ന്യൂഡല്ഹി: ജെ.എന്.യു രാജ്യദ്രോഹക്കേസില് കനയ്യ കുമാര് ഉള്പ്പെടെയുള്ള മുന് വിദ്യാര്ഥികളെ വിചാരണ ചെയ്യാന് ഡല്ഹി സര്ക്കാര് അനുമതി നല്കി.
നാലുവര്ഷം മുമ്പാണ് ഇവര്ക്കെതിരെ കേസ് രജിസ്റ്റര് ചെയ്തത്. യൂണിവേഴ്സിറ്റിയില് നടന്ന പ്രതിഷേധത്തില് രാജ്യദ്രോഹപരമായ മുദ്രാവാക്യം മുഴക്കിയെന്നതാണ് ഇവര്ക്കെതിരായ കേസ്. ഇവരെ വിചാരണ ചെയ്യാനുള്ള അനുമതി ഡല്ഹി സര്ക്കാര് വൈകിപ്പിച്ചതിനെ തുടര്ന്ന് കേസിന്റെ നടപടിക്രമങ്ങള് നിലച്ചിരിക്കുകയായിരുന്നു.
ഡല്ഹി ചീഫ് മെട്രോപൊളീറ്റന് മജിസ്ട്രേറ്റ് കോടതിയിലാണ് ഇവര്ക്കെതിരായ കേസുള്ളത്. കനയ്യ കുമാര്, ഉമര് ഖാലിദ്, അനിര്ബന് ഭട്ടാചാര്യ, ആക്കിബ് ഹുസൈന്, ഉമര് ഗുല്, മുജീബ് എന്നിവരാണ് കേസിലെ പ്രതികള്. 2016 ഫെബ്രുവരി ഒമ്പതിനാണ് കേസിനാസ്പദമായ സംഭവം നടന്നത്. ഇക്കഴിഞ്ഞ ജനുവരി 14നാണ് ഇവര്ക്കെതിരായ കുറ്റപത്രം ഡല്ഹി പോലീസ് കോടതിയില് സമര്പ്പിച്ചത്.