തിരുവനന്തപുരം: കോണ്ഗ്രസ്
അധ്യക്ഷന് രാഹുല് ഗാന്ധിയെ കേരളത്തില് മത്സരിക്കാന് ക്ഷണിച്ച് കോണ്ഗ്രസ്
നേതാക്കളായ വി.ടി ബല്റാമും കെ.എം. ഷാജിയും. രാഹുല് ഗാന്ധി വയനാട്ടില്
മത്സരിക്കണമെന്നും അടുത്ത പ്രധാനമന്ത്രി തെക്കേ ഇന്ത്യയുടെ പ്രതിനിധി കൂടി
ആവുന്നത് ഇന്ത്യ എന്ന ആശയത്തെ ശക്തിപ്പെടുത്തുമെന്നുമായിരുന്നു വി.ടി ബല്റാം
പറഞ്ഞത്.
രാഹുല് മുന്നോട്ടു വെക്കുന്ന പുതിയ രാഷ്ട്രീയത്തിന്
വിളനിലമാകാന് എന്തുകൊണ്ടും അനുയോജ്യം കേരളത്തിന്റെ മണ്ണാണെന്നും വി.ടി ബല്റാം
പറഞ്ഞു.
ഇതിന് പിന്നാലെ വി.ടിയുടെ അഭിപ്രായത്തെ പിന്തുണച്ച് കെ.എം ഷാജിയും
എത്തി. രാഹുല് ഗാന്ധി കേരളത്തില് തന്നെയാണ് മത്സരിക്കേണ്ടതെന്നും രാജ്യത്തെ
ഫാഷിസ്റ്റുകള്ക്കെതിരെയുള്ള രാഷ്ട്രീയമായ പോരാട്ടത്തിന്റെ സര്വ്വസൈന്യാധിപന്
കേരളമാണ് അനുയോജ്യമെന്നുമായിരുന്നു കെ.എം ഷാജിയുടെ
വാക്കുകള്.
കേരളത്തില് അദ്ദേഹം
മത്സരിക്കുന്നതോടെ രാഷ്ട്രീയ ഭീകരതക്കെതിരെയുള്ള പോരാട്ടം കൂടിയായിരിക്കും അത്.
ദക്ഷിണേന്ത്യയിലെ മതേതര മുന്നേറ്റത്തിന് കരുത്തും പ്രചോദനവുമായി അദ്ദേഹത്തിന്റെ
സ്ഥാനാര്ത്ഥിത്വം മാറും.
കേരളത്തെ സംബന്ധിച്ച് ഓരോ മലയാളിക്കും അഭിമാനവും
സന്തോഷവും പകരുന്ന ഒന്നാണ് രാഹുലിന്റെ സ്ഥാനാര്ത്ഥിത്വം. രാഹുല്ജിയെ
കേരളത്തിലേക്ക് ഊഷ്മളമായി സ്വാഗതം ചെയ്യുന്നെന്നും കെ.എം ഷാജി പറഞ്ഞു.
നേരത്തെ രാഹുല് ഗാന്ധി കര്ണാടകയില് മത്സരിക്കണമെന്ന ആവശ്യവുമായി കര്ണാടകയിലെ
കോണ്ഗ്രസ് നേതാക്കളും രംഗത്തെത്തിയിരുന്നു.
ഇന്ത്യയുടെ അടുത്ത
പ്രധാനമന്ത്രിയാകാന് പോകുന്ന രാഹുല് ഗാന്ധി കര്ണാടകയില് നിന്ന് ജനവിധി
തേടണമെന്നാണ് ആഗ്രഹിക്കുന്നതെന്ന് കര്ണാടക മുന്മുഖ്യമന്ത്രി സിദ്ധരാമയ്യ
ട്വീറ്റ് ചെയ്തിരുന്നു.