന്റെ ഇപ്പോഴത്തെ ജീവതമാണ് രണ്ടാം ഭാഗം പറയുന്നത്.
ത്രില്ലറിനേക്കാള് ഉപരിയായി കുടുംബ ബന്ധങ്ങള്ക്കും വൈകാരികതയ്ക്കുമാണ് രണ്ടാം ഭാഗത്തില് ശ്രദ്ധ കൊടുക്കുന്നത്. അടുത്ത മാസം മുതല് ദൃശ്യം 2 വിന്റെ ചിത്രീകരണം ആരംഭിക്കുമെന്നും ജീത്തു ജോസഫ് അറിയിച്ചു. സെപ്തംബര് 14 മുതല് ചിത്രീകരണം ആരംഭിക്കാനാണ് തീരുമാനം. പ്രധാന വേഷങ്ങളിലെത്തുന്ന മോഹന്ലാലിനോടും മീനയോടും ക്വാറന്റൈനില് പോകാനായി ആവശ്യപ്പെട്ടിട്ടുണ്ട്. ആദ്യം ചിത്രീകരിക്കുക ഇന്ഡോര് രംഗങ്ങളായിരിക്കുമെന്നും ജീത്തു വ്യക്തമാക്കി. ആള്ക്കൂട്ടം ചിത്രത്തില് വലിയൊരു ഘടകമാണെന്നും ആ രംഗങ്ങള് ചിത്രീകരിക്കാന് സമയം വേണ്ടിവരുമെന്നും അദ്ദേഹം പറഞ്ഞു.
മോഹന്ലാലും ജീത്തുവും ഒരുമിക്കുന്ന മറ്റൊരു ചിത്രമാണ് റാം. വലിയ ക്യാന്വാസിലൊരുങ്ങുന്ന ചിത്രമാണ് റാം. നിലവിലെ സാഹചര്യത്തില് റാമിന്റെ ചിത്രീകരണം സാധ്യമല്ല. ഇതിനിടെയാണ് ജീത്തു ദൃശ്യം 2വിന്റെ തിരക്കഥ പൂര്ത്തിയാക്കുന്നത്.