ചിരിച്ചാലുടന് തരും-
ജീവിതം, തീക്കാറ്റിന്റെ
കനലും, മണല്ച്ചൂടും
കണ്ണീരും, നിരാശയും,
കരിന്തേള്ക്കുത്തും,
നിഴല്ച്ചുഴിയും,
വാക്കില്ത്തട്ടിയുടഞ്ഞ-
സന്ധ്യാവിളക്കതിലെ
കനല്ത്തുണ്ടും,
ഇരുളും, കോടക്കാറ്റും,
മഞ്ഞുവീഴ്ചയും,
ഹിമയുഗത്തില് വീഴും പോലെ
തണുക്കും ഹൃദ്സ്പന്ദവും...
ഒടുങ്ങാഭാരത്തിന്റെ-
ചിന്തകള്, ചിതല്തിന്ന
സ്മൃതിയില് നിന്നും-
പറന്നകലും പ്രതീക്ഷകള്,
ചിരിച്ചാലുടന് വരും
മോഹഭംഗങ്ങള്
സ്വപ്നച്ചിറകും
കരിച്ചേ പോം
രോഷവാതങ്ങള്
മുകില്ച്ചിറകില്
പറന്നെത്തും തോറ്റങ്ങള്
ദുര്യോഗങ്ങള്....
ചിരിക്കില്ലിനിയെന്ന്
നോമ്പുനോറ്റിരിക്കുമ്പോള്
പകലോ വെട്ടം തൂകി-
പതിയെ തലോടിടും
ഓലഞ്ഞാലികള് തൂങ്ങി-
യാടുന്നൊരൂഞ്ഞാല്ക്കൂട്-
ഗ്രാമമായ് മുന്നില് വന്ന്-
കൈതൊട്ട് വിളിച്ചീടും
ഇലഞ്ഞിമരത്തിന്റെ-
ചോട്ടില് നിന്നാണ്ണാര്ക്കണ്ണന്-
വരും ഝില് ഝില്ലൊന്നൊരു-
പാട്ടിനെ കൂടെക്കൂട്ടി
പാടത്ത് ചേറില് നിന്ന്-
വിരിഞ്ഞൊരാമ്പല്പ്പൂവ്,
വേനലിന് മഴത്തുള്ളിക്കിലുക്കം
കാട്ടിത്തരും..
നീറുകള് കൂടും കെട്ടി-
പാര്ക്കുന്ന മാഞ്ചില്ലയില്
പാടുവാനെന്നും വരും
കുയിലും, മാടത്തയും
അമ്പലപ്രാവും, അരയാലിന്റെ
ഇലത്താളം, ശംഖിലെ കടല്,
ആറ്റുവക്കിലെ കായല്ക്കാറ്റ്
പിഞ്ഞിയ നോട്ട് ബുക്കിലെ-
കവിത, കടലാഴം..
ചിമ്മിനിക്കൂടിന്നുള്ളില്
തെളിയും നക്ഷത്രപ്പൂ.
കണ്ണിലെ ചെരാതുകള്ക്കുള്ളിലായ്-
തിളങ്ങുമ്പോള്
നിറയും ആഹ്ലാദത്തിന്-
ഭൂമിയില്, കിഴക്കിന്റെ
തിരുമുറ്റത്തായ്-
പാകിവയ്ക്കുന്നു
സന്തോഷത്തെ.....