കൈയില്‍ ജപമാല, ഐക്യത്തിന് ആഹ്വാനം, പുതിയ പ്രതീക്ഷ ഉയര്‍ത്തി ബൈഡന്‍.(ഷോളി കുമ്പിളുവേലി)

EMALAYALEE SPECIAL 21-Jan-2021 ഷോളി കുമ്പിളുവേലി

EMALAYALEE SPECIAL 21-Jan-2021

ഷോളി കുമ്പിളുവേലി

ഏറെ സവിശേഷതകളോടെയാണ് ജോ ബൈഡന്‍ അമേരിക്കയുടെ 46-തി പ്രസിഡന്റായി സ്ഥാനമേറ്റത്!

127 വര്‍ഷം പഴക്കമുള്ള കുടുംബ ബൈബിള്‍ ഇടതു കൈവച്ച്, വലതുകൈ ഉയര്‍ത്തി സുപ്രീം കോടതി ചീഫ് ജസ്റ്റീസ് ജോണ്‍ റോബര്‍ട്ട്‌സ് മുമ്പാകെ സത്യപ്രതിജ്ഞ ചെയ്ത 'ജോസഫ് റോബിനെറ്റ് ബൈഡന്‍ ജൂണിയര്‍' എന്ന ജോ ബൈഡന്‍ അമേരിക്കയുടെ പുതിയ പ്രസിഡന്റായി സ്ഥാനമേറ്റത് പ്രത്യാശയും പുതിയ പ്രതീക്ഷകളും വാനോളമുയര്‍ത്തിക്കൊണ്ടാണ്! രാവില കുടുംബ സമേതം സെന്റ് മാത്യൂ ദ അപ്പസ്‌തോല്‍ കത്തീഡ്രല്‍ ദേവാലയത്തില്‍ വിശുദ്ധ കുര്‍ബ്ബാനയില്‍ സംബന്ധിച്ചതിനുശേഷമാണ്, ബൈഡനും കുടുംബവും സത്യപ്രതിജ്ഞാ ചടങ്ങ് നടന്ന പാര്‍ലമെന്റ് മന്ദിരമായ കാപ്പിറ്റോളിലെത്തിയത്.

അമേരിക്കന്‍ പ്രസിഡന്റാകുന്ന രണ്ടാമത്തെ കത്തോലിക്കാ മത വിശ്വാസിയാണ് ജോ ബൈഡന്‍. ജോണ്‍ എഫ് കെന്നഡിക്കുശേഷം, അറുപതു വര്‍ഷങ്ങള്‍ കഴിഞ്ഞാണ് മറ്റൊരു കത്തോലിക്കന്‍ അമേരിക്കന്‍ പ്രസിഡന്റ് പദവിയിലെത്തുന്നത്. അതുകൊണ്ടുതന്നെ, സത്യപ്രതിജ്ഞാചടങ്ങിനോടനുബന്ധിച്ചു നടന്ന പ്രാര്‍ത്ഥനാ ശുശ്രൂഷകള്‍ക്കു നേതൃത്വം നല്‍കിയതും, കത്തോലിക്കാ വൈദികനായ റവ.ഫാ.ലിയോ ജെര്‍മൈന്‍ ആണ്. കൈതണ്ടയില്‍ ജപമാലയും ധരിച്ചു നടക്കുന്ന പ്രസിഡന്റ് എന്ന വിശേഷണവും ഇനി ജോ ബൈഡന് സ്വന്തം! കാന്‍സര്‍ ബാധിതനായ മൂത്തമകന്‍ 'ബോ' 2015 ല്‍ മരണമടഞ്ഞതിനുശേഷം, മകന്‍ കൈയില്‍ കെട്ടിയിരുന്ന ജപമാല, മകന്റെ ഓര്‍മ്മക്കായി ബൈഡന്‍ ധരിച്ചു തുടങ്ങി. പ്രശ്‌നങ്ങളെ അതിജീവിക്കുവാന്‍ തനിക്ക് ശക്തി തരുന്നത് കൈയില്‍ ധരിച്ചിട്ടുള്ള ഈ ജപമാലയാണെന്ന് തുറന്നു പറയുവാനും ബൈഡന്‍ മടി കാണിച്ചിട്ടില്ല. മുടങ്ങാതെ ഞായറാഴ്ചകളില്‍ വിശുദ്ധ കുര്‍ബ്ബാനയില്‍ ബൈഡനും, ഭാര്യ ജില്ലും പങ്കെടുക്കാറുണ്ട്. കടുത്ത ഈശ്വര വിശ്വാസി ആണെങ്കിലും അബോര്‍ഷന്‍ പോലുള്ള കാര്യങ്ങളില്‍ സഭയുടെ നിലപാടുകളില്‍ നിന്നും വ്യത്യസ്തമായാണ് ബൈഡന്‍ നിലകൊണ്ടിട്ടുള്ളത് എന്നത് എടുത്തു പറയേണ്ടതാണ്.

അമേരിക്കയുടെ 49-ാമത് വൈസ് പ്രസിഡന്റായി തെരഞ്ഞെടുക്കപ്പെട്ട കമലാ ഹാരീസിന്റെ പ്രത്യേകതകള്‍ നിരവധിയാണ്. അമേരിക്കയുടെ ചരിത്രത്തിലെ ആദ്യ വനിതാ വൈസ് പ്രസിഡന്റായ കമല, ആദ്യ കറുത്ത വംശജയുമാണ്. കൂടാതെ കമലയുടെ അമ്മ ഇന്ത്യക്കാരിയുമാണ്. ക്രിസ്ത്യന്‍ പ്രൊട്ടസ്റ്റന്റ് വിശ്വാസിയാണ് കമല ഹാരീസ്. എന്നാല്‍ ഭര്‍ദതദ്താവ് ഡഗ് എംഹോഫ് യൂദമത വിശ്വാസിയുമാണ്.

പ്രസിഡന്റായി സത്യപ്രതിജ്ഞ ചെയ്തതിനുശേഷം രാജ്യത്തേയും, ലോകത്തെതന്നെയേയും അഭിസംബോധന ചെയ്തു ബൈഡന്‍ നടത്തിയ പ്രസംഗവും വികാര നിര്‍ഭരമായിരുന്നു. അമേരിക്കയുടെ ഐക്യത്തിനായി ആഹ്വാനം ചെയ്ത ബൈഡന്‍, വെറുപ്പും വിദ്വേഷവും വെടിഞ്ഞ് രാജ്യ പുനര്‍നിര്‍മ്മിതിക്കായി പ്രവര്‍ത്തിക്കുവാന്‍ ജനങ്ങളോട് അഭ്യര്‍ത്ഥിച്ചു. അതോടൊപ്പം താന്‍ എല്ലാവരുടേയും പ്രസിഡന്റായിരിക്കുമെന്ന വാക്കും!!

സ്റ്റുഡന്റ് ലോൺ തിരിച്ചടവ് സെപറ്റംബർ 30 -നു ശേഷം മതി

ബൈഡന്റെ തീരുമാനങ്ങൾ, പ്രതീക്ഷകൾ

ബൈഡന്റ്റെ നല്ലകാലം, രാജ്യത്തിന്റ്റെ ഗതി കാത്തിരുന്നു കാണാം. (ബി ജോണ്‍ കുന്തറ)