വ്യക്തി സ്വാതന്ത്ര്യത്തിനു എതിരായ ഭീഷണികളെ നേരിടണമെന്നു യുഎസ് കോൺഗ്രസിലെ ഇന്ത്യൻ അമേരിക്കൻ അംഗം റെപ്. ശ്രീ തനെദാർ പറഞ്ഞു. മത സ്വാതന്ത്ര്യത്തിനു നേരെ ഉയരുന്ന വെല്ലുവിളികളെയും നേരിടണം.
ഹിന്ദു പാക്ടിന്റെ ഹിന്ദുലൗഞ്ജ് പരിപാടിയിൽ സംസാരിക്കുകയായിരുന്നു അദ്ദേഹം. ഹിന്ദു മന്ദിർ എംപവർമെൻറ് കൗൺസിൽ കൺവീനർ തേജൽ ഷാ, ഹിന്ദുലൗഞ്ജ് കോ-ഹോസ്റ്റ് സുധ ജഗന്നാഥൻ എന്നിവർ ആയിരുന്നു ആതിഥേയർ.
ഗവൺമെന്റ് പദ്ധതികൾ ഹിന്ദു സമുദായം വേണ്ടത്ര ഉപയോഗപ്പെടുത്തുന്നില്ലെന്നു സമുദായം നേരിടുന്ന വെല്ലുവിളികളെ കുറിച്ച് സംസാരിച്ചപ്പോൾ തനെദാർ പറഞ്ഞു. ഉദാഹരണത്തിന് ആരാധനാലയങ്ങളിൽ സുരക്ഷയ്ക്കുള്ള അത്യാധുനിക സംവിധാനങ്ങൾ ഹോംലാൻഡ് സെക്യൂരിറ്റി നൽകുന്നുണ്ട്. അതു പക്ഷെ പ്രയോജനപ്പെടുത്തുന്നില്ല.
ഭീകരത, അക്രമം, നശീകരണം ഇവയൊക്കെ അസ്വീകാര്യമാണെന്നു തനെദാർ പറഞ്ഞു. അവയൊക്കെ സമാധാനപരമായ മത ജീവിതത്തിനു നേരെയുള്ള കടന്നാക്രമണമാണ്. ഹിന്ദു ധർമം സമാധാനത്തിൽ അടിയുറച്ചതാണ്. എന്നാൽ സംയമനം ദൗർബല്യമായി തെറ്റിദ്ധരിക്കരുത്.
അതുകൊണ്ടാണ് ഹിന്ദു സമുദായം കൂടുതലായി മുഖ്യധാരാ രാഷ്ട്രീയത്തിൽ വരണമെന്ന് ആവശ്യപ്പെടുന്നത്. ഭാവി തലമുറയ്ക്കു കൂടി സ്വാതന്ത്ര്യം കാത്തു സൂക്ഷിക്കണം.
"നമ്മൾ ഭീഷണിയും വിദ്വേഷവും വച്ചു പൊറുപ്പിക്കരുത്. ഹിന്ദു ധർമത്തെ കുറിച്ചുള്ള സന്ദേശം നമ്മൾ പ്രചരിപ്പിക്കും."
Shree Thanedar urges more active role by Hindu community