ചെറുതോണി: ഷട്ടറുകള് മുഴുവന് തുറന്നിട്ടും പുറത്തേക്കൊഴുകുന്നതിനെക്കാള് കൂടുതല് ജലമാണ് ഇടുക്കി ഡാമിലേക്ക് ഒഴുകിയെത്തുന്നത്.
ചെറുതോണി പട്ടണത്തില് റോഡിന്റെ വശങ്ങള് ഇടിഞ്ഞു. ചെറുതോണി-കട്ടപ്പന റൂട്ടില് ഗതാഗതം പൂര്ണമായി സ്തംഭിച്ചു. വൈദ്യുതി ബന്ധവും വിച്ഛേദിച്ചു. അണക്കെട്ടിന്റെ വൃഷ്ടിപ്രദേശത്ത് കനത്ത മഴ തുടരുകയാണ്. അഞ്ച് ഷട്ടറുകളും തുറന്നതോടെ സെക്കന്ഡില് 300 ക്യുമെക്സ് വെള്ളം വീതം പുറത്തേക്കൊഴുക്കിയിരുന്നത് ഘട്ടം ഘട്ടമായി 400,500, 600 ക്യുമെക്സ് വീതമാക്കുമെന്ന് കളക് ടര് അറിയിച്ചു.
നിലവില് 2401.72 അടിയാണ് ജലനിരപ്പ്. അണക്കെട്ടിന്റെ പരമാവധി സംഭരണ ശേഷി 2403 അടിയാണ്.
അങ്കമാലി കാലടി തുടങ്ങിയ ജനവാസ മേഖലകളിലും ജലനിരപ്പ് ഉയരുന്നുണ്ട്. പെരിയാര് തീരത്ത് താമസിക്കുന്നവര് അതീവ ജാഗ്രത പാലിക്കാന് അധികൃതര് നിര്ദേശം നല്കിയിട്ടുണ്ട്.
മഴ എതാനും ദിവസങ്ങള് കൂടി തുടരുമെന്ന് കാലാവസ്ഥ നിരീക്ഷണ കേന്ദ്രങ്ങള് അറിയിച്ചു.
ദുരന്ത നിവാരണ വകുപ്പ് വയനാട് ജില്ലയില് ഈ മാസം 14 വരെ റെഡ് അലേര്ട്ട് പ്രഖ്യാപിച്ചിരിക്കുകയാണ്. മഴ രൂക്ഷമായതിനെ തുടര്ന്ന് ജില്ല തീര്ത്തും ഒറ്റപ്പെട്ടിരിക്കുകയാണ്.
ഇടുക്കിയില് 13-ാം തീയതി വരെ കനത്ത മഴയുണ്ടാകുമെന്ന കാലാവസ്ഥ നിരീക്ഷണ കേന്ദ്രത്തിന്റെ റിപ്പോര്ട്ടിന്റെ പശ്ചാത്തലത്തിലാണ് 13-ാം തീയതി വരെ റെഡ് അലേര്ട്ട് പ്രഖ്യാപിച്ചിരിക്കുന്നത്.
ആലപ്പുഴ, കോട്ടയം, എറണാകുളം, പാലക്കാട്, മലപ്പുറം, കോഴിക്കോട് തുടങ്ങിയ ജില്ലകളില് ശനിയാഴ്ച വരെ റെഡ് അലേര്ട്ട് പ്രഖ്യാപിച്ചിട്ടുണ്ട്.
മുഖ്യമന്ത്രി ശനിയാഴ്ച പ്രളയബാധിത പ്രദേശങ്ങള് സന്ദര്ശിക്കും. രാവിലെ 7.30 മുതലാണ് സന്ദര്ശനം.
ഹെലികോപ്റ്റര് മാര്ഗമാകും ദുരിത മേഖലയിലെത്തുക. മുഖ്യമന്ത്രിക്കൊപ്പം റവന്യുമന്ത്രി, ചീഫ് സെക്രട്ടറി, ഡി.ജി.പി. എന്നിവരും ഉണ്ടാകും. തിരുവനന്തപുരത്തെ സര്ക്കാരിന്റെ ഓണാഘോഷ പരിപാടികള് മാറ്റി വക്കണമെന്ന് പ്രതിപക്ഷ നേതാവ് രമേശ് ചെന്നിത്തല ആവശ്യപ്പെട്ടു.
ആഘോഷങ്ങള്ക്ക് വേണ്ടി ചിലവഴിക്കുന്ന 30 കോടി രൂപ ഈ ദുരിതാശ്വാസ പ്രവര്ത്തനങ്ങള്ക്ക് വേണ്ടി ഉപയോഗിക്കണമെന്നും രമേശ് ചെന്നിത്തല ആവശ്യപ്പെട്ടു.